KI OU vwar la? Wi, bann larme lo seval blan. Me get byen kote ki zot sorti. Bann seval pe galope sorti dan lesyel lo bann nyaz! Eski i vreman annan seval dan lesyel?

Non, zot pa bann vre seval. Bann seval pa kapab galop lo nyaz, pa i vre? Me Labib i koz lo bann seval dan lesyel. Eski ou konnen akoz?

Akoz lontan bann seval ti ganny servi en kantite dan lager. Alor, Labib i koz lo bann dimoun ki mont seval sorti dan lesyel pour montre ki Bondye pou lager avek bann dimoun lo later. Eski ou konnen kote sa lager pour deroule? Dan en landrwa ki apel Armagedon. Sa lager pou detrir tou move keksoz lo later.

Zezi i sa Enn ki pou ansarz sa lager kot Armagedon. Mazinen, Zezi i sa enn ki Zeova in swazir pour vin lerwa Son gouvernman. Se pour sa rezon ki i annan en kouronn lo son latet. E sa sab i montre ki i pou touy tou lennmi Bondye. Lefe ki nou konnen ki Bondye pou detri tou move dimoun, eski sa i devret sirprann nou?

Get zistwar 10. Ki ou vwar la? Wi, sa gran deliz ki ti detri tou move dimoun. Lekel ki ti fer sa deliz? Zeova Bondye. Aprezan get zistwar 15. Ki pe arive la? Sodonm ek Gomor pe ganny detrir par dife ki Zeova ti anvoye.

Vir lo zistwar 33. Gete ki pe arive avek bann seval ek saret lager bann Ezipsyen. Lekel ki ti fer zot noye? Zeova. I ti fer sa pour protez son pep. Get zistwar 76. Ou pou vwar ki Zeova ti menm les son pep, bann Izraelit, ganny detrir akoz zot ti move.

Alor, nou pa merit sirprann ki Zeova pou anvoy son larme ki sorti dan lesyel pour met en lafen avek bann move keksoz lo later. Me zis mazinen ki sa pou vedir! Vir paz e annou vwar.