EN KEKSOZ terib in arive. Zan Batis fek ganny touye. Erodya, madanm lerwa, pa ti kontan li. E i ti nobou fer lerwa fer solda koup latet Zan.

Kan Zezi ti antann sa, i ti vreman tris. I ti al dan en landrwa dezer. Me bann dimoun ti swiv li. Kan Zezi ti vwar sa lafoul dimoun, i ti pran pitye pour zot. Alor i ti koz avek zot lo rwayonm Bondye, e i ti geri bann ki ti malad.

Ler fernwanr ti pe fer son bann disip ti vin kot li e zot ti dir li: ‘I deza tar, e sa landrwa i dezer. Fer bann dimoun ale pour zot kapab al dan bann vilaz e aste manze.’

‘Pa neseser ki nou fer zot ale,’ Zezi ti reponn. ‘Zot menm donn sa bann dimoun keksoz pour manze.’ Zezi ti demann Filip: ‘Kote nou pou ganny dekwa manze pour nouri sa gran lafoul dimoun?’

‘I pou kout en kantite kantite larzan pour aste dekwa manze afen ki tou dimoun i kapab ganny en pti gin,’ Filip ti reponn. Andre ti dir: ‘Sa pti garson, ki pe anmenn nou manze, i annan selman senk dipen ek de pwason. Me i pa pou ase pour sa lafoul dimoun.’

‘Dir avek bann dimoun asiz lo zerb,’ Zezi ti dir. Apre i ti remersye Bondye pour sa manze, e i ti konmans kas sa senk dipen an morso. Apre, bann disip ti donn sa lafoul dimoun sa bann dipen ek pwason. Ti annan 5,000 zonm, e plizyer milye madanm ek zanfan. Zot tou zot ti manze ziska ki zot vant ti plen. E kan bann disip ti anmas sa ki ti’n reste, ti annan douz pannyen plen!

Zezi ti fer son bann disip anbark lo en bato pour travers Lanmer Galile. Pandan lannwit ti annan en gro divan, e bato ti balote avek laroul. Bann disip ti vreman per. Apre, dan milye lannwit, zot ti vwar en dimoun pe marse lo delo pe vin kot zot. Zot ti kriye avek lafreyer, akoz zot pa ti konnen lekel ki ti pe vini.

‘Pa bezwen per,’ Zezi ti dir. ‘Mwan sa!’ Zot pa ti krwar. Alor Pyer ti dir: ‘Si se vreman ou, Senyer, dir mwan mars lo delo pour vin kot ou.’ Zezi ti reponn: ‘Vini!’ E Pyer ti sorti dan bato e mars lo delo! Apre i ti konmans per e i ti konmans anfonse, me Zezi ti sov li.

Plitar, Zezi ti ankor enn fwa nouri en kantite dimoun. Safwasi avek set dipen ek en pti gin pwason. E ankor enn fwa tou dimoun ti manze ziska zot vant ti plen. Eski pa nou vreman kontan pour vwar konman ki Zezi i pran swen avek bann dimoun? Kan i pou dirize konman lerwa nou pa pou mank nanryen!