ESKI ou konnen lekel sa madanm ek sa de zonm ki la? Sa madanm i apel Mari Madlenn. I ti en zanmi Zezi. E sa de zonm ki dan lenz blan i de lanz. Sa pti lasanm ki Mari pe get ladan i sa landrwa kot lekor Zezi ti ganny mete apre ki i ti’n mor. I apel en tonbo. Me aprezan lekor Zezi nepli la! Lekel ki’n pran li? Annou vwar.

Apre ki Zezi ti’n mor, bann pret ti dir avek Pilat: ‘Kan Zezi ti ankor vivan i ti dir ki i pou leve son trwazyenm zour. Alor donn lord bann solda pour vey sa tonbo. Son bann disip pa pou kapab vol son lekor e dir ki i’n leve dan lanmor!’ Pilat ti dir avek bann pret anvoy bann solda vey sa tonbo.

Me granmaten son trwazyenm zour apre ki Zezi ti’n mor, en lanz Zeova ti aparet. I ti roul sa ros. Bann solda ti telman per ki zot pa ti kapab bouze. Finalman, kan zot ti get dan tonbo, sa lekor ti nepli la! Serten bann solda ti al dan lavil e rakont bann pret. Eski ou konnen ki sa bann move pret ti fer? Zot ti pey bann solda pour koz lalang. Bann pret ti dir avek bann solda: ‘Dir ki bann disip ti vini dan lannwit pandan ki nou ti pe dormi, e vol sa lekor.’

Antretan, serten bann madanm ki ti zanmi Zezi ti vizit sa tonbo. Zot ti sirprann pour vwar tonbo vid. Deswit de lanz dan lenz klate ti aparet. ‘Akoz zot pe rod Zezi la?’ sa de lanz ti demande. ‘I’n leve. Ale vitman e rakont son bann disip.’ Sa bann madanm ti tay vit. Me dan semen en zonm ti aret zot. Ou konnen lekel sa zonm? Ti Zezi! ‘Ale rakont mon bann disip,’ i ti dir.

Kan bann madanm ti rakont bann disip ki Zezi ti vivan e ki zot ti’n vwar li, bann disip pa ti oule krwar. Pyer ek Zan ti taye ziska kot tonbo pour vwar pour zot menm, me tonbo ti vid! Kan Pyer ek Zan ti ale, Mari Madlenn ti reste. Sa se kan i ti get anndan e vwar sa de lanz.

Eski ou konnen ki ti’n arive avek lekor Zezi? Bondye ti’n fer li disparet. Bondye pa ti fer Zezi lev dan sa lekor zonm dan ki i ti mor. I ti donn Zezi en nouvo lekor spirityel parey bann lanz dan lesyel i annan. Me pour montre son bann disip ki i ti vivan, Zezi ti kapab pran en lekor ki dimoun ti kapab vwar, parey nou pou aprann dan lot zistwar.