ESKI ou’n deza antann en bourik koze? ‘Non,’ ou pou dir. ‘Bann zannimo pa kapab koze.’ Me Labib i mansyonn en bourik ki ti koze. Annou vwar konman sa ti arive.

Bann Izraelit ti preski pare pour antre an Kanaan. Balak, lerwa Moab, ti per bann Izraelit. Alor i ti anvoy sers en zonm malen ki apel Balaam pour donn malediksyon bann Izraelit. Balak ti promet pour donn Balaam en kantite larzan, alor Balaam ti mont lo son bourik e konmans vwayaze pour al vwar Balak.

Zeova pa ti oule Balaam modi Son pep. Alor i ti anvoy en lanz avek en gran sab debout dan semen pour aret li. Balaam pa ti kapab vwar lanz, me son bourik ti vwar. Alor sa bourik ti kontinyen esey say sa lanz, e finalman i ti zis dormi lo semen. Balaam ti vreman ankoler, e i ti bat son bourik avek en baton.

Apre Zeova ti fer Balaam antann son bourik koz avek li. ‘Ki mon’n fer ou pour ou bat mwan?’ sa bourik ti demande.

‘Ou’n fer mwan vin parey en bet,’ Balaam ti reponn. ‘Si mon ti annan en sab mon ti pou’n touy ou!’

‘Eski mon’n deza reazir koumsa avek ou?’ sa bourik ti demande.

‘Non,’ Balaam ti reponn.

Apre Zeova ti les Balaam vwar sa lanz ki pe debout lo semen avek en sab. Lanz ti dir: ‘Akoz ou’n bat ou bourik? Mon’n vin blok ou semen, akoz ou pa devret pe al modi Izrael. Si ou bourik pa ti’n say mwan, mon ti pou’n touy ou, me mon pa ti pou bles ou bourik.’

Balaam ti dir: ‘Mon’n fer pese. Mon pa ti konnen ki ou pe debout lo semen.’ Lanz ti les Balaam ale, e i ti al vwar Balak. I ti kontinyen esey donn malediksyon Izrael, me, plito, Zeova ti fer li beni Izrael trwa fwa.