Trwazyenm zour apre ki Zezi ti’n mor, i ti leve dan lanmor. Sa zour i ti aparet avek son bann disip dan senk diferan lokazyon. Zezi ti kontinyen aparet avek zot pour karant zour. Apre, anmezir ki son bann disip ti pe gete, Zezi ti mont dan lesyel. Dis zour plitar, Bondye ti fer lespri sen desann lo bann disip Zezi ki ti pe espere an Zerizalenm.

Plitar, bann lennmi Zezi ti met bann zapot dan prizon, me en lanz ti sov zot. Bann dimoun ki pa ti kontan bann disip ti saboul Etyenn avek ros ziska ki i ti mor. Me nou pou aprann konman ki Zezi ti swazir enn sa bann dimoun pour vin son serviter spesyal, e i ti vin zapot Pol. Apre trwa an edmi ki Zezi ti’n mor, Bondye ti anvoy zapot Pyer pres avek Korney ek son fanmiy, zot pa ti bann Zwif.

Trez an apre, Pol ti fer son premye vwayaz pour li al koz lo rwayonm Bondye. Lo son dezyenm vwayaz Timote ti al avek li. Nou pou aprann konman Pol ek son zanmi ti annan en kantite moman eksitan letan zot ti pe servi Bondye. Finalman, Pol ti ganny met dan prizon an Ronm. De an plitar i ti ganny large, me apre i ti ganny met dan prizon ankor e ganny touye. Dan setyenm parti nou pou vwar listwar pour 32 lannen.