BANN Filisten ti vin lager ankor avek bann Izraelit. Sa trwa pli vye frer David ti aprezan form par larme Sail. En zour Zese ti dir avek David: ‘Pran enpe legren ek dipen anmenn kot ou bann frer. Gete si zot byen.’

Kan David ti ariv kot kan larme, i ti tay dan laliny batay pour rod son bann frer. Golyat, en zean Filisten ti sorti pour sikann bann Izraelit. I ti fer sa tou le bomaten e tou le swar pour 40 zour. I ti kriye: ‘Swazir enn ou zonm pour lager avek mwan. Si i ranport laviktwar e touy mwan, nou pou vin zot lesklav. Si ou oze, swazir en dimoun pour lager avek mwan.’

David ti demann avek serten bann larme: ‘Ki sa zonm ki pou touy sa Filisten e liber bann Izraelit dan laont pou gannyen?’

‘Sail pou donn sa zonm en ta larzan,’ en solda ti reponn. ‘E i pou donn li son fiy pour marye avek.’

Me tou bann Izraelit ti per Golyat akoz i ti telman gro. I ti mezir preski 3 met, e en lot solda ti anmenn son boukliye.

Serten solda ti al dir Sail ki David ti oule lager avek Golyat. Me Sail ti dir avek David: ‘Ou pa kapab lager avek sa Filisten. Ou ankor en pti garson, e sa Filisten in en larme tou son lavi.’ David ti reponn: ‘Mon’n touy en lours ek en lyon ki ti’n pran mouton mon papa. E sa Filisten pou vin parey enn ant zot. Zeova pou ed mwan.’ Alor Sail ti dir: ‘Ale, e fotespere ki Zeova i avek ou.’

David ti al kot en larivyer e i ti anmas senk ros, i ti met zot dan son sak. Apre i ti pran son fles e i ti avans ver sa zean. Kan Golyat ti vwar li i pa ti oule krwar. I ti mazinen ki ti pou vreman fasil pour touy David.

‘Zis vin kot mwan,’ Golyat ti dir, ‘e mon pou donn ou lekor bann zwazo ek bann zannimo pour manze.’ Me David ti dir: ‘Ou’n vin kot mwan avek en sab, en lans, me mwan mon pe vin kot ou avek non Zeova. Ozordi Zeova pou donn ou dan mon lanmen e mon pou touy ou.’

Apre sa David ti tay ver Golyat. I ti pran en ros dan son sak, i ti met dan son fles e i ti tir son fles avek tou son lafors. Sa ros ti al drwat dan latet Golyat, e i ti tonm ater mor! Kan bann Filisten ti vwar ki zot sanpyon ti’n mor, zot tou zot ti vire e taye. Bann Izraelit ti tay deryer zot e ranport laviktwar.