ZOZEF ti annan selman 17 an kan i ti ganny anmennen Lezip. Laba i ti ganny vann avek en zonm ki ti apel Potifar. Potifar ti travay avek lerwa Lezip ki ti apel Faraon.

Zozef ti travay dir pour son met, Potifar. Alor kan Zozef ti pli vye, Potifar ti met li ansarz son lakaz antye. Me aprezan, akoz ki Zozef ti la dan prizon? Se akoz madanm Potifar.

Zozef ti’n vin gran e vin en zoli garson e madanm Potifar ti anvi ki Zozef i dormi avek li. Me Zozef ti konnen ki sa i mal alor i ti refize. Madanm Potifar ti tre ankoler. Alor kan son msye ti retourn kot lakour, i ti koz lalang avek li e i ti dir: ‘Zozef, sa move garson ti oule dormi avek mwan!’ Potifar ti krwar son madanm, e i ti tre ankoler avek Zozef. Alor i ti fer met Zozef dan prizon.

Sa zonm ki ti ansarz prizon pa ti tarde pour remarke ki Zozef ti en bon dimoun. Alor i ti fer li ansarz tou lezot prizonnyen. Plitar Faraon ti tre ankoler avek son serviter ki ti servi li diven e osi son boulanze, e i ti fer met zot dan prizon. En zour swar sa de zonm ti rev sakenn en rev, me zot pa konnen ki zot rev ti vedir. Lannmen Zozef ti dir zot: ‘Rakont mwan zot rev.’ Zot ti rakont li e avek led Bondye Zozef ti eksplik zot ki savedir zot rev.

Zozef ti dir avek sa enn ki ti servi Faraon diven: ‘Dan trwa zour ou pou ganny large dan prizon, e ou pou vin serviter Faraon ankor.’ Apre Zozef ti azoute: ‘Kan ou sorti, koz avek Faraon lo mwan, e ed mwan pour sorti dan prizon.’ Me avek sa boulanze, Zozef ti dir: ‘Dan trwa zour Faraon pou fer koup ou latet.’

Dan trwa zour sa bann keksoz ti arive parey ki Zozef ti dir. Faraon ti fer koup latet sa boulanze. Tandis ki sa lot serviter ti ganny large dan prizon e i ti konmans servi lerwa ankor. Me sa serviter ti oubliy net konsernan Zozef ! I pa ti dir Faraon nanryen lo li, e Zozef ti bezwen reste dan prizon.