PLIZYER lannen ti’n pase—10 an, 20 an, 30 an, 39 an! E bann Izraelit ti ankor dan dezer. Me pandan tou sa bann lannen Zeova ti pran swen avek son pep. I ti nouri zot avek lamann. I ti gid zot pandan lazournen avek en kolonn nyaz, e dan lannwit avek en kolonn dife. E pandan tou sa lannen zot lenz pa ti desire e zot lipye pa ti anfle.

I ti aprezan premye mwan dan karantyenm lannen depi ki zot ti’n kit Lezip. Ankor enn fwa bann Izraelit ti pe kanpe an Kades. Se la ki zot ti ete letan sa 12 espyon ti ganny anvoye pour espyonn Kanaan preski 40 an pase. Ser Moiz Miryam ti mor la an Kades. E parey avan, ti annan problenm an Kades.

Bann dimoun pa ti kapab trouv en landrwa kot i annan delo. Alor zot ti konplent avek Moiz: ‘Ti pou pli byen si nou ti’n mor. Akoz ou’n tir nou Lezip e anmenn nou dan sa landrwa terib kot nanryen pa pouse? Napa ni legren, ni fig, ni rezen, ni grenad. Menm delo napa pour bwar.’

Kan Moiz ek Aaron ti al dan tabernak pour priye, Zeova ti dir Moiz: ‘Rasanble bann dimoun. Apre, devan zot, koz avek sa ros laba. Pour annan ase delo ki pou koule pour tou dimoun ek zannimo bwar.’

Alor Moiz ti rasanble tou dimoun, e dir: ‘Ekoute, zot ki napa konfyans dan Bondye! Eski mwan ek Aaron nou bezwen tir delo dan sa ros pour zot?’ Apre Moiz ti tap sa ros de fwa avek en baton, e en gran toran delo ti sorti dan sa ros. Ti annan ase delo pour tou dimoun ek zannimo bwar.

Me Zeova ti ankoler avek Moiz ek Aaron. Eski ou konnen akoz? Akoz Moiz ek Aaron ti dir ki zot pou fer delo sorti dan ros. Me se vreman Zeova ki ti’n fer sa. E vi ki Moiz ek Aaron pa ti’n dir laverite konsernan sa, Zeova ti dir ki i pou pini zot. ‘Zot pa pou fer mon pep antre an Kanaan,’ i ti dir.

Deswit apre bann Izraelit ti kit Kades. En pe letan apre, zot ti ariv kot Montanny Or. La, anler lo montanny, Aaron ti mor. Aaron ti annan 123 an letan i ti mor. Bann Izraelit ti vreman sagren, alor pour 30 zour tou dimoun ti plere pour Aaron. Son garson Eleazar ti vin lot gran pret nasyon Izrael.