GET Zezi pe asize la. I anler lo en montanny an Galile e i pe ansenny tou sa bann dimoun. Sa bann ki pe asiz pre avek li i son bann disip. I ti’n swazir 12 parmi zot pour vin son bann zapot. Sa bann zapot ti son bann disip spesyal. Eski ou konn zot non?

Ti annan Simon Pyer ek son frer Andre. Apre ti annan Zak ek Zan, zot osi zot ti de frer. Ti annan en lot zapot ki ti apel Zak, e en lot ki ti apel Simon osi. De zapot ti apel Zida. Enn ti Zida Iskaryot, e lot Zida ti osi ganny apele par sa non Tade. Apre ti annan Filip ek Natanael (ki ti osi apel Bartelemi), e answit Matye ek Toma.

Apre ki i ti’n kit Samari, Zezi ti konmans prese pour premye fwa: ‘Rwayonm lesyel i pros.’ Eski ou konnen kisisa sa rwayonm? I gouvernman Bondye e i en vre gouvernman. Se Zezi ki lerwa dan sa rwayonm. I pou dirize dan lesyel e i pou anmenn lape lo later. Rwayonm Bondye pou fer later antye vin en zoli paradi.

La lo montanny, Zezi ti pe ansenny bann dimoun lo sa rwayonm. Zezi ti pe eksplik zot konman zot devret priye: ‘Nou Papa ki dan lesyel, ki ou non i ganny glorifye. Ki ou rwayonm i vini. Ki ou lavolonte i ganny fer lo later, parey dan lesyel.’ En kantite dimoun i apel sa ‘Lapriyer Senyer.’ Lezot i apel li lapriyer ‘Notre Père.’ Eski ou kapab resit sa lapriyer antye?

Zezi ti pe osi ansenny bann dimoun konman ki zot devret tret lezot. ‘Fer pour lezot sa ki ou ti a kontan lezot i fer pour ou,’ i ti dir. Eski pa ou kontan kan lezot i tret ou byen? Alor, Zezi ti pe dir, ki nou devret tret lezot dimoun byen. Eski pa i pou gou pour viv lo later ler i pou vin en paradi kot tou dimoun pou swiv sa konsey?