KAN bann Izraelit ti rankontre problenm, zot ti kriy Zeova. Zeova ti reponn zot par donn zot bann sef ki ti brav pour ed zot. Labib ti apel zot bann ziz. Zozye ti premye ziz, e serten bann ziz apre li ti apel Otnyel, Eoud ek Samgar. Me de dimoun ki ti ed Izrael ti de madanm ki ti apel Debora ek Yael.

Debora ti en madanm profet. Zeova ti donn li lenformasyon konsernan lavenir, e apre i ti dir bann dimoun ki Zeova ti’n dir. Debora ti osi en ziz. I ti asiz anba en serten pye palm e bann dimoun ti vin kot li pour rod led pour zot problenm.

Pandan sa letan Yabin ti lerwa Kanaan. I ti annan 900 saret lager. Son larme ti telman for ki plizyer bann Izraelit ti ganny forse pour vin serviter Yabin. Sef larme Lerwa Yabin ti apel Sisera.

En zour Debora ti anvoy apel ziz Barak, e i ti dir li: ‘Zeova in dir: “Pran 10,000 zonm e gid zot ziska kot Montanny Tabor. Laba mon pou anmenn Sisera kot ou. E mon pou fer ou ranport laviktwar lo li ek son larme.” ’

Barak ti dir avek Debora: ‘Mon pou ale si ou osi ou vin avek mwan.’ Debora ti al ansanm avek li, me i ti dir avek Barak: ‘Pa ou ki dimoun pou aklanmen pour laviktwar, akoz Zeova pou donn Sisera dan lanmen en madanm.’ E se sa ki ti arive.

Barak ti al kot Montanny Tabor pour zwenn larme Sisera. Toudenkou Zeova ti kree en lavalas, e en kantite larme Sisera ti noye. Me Sisera ti sorti lo son saret e taye.

En pe letan apre Sisera ti vin kot latant Yael. I ti envit li pour antre anndan, e i ti donn li enpe dile. Sa ti fer li an sonmey, e dan en pti moman i ti ronfle sonmey. Apre sa, Yael ti pran en pin latant e i ti anfons dan latet sa move zonm. Plitar, kan Barak ti arive, Yael ti montre li Sisera ki ti’n mor! Alor ou kapab vwar ki sa ki Debora ti’n dir ti vin vre.

Finalman Lerwa Yabin ti ganny touye li osi, e ankor enn fwa bann Izraelit ti viv anpe pour en pe letan.