ZEZI ti vwayaz partou dan pei e i ti geri bann dimoun malad. Partou dan bann vilaz ek lavil dimoun ti tande ki Zezi ti pe fer bann mirak. Alor bann dimoun ti anmenn kot li bann ki pa ti kapab marse, ki pa ti vwar kler, ki ti sourd ek en kantite lezot ankor ki ti malad. Zezi ti geri zot.

Trwa an ti’n pase depi ki Zan ti’n batiz Zezi. E Zezi ti dir avek son bann disip ki tre byento i pou al Zerizalenm, kot i pou ganny touye, e apre leve dan lanmor. Antretan, Zezi ti kontinyen geri bann ki ti malad.

En zour Saba, Zezi ti pe ansennyen. Saba ti en zour kot bann Zwif ti repoze. Sa madanm ki ou vwar la i vreman malad. Pour 18 an i’n reste kourbe, e i pa’n kapab debout drwat. Alor Zezi ti met son lanmen lo li, e i ti debout drwat. I ti’n geri!

Sa ti fer bann sef relizye vreman ankoler. Enn parmi zot ti kriy avek lafoul:‘I annan sis zour ki nou devret travay.Vin sa bann zour pour zot ganny geri, me pa zour Saba!’

Me Zezi ti reponn: ‘Bann move zonm. Sakenn parmi zot, zot delarg zot bef oubyen zot bourik zour Saba pour anmenn bwar. Eski sa pov madanm, ki’n malad pour 18 an pa devret ganny geri zour Saba?’ Larepons Zezi ti fer sa bann zonm kanmi.

Plitar Zezi ek son bann zapot ti al Zerizalenm. Kan zot ti an deor lavil Zeriko, de zonm ki pa ti vwar kler ti tande ki Zezi ti pe pase. Alor zot ti kriye: ‘Zezi, ed nou!’

Zezi ti apel sa de zonm e i ti demann zot: ‘Ki zot oule mon fer pour zot?’ Zot ti reponn: ‘Senyer, fer nou vwar kler.’ Zezi ti tous zot lizye, e deswit zot ti kapab vwar kler! Eski ou konnen akoz Zezi ti fer sa bann mirak merveye? Akoz i ti kontan bann dimoun e i ti oule ki zot annan lafwa dan li. Alor nou kapab asire ki ler i pou dirize konman lerwa pou napa personn lo later ki pou malad ankor.