OU VWAR sa pizon pe desann lo latet sa zonm? Sa zonm se Zezi. I ti annan 30 an la. E sa zonm ki avek li se Zan. Nou’n deza vwar serten keksoz lo li. Ou mazinen ler Mari ti al vizit son fanmiy Elizabet, sa pti baba dan vant Elizabet ti sote avek lazwa? Sa pti baba ti Zan. Me ki Zan ek Zezi pe fer la?

Zan in fek plonz Zezi dan Larivyer Zourden. Se sa fason ki en dimoun i batize. Pour konmanse sa dimoun i ganny plonze anba delo, apre i ganny retire. Lefe ki Zan ti batiz bann dimoun i ti ganny apele Zan Batizer. Me akoz Zan ti batiz Zezi?

Byen, Zan in fer li akoz Zezi ti vin demann Zan pour batiz li. Zan ti batiz bann dimoun ki ti anvi montre ki zot ti regrete pour sa bann keksoz mal ki zot ti’n fer. Eski Zezi ti’n deza fer keksoz mal ki apre i ti regrete? Non, Zezi pa’n zanmen fer okenn keksoz mal, akoz i ti Garson Bondye e i ti sorti dan lesyel. Alor i ti demann Zan pour batiz li pour en lot rezon. Annou vwar sa rezon.

Avan ki Zezi ti vin kot Zan i ti en sarpantye. En sarpantye i en dimoun ki fer bann keksoz avek dibwa, tel parey latab, sez ek ban. Msye Mari, Zozef, ti en sarpantye, e i ti montre Zezi konman pour fer sarpantye. Zeova pa ti’n anvoy son Garson lo later pour vin en sarpantye. I ti annan en travay spesyal pour fer, e sa letan ti’n arive pour Zezi konmans fer sa travay. Alor pour montre ki i ti’n pare pour fer sa ki son Papa ti’n anvoy li fer, Zezi ti demann Zan pour batiz li. Eski Bondye ti dakor avek sa?

Wi, akoz apre ki Zezi ti sorti dan delo, en lavwa sorti dan lesyel ti dir: ‘Sa i mon Garson, ki mon kontan.’ I sanble ki lesyel ti ouver e sa pizon ti desann lo Zezi. Me i pa ti en vre pizon. I ti parey enn. Ti lespri sen Bondye.

Aprezan, Zezi ti annan en kantite keksoz pour mazin lo la, alor i ti al dan en landrwa trankil pour 40 zour. Laba, Satan ti vin kot li. Trwa fwa Satan ti esey fer Zezi fer bann keksoz ki ti kont lalwa Bondye. Me Zezi pa ti pou fer sa.

Apre sa, Zezi ti retournen e i ti rankontre bann zonm ki ti pou vin son bann premye disip. Zot ti apel Andre, Pyer (ki ti osi apel Simon), Filip ek Natanael (ki ti osi apel Bartelemi). Zezi ansanm avek son bann nouvo disip ti al dan distrik Galile. An Galile, zot ti aret Kana, lavil kot Natanael ti ne. Laba, Zezi ti asiste en gro selebrasyon maryaz, e la i ti fer son premye mirak. Ou konnen ki sa mirak ki i ti fer? I ti fer delo vin diven.