GET tou sa bann travay ki pe ganny fer la. Bann Izraelit i okipe pe konstri miray Zerizalenm. Kan lerwa Neboukadnetsar ti detri Zerizalenm 152 an pase, i ti kraz miray e bril bann baro sa lavil. Bann Izraelit pa ti konstri sa miray osito ki zot ti retourn Zerizalenm.

Konman bann dimoun ti santi letan zot ti pe reste la pandan tou sa lannen san en miray otour sa lavil? Zot pa ti santi zot an sekirite. Zot bann lennmi ti kapab atak zot fasilman. Aprezan sa zonm, Neemya, pe ed bann dimoun pour rekonstri bann miray. Eski ou konnen lekel Neemya?

Neemya ti en Izraelit ki ti sorti dan lavil Siz kot Mordekai ek Ester ti pe reste. Neemya ti travay dan pale lerwa, alor i ti’n kapab en bon zanmi avek Mordekai ek Larenn Ester. Me Labib pa dir si Neemya ti pe travay avek msye Ester, Lerwa Asweris. I ti travay pour sa lot lerwa, lerwa Artazekzes.

Mazinen ki Artazekzes ti sa bon lerwa ki ti donn Ezra tou sa larzan pour anmenn Zerizalenm pour aranz tanp Zeova. Me Ezra pa ti konstri miray sa lavil ki ti’n tonbe. Annou vwar konman ki Neemya ti sa enn ki ti fer sa louvraz.

Ti fer apepre 13 an depi ki Artazekzes ti donn Ezra larzan pour aranz tanp. Neemya ti ansarz bann serviter ki ti servi lerwa diven. Ti son travay pour servi lerwa diven e fer sir ki personn pa esey met pwazon dan diven lerwa. Sa ti en travay tre enportan.

Byen, en zour frer Neemya, Anani, ek lezot bann zonm ki ti sorti dan pei Izrael ti vin vizit Neemya. Zot ti rakont li bann problenm ki bann Izraelit ti pe rankontre, e dir li ki miray Zerizalenm pa ti ankor rekonstri. Sa ti fer Neemya vreman tris, e i ti priy Zeova lo la.

En zour lerwa ti remarke ki Neemya ti tris, e i ti demande: ‘Akoz ou tris?’ Neemya ti dir li ki Zerizalenm ti dan en move kondisyon e ki miray pa ti ankor rekonstri. ‘Ki ou oule?’ lerwa ti demande.

‘Les mwan al Zerizalenm,’ Neemya ti dir, ‘afen ki mon a kapab rekonstri miray.’ Lerwa Artazekzes ti zantiy. I ti dir avek Neemya ki i kapab ale, e i ti ed li pour ganny dibwa pour li kapab fer serten travay. Deswit apre ki Neemya ti retourn Zerizalenm, i ti fer bann dimoun konn son plan. Bann dimoun ti kontan sa lide, e zot ti dir: ‘Annou konmans travay.’

Kan bann lennmi ti vwar sa miray pe monte, zot ti dir: ‘Nou pou al touy zot, e aret sa travay.’ Me Neemya ti antann konsernan sa, e i ti donn bann travayer sab ek lans. E i ti dir: ‘Pa bezwen per nou bann lennmi. Lager pour zot frer, pour zot zanfan, pour zot madanm e pour zot lakaz.’

Bann dimoun ti vreman brav. Zot ti gard zot bann zarm pare lizour konman aswar, e zot ti kontinyen konstri miray. Alor dan zis 52 zour miray ti’n fini konstri. Aprezan bann dimoun ti kapab santi zot sen e sof anndan lavil. Neemya ek Ezra ti ansenny bann dimoun lalwa Bondye, e bann dimoun ti ere.

Me keksoz pa ti ankor parey i ti ete avan ki bann Izraelit ti ganny anmennen konman prizonnyen an Babilonn. Se lerwa Pers ki ti pe diriz bann dimoun e zot ti bezwen servi li. Me Zeova ti promet ki i ti pou anvoy en lot lerwa, e sa lerwa ti pou anmenn lape pour bann dimoun. Lekel sa lerwa? Konman i pou anmenn lape lo later? Apepre 450 lannen ti pase avan ki okenn keksoz anplis ti ganny devwale lo sa lerwa. Apre ti annan en pti baba ki ti ne e sa nesans ti tre enportan. Nou pou aprann plis konsernan li dan bann zistwar ki pou swiv.