ESKI sa pa i en zoli pti garson? I apel Samyel. E sa zonm ki’n met son lanmen lo latet Samyel se Eli, gran pret Izrael. Se papa Samyel Elkana ek son manman Ana ki pe anmenn Samyel kot Eli.

Samyel i annan apepre 4 ou 5 an. Me i pou reste la dan tabernak Zeova avek Eli ek lezot pret. Akoz ki Elkana ek Ana ti donn zot garson ki ti ankor tre zenn pour servi Zeova dan tabernak? Annou vwar akoz.

Zis en pe lannen avan ki sa ti’n arive Ana ti vreman tris. Rezon pour sa se akoz i pa ti kapab ganny en pti baba, e i ti vreman anvi enn. Alor, en zour, kan Ana ti pe vizit tabernak Zeova, i ti priye: ‘O Zeova, pa oubliy mwan! Si ou donn mwan en garson, mon promet ki mon pou donn ou li afen ki i kapab servi ou tou son lavi.’

Zeova ti reponn lapriyer Ana, e enn de mwan plitar Ana ti donn nesans Samyel. Ana ti kontan son pti garson, e i ti konmans ansenny li lo Zeova kan i ti ankor pti pti. I ti dir avek son msye: ‘Dek ki Samyel i vin ase gran, mon pa pou bezwen pran swen avek li ankor, mon pou anmenn li kot tabernak pour servi Zeova.’

Se sa ki nou vwar Ana ek Elkana pe fer dan sa portre. Lefe ki son paran ti’n ansenny li byen, Samyel ti vreman kontan pour servi Zeova dan son latant. Tou le zan Ana ti anmenn en nouvo lenz ki i ti’n fer pour Samyel.

Anmezir ki lannen ti pase, Samyel ti kontinyen servi Zeova dan son tabernak. Zeova ek bann dimoun ti kontan Samyel. Me Ofni ek Fineas, garson Eli, ti pa bon. Zot ti fer en kantite move keksoz, e zot ti fer lezot dimoun dezobei Bondye. Eli ti devret fer zot aret servi konman pret, me i pa ti fer li.

Samyel pa ti les okenn sa bann move keksoz ki ti pe arive kot tabernak fer li aret servi Zeova. Me lefe ki dan sa letan ti annan en pti gin dimoun ki ti vreman kontan Zeova, sa ti fer ki ti annan en kantite letan depi ki Zeova pa ti’n koz avek en dimoun lo later. Kan Samyel ti vin enpe pli gran se sa ki ti arive:

Samyel ti pe dormi dan tabernak kan en lavwa ti kriy li e fer li leve. I ti reponn: ‘La mon la.’ I ti leve e tay kot Eli, e i ti dir: ‘Ou’n apel mwan, la mon la.’

Me Eli ti reponn: ‘Mon pa’n apel ou; al dormi.’ Alor Samyel ti al dormi.

Apre sa lavwa ti kriy Samyel pour en dezyenm fwa: ‘Samyel!’ Alor Samyel ti leve e i ti tay kot Eli. ‘Ou’n kriy mwan, e la mon la,’ i ti dir. Me Eli ti reponn: ‘Mon pa’n kriy ou mon garson. Al dormi.’ Samyel ti al dormi.

‘Samyel!’ sa lavwa ti kriye pour trwazyenm fwa. Alor Samyel ti tay kot Eli. ‘La mon la, ou’n bezwen kriy mwan safwasi,’ i ti dir. Aprezan Eli ti konnen ki ti bezwen Zeova ki ti pe kriy Samyel. Alor i ti dir avek Samyel: ‘Al dormi ankor enn fwa, e si i kriy ou ankor, ou bezwen dir: “Koze Zeova, ou serviter pe ekoute.” ’

Se sa ki Samyel ti dir kan Zeova ti kriy li ankor. Zeova ti dir avek Samyel ki i ti pe al pini Eli ek son de garson. Plitar Ofni ek Fineas ti mor dan lager avek bann Filisten, e kan Eli ti tann sa ki ti’n arive i ti tonbe e kas son likou e i ti mor. Alor parol Zeova ti’n vin vre.

Samyel ti grandi e i ti vin dernyen ziz an Izrael. Kan i ti’n vye, bann dimoun ti demann li: ‘Swazir en lerwa pour diriz nou.’ Samyel pa ti oule fer sa, akoz se Zeova ki ti zot lerwa. Me Zeova ti demann li pour ekout bann dimoun.