TI ANNAN plis ki 10 an depi ki lerwa Neboukadnetsar ti’n anmenn tou bann Izraelit ki ti pli byen edike an Babilonn. Aprezan gete ki pe arive! Lavil Zerizalenm pe brile. E bann Izraelit ki pa’n ganny touye pe ganny anmennen konman prizonnyen an Babilonn.

Mazinen, ki se sa ki bann profet Zeova ti dir pour arive si bann dimoun pa sanz zot bann move fason. Me bann Izraelit pa ti ekout bann profet. Zot ti kontinyen ador bann fo bondye olye Zeova. Alor bann dimoun ti bezwen ganny pini. Nou konn sa akoz profet Bondye, Ezekyel, i dir nou konsernan bann move keksoz ki bann Izraelit ti pe fer.

Eski ou konnen lekel Ezekyel? I ti en zennonm ki Neboukadnetsar ti anmenn an Babilonn 10 an pase avan ki Zerizalenm ti ganny detri. Danyel ek son trwa zanmi Sadrak, Mesak ek Abednego, zot osi zot ti ganny anmennen an Babilonn sa menm letan.

Pandan ki Ezekyel ti ankor an Babilonn, Zeova ti montre li bann move keksoz ki ti pe arive an Zerizalenm kot tanp. Zeova ti fer sa atraver en mirak. Ezekyel ti ankor an Babilonn, me Zeova ti les li vwar tou sa bann keksoz ki ti pe arive kot tanp. E sa ki Ezekyel ti vwar ti sokan!

‘Get sa bann keksoz degoutan ki bann dimoun pe fer kot tanp,’ Zeova ti dir Ezekyel. ‘Get bann miray ki’n ganny kouver avek portre bann serpan ek lezot zannimo. E get bann Izraelit pe ador zot!’ Ezekyel ti kapab vwar sa bann keksoz, e i ti ekrir sa ki ti pe arive.

‘Eski ou vwar ki bann sef Izraelit pe fer an sekre?’ Zeova ti demann Ezekyel. Wi, i ti kapab vwar sa osi. Ti annan 70 zonm, e zot tou zot ti pe ador bann fo bondye. Zot ti pe dir: ‘Zeova pa vwar nou. I’n kit pei.’

Apre Zeova ti montre Ezekyel serten madanm kot baro tanp ki ti dan nor. Zot ti pe asiz la e pe ador fo bondye Tamouz. E get sa bann zonm ki dan larantre tanp Zeova! I annan apepre 25 zot. Ezekyel ti vwar zot. Zot ti pe salye ver les e zot ti pe ador soley!

‘Sa bann dimoun napa respe pour mwan,’ Zeova ti dir. ‘Zot pa pe senpleman fer bann keksoz mal me zot vin fer sa bann keksoz kot mon tanp!’ Alor Zeova ti promet: ‘Zot pou santi lafors mon lakoler. Mon pa pou pran pitye pour zot kan zot pou ganny detri.’

Selman trwa an apre ki Zeova ti’n montre Ezekyel sa bann keksoz, ki bann Izraelit ti rebel kont lerwa Neboukadnetsar. Alor i ti al lager kont zot. Enn an edmi plitar, bann Babilonnyen ti kas miray Zerizalenm e bril sa lavil net. Laplipar bann dimoun ti ganny touye oubyen anmennen konman prizonnyen an Babilonn.

Akoz ki Zeova ti’n les sa destriksyon terib arive avek bann Izraelit? Wi, se akoz zot pa ti ekout Li e zot pa ti obei son bann lalwa. Sa i montre nou konman i enportan pour nou fer sa ki Bondye i demande.

En pti gin dimoun ti ganny permisyon pour reste an Zerizalenm. Lerwa Neboukadnetsar ti fer en Zwif ki ti apel Gedalya ansarz sa bann dimoun. Me apre, serten bann Izraelit ti touy Gedalya. Aprezan bann dimoun ti per ki bann Babilonnyen ti pou vin detri zot akoz sa move keksoz ki’n arive. Alor zot ti fors Zeremi pour vin avek zot, e zot ti sove e al Lezip.

Sa ti fer ki ti napa personn ki ti reste an Zerizalenm. Pour 70 lannen personn pa ti reste an Zerizalenm. I ti konpletman vid. Me Zeova ti promet ki i ti pou fer son pep retourn dan sa pei apre 70 lannen. Antretan, ki ti pe arive avek pep Bondye an Babilonn kot zot ti’n ganny anmennen? Annou vwar.