ESKI ou konn sa premye keksoz ki Noe ti fer apre ki li ek son fanmiy ti’n sorti dan lars? I ti ofer Bondye en kado. Ou kapab vwar li pe fer sa dan sa portre la anba. Noe ti ofer Bondye bann zannimo pour remersye Li pour sov lavi son fanmiy dan sa gran deliz.

Eski ou krwar ki Zeova ti kontan sa kado? Wi, i ti kontan. Alor i ti promet Noe ki i pa pou zanmen detrir lemonn ankor par en deliz.

Later pa ti tarde pour sek. Noe ek son fanmiy ti konmans en nouvo lavi an deor lars. Bondye ti beni zot e dir zot: ‘Zot bezwen ganny bokou zanfan. Zot devret vin bokou ziska ki dimoun i ranpli later antye.’

Me plitar, kan dimoun ti pou tann koz lo sa gran deliz, zot ti pou kapab per ki en lot deliz parey sa enn i ariv ankor. Alor Bondye ti donn bann dimoun en siny ki i pa pou zanmen anmenn deliz lo later ankor. Eski ou konnen kwa sa siny? Ti en larkansyel.

Souvan-d-fwa, ou kapab vwar en larkansyel dan lesyel kan soley i tape apre ki lapli in tonbe. En larkansyel i annan diferan zoli kouler. Eski ou’n deza vwar enn? Eski ou vwar sa enn dan sa portre?

Sa i sa ki Bondye ti dir: ‘Mon promet ki zanmen ankor dimoun ek bann zannimo pou ganny detri par en deliz. Mon pe met mon larkansyel dan nyaz. E kan sa larkansyel i aparet, mon pou vwar li e rapel mon promes.’

Alor kan ou vwar en larkansyel, ki i devret rapel ou? Wi, promes Bondye ki i pa pou zanmen detrir lemonn ankor par en gran deliz.