ZOZEF ti oule konnen si son 10 gran frer ti ankor malis e pa bon. Alor i ti dir: ‘Zot bann espyon. Zot in vin rod pwen feb nou pei.’

‘Non, nou pa bann espyon,’ zot ti reponn. ‘Nou bann zonm onnet. Nou tou nou frer. Ti annan 12 nou. Me en frer i nepli vivan, e sa enn pli zenn i kot lakour avek nou papa.’

Zozef ti fer konmsi i pa krwar zot. I ti gard Simeon dan prizon, e i ti les larestan pran manze e retourn kot zot. Me i ti dir zot: ‘Kan zot retournen, zot bezwen anmenn zot pti frer avek zot.’

Kan zot ti retourn kot zot an Kanaan, sa bann frer ti rakont zot papa Zakob tou sa ki ti’n arive. Zakob ti vreman tris. ‘Zozef nepli vivan,’ i ti kriye, ‘e aprezan Simeon nepli vivan. Mon pa pou les zot pran Benzamen, mon pli zenn garson.’ Me kan zot manze ti pe konmans fini, Zakob ti bezwen les zot anmenn Benzamen Lezip afen ki zot ti a kapab ganny plis manze.

Zozef ti vwar son bann frer pe vini. I ti vreman kontan pour vwar son pti frer Benzamen. Byensir, personn ant zot pa ti konnen ki sa zonm enportan ti Zozef. Zozef ti aprezan fer en keksoz pour teste son 10 demi frer.

I ti fer son bann serviter ranpli zot bann sak plen avek manze. Me san ki i ti les zot konnen, i ti fer met son lakoup spesyal an larzan dan sak Benzamen. Apre ki zot tou zot ti’n ale e ariv en pti distans lo semen, Zozef ti anvoy son bann serviter apre zot. Kan zot zwenn bann frer Zozef, sa bann serviter ti dir: ‘Akoz ki zot in vol lakoup an larzan nou met?’

Zot tou zot ti dir: ‘Nou pa’n vol son lakoup.’ ‘Si ou vwar sa lakoup avek enn ant nou, les sa dimoun ganny touye.’

Alor bann serviter ti fouy dan tou bann sak, e zot ti trouv lakoup dan sak Benzamen, zis parey ou vwar la. Bann serviter ti dir: ‘Larestan zot, zot kapab ale, me Benzamen i bezwen vin avek nou.’ Ki sa 10 demi frer ti pou fer aprezan?

Zot tou zot ti retourn avek Benzamen kot lakaz Zozef. Zozef ti dir avek son bann frer: ‘Zot tou zot kapab ale, me Benzamen i devret reste isi konman mon lesklav.’

Zida ti koze, e i ti dir: ‘Si mon retourn kot lakour san mon frer, mon papa pou mor akoz i kontan li en kantite. Alor silvouple, gard mwan isi konman ou lesklav, me les sa garson al kot li.’

Zozef ti rekonnet ki son bann frer ti’n sanze. Zot ti nepli malis e pa bon. Annou vwar ki Zozef ti fer aprezan.