DAN sa portre ou kapab vwar ki Zezi i vreman ankoler, pa i vre? Eski ou konnen akoz i ti ankoler? Akoz sa bann zonm ki ti kot tanp an Zerizalenm ti vreman voras. Zot ti pe esey fer profi lo bann dimoun ki vin la dan tanp pour ador Bondye.

Eski ou vwar tou sa bann zenn toro, mouton ek bann pizon? Byen, sa bann zonm pe vann sa bann zannimo la dan tanp. Eski ou konnen akoz? Akoz bann Izraelit ti bezwen sa bann zannimo ek bann zwazo pour ofer avek Bondye.

Lalwa Bondye ti dir ki kan en Izraelit ti fer en keksoz mal, i ti devret ofer Bondye en kado. E ti annan lezot moman osi ki bann Izraelit ti bezwen ofer bann kado. Me kote ki en Izraelit ti pou ganny bann zwazo ek bann zannimo pour ofer Bondye?

Serten Izraelit ti annan bann zwazo ek bann zannimo. Alor zot ti kapab ofer zot. Me ti annan en kantite Izraelit ki ti napa zannimo ek zwazo. E lezot ti reste lwen avek Zerizalenm, alor zot pa ti kapab anmenn en zannimo kot tanp. Alor bann dimoun ti vin la e zot ti aste bann zannimo oubyen bann zwazo ki zot ti bezwen. Me sa bann zonm ti pe vann sa bann zannimo tro ser. Zot ti pe vol bann dimoun. Deplis, zot pa ti devret pe vann bann zannimo la dan tanp Bondye.

Se sa ki ti fer Zezi ankoler. Alor i ti savir zot latab ek larzan ki ti lo la. I ti pran en lakord e i ti fwet bann zannimo e fer zot sorti dan tanp. I ti dir avek sa bann zonm ki ti pe vann bann pizon: ‘Tir sa bann zafer la! Aret fer lakaz mon Papa en landrwa pour profi.’

Serten bann disip Zezi ti la avek li dan tanp. Zot ti sirprann pour vwar Zezi fer sa. Apre sa, zot ti mazin sa landrwa dan Labib kot i dir sa lo Garson Bondye: ‘Lanmour pour lakaz Bondye pou brile dan li parey en dife.’

Pandan ki i ti la an Zerizalenm pe esper lafet Pak, Zezi ti fer en kantite mirak. Apre sa, i ti kit Zida e i ti konmans fer son vwayaz e retourn an Galile. Me pandan ki i ti lo semen pe al Galile i ti al dan en distrik ki ti apel Samari. Annou vwar ki ti arive laba.