1, 2. Ki bokou dimoun i demande?

 EN TSOUNAMI i detri en vilaz. En msye i fiziye dimoun dan en legliz, i bles e touy en kantite dimoun. Kanser i pran lavi en manman ki annan senk zanfan.

² Ler bann dezas oubyen maler koumsa i arive, bokou dimoun i demande, “Akoz?” Bokou dimoun i anvi konnen akoz lemonn i ranpli avek laenn ek soufrans. Eski ou’n deza demann ou lekor sa kestyon?

3, 4. (a) Ki kestyon Abakouk ti demande? (b) Ki mannyer Zeova ti reponn li?

³ Dan Labib, nou aprann ki bann dimoun ki ti annan en lafwa solid dan Bondye ti osi demann bann kestyon en pe parey. Par egzanp, profet Abakouk ti demann Zeova: “Akoz ou fer mwan war lemal, e ou regar i kontinyen reste lo lenzistis? Otour mwan, i annan zis ravaz ek vyolans. Partou i annan zis kerel ek dispit.”​—Abakouk 1:3.

⁴ Dan Abakouk 2:2, 3 nou kapab vwar larepons ki Zeova ti donn Abakouk ek Son promes pour aranz sa sityasyon. Zeova i kontan son pep en kantite. Labib i dir: “I enterese avek zot.” (1 Pyer 5:7) Anfet, Bondye i pli ay soufrans ki nou. (Izai 55:8, 9) Alor, annou vwar akoz i sitan annan en kantite soufrans dan lemonn?

5. Ki bokou sef relizye i dir konsernan soufrans? Ki Labib i dir?

⁵ Souvan bann pret, paster ek sef relizye i dir ki i lavolonte Bondye ki dimoun i soufer. Serten i dir ki Bondye in fini desid tou keksoz ki arive avek en dimoun, enkli maler e nou pa pou zanmen kapab konpran akoz sa bann keksoz i arive. Lezot i menm dir ki bann dimoun, enkli bann pti zanfan, i mor pour ki zot kapab al viv dan lesyel avek Bondye. Me sa pa vre. Zeova pa zanmen fer bann move keksoz arive. Labib i dir: “I pa kestyon ki Bondye i komet lemal. I pa posib ki Bondye liniver i fer sa ki mal.”​—Zob 34:10.

6. Akoz bokou dimoun i blanm Bondye pour tou sa soufrans dan lemonn?

⁶ Bokou dimoun i blanm Bondye pour tou sa soufrans ki i annan dan lemonn akoz zot krwar ki se Bondye ki diriz lemonn. Me parey nou ti vwar dan Sapit 3, se Satan ki pe vreman diriz lemonn.

7, 8. Akoz i sitan annan en kantite soufrans dan lemonn?

⁷ Labib i dir nou ki “lemonn antye i anba kontrol Satan.” (1 Zan 5:19) Satan, sa enn ki pe diriz lemonn, i visye e kriyel. I “pe anbet dimoun lo later antye.” (Revelasyon 12:9) Bokou dimoun i fer parey Satan. Sa i zis en rezon akoz lemonn i ranpli avek mansonz, laenn ek kriyote.

⁸ I annan lezot rezon akoz i sitan annan soufrans dan lemonn. Apre ki Adan ek Ev ti rebel kont Bondye, zot ti transmet pese avek zot zanfan. Vi ki dimoun i fer pese, zot osi fer lezot soufer. Souvan zot anvi vin pli enportan ki lezot. Zot lager avek  kanmarad, bann nasyon i lager avek kanmarad e zot fer lezot dimoun pas martir. (Eklezyast 4:1; 8:9) Par ler serten i soufer akoz “letan ek levennman san ekspekte i ariv lo” tou dimoun. (Eklezyast 9:11, NWT) Sa i kapab akoz par azar zot dan en landrwa kot en maler i arive.

9. Akoz nou kapab asire ki Zeova i annan en bon rezon pour permet soufrans pour kontinyen?

⁹ Ler dimoun i soufer, i pa zanmen lafot Zeova. Nou pa devret blanm li pour lager, krim ek bann maler ki arive. Pa Bondye ki responsab pour bann dezas natirel tel parey tranblemandter, siklonn ek linondasyon. Me kantmenm sa, ou kapab demann ou lekor, ‘Akoz Zeova pa anpes sa bann move keksoz arive si se li ki pli pwisan dan liniver?’ Nou konnen ki Bondye i vreman kontan nou, alor i bezwen annan en bon rezon akoz i permet soufrans pour kontinyen.​—1 Zan 4:8.

10. Ki Satan ti dir lo Zeova?

¹⁰ Dan zarden Edenn, Dyab ti anbet Adan ek Ev. Satan ti dir ki Bondye i en move Dirizan. I ti dir ki Bondye pe priv Adan ek Ev bann bon keksoz. Satan ti oule ki zot krwar ki i ti pou en pli bon dirizan ki Zeova e ki zot pa ti bezwen Bondye.​—Zenez 3:2-5; vwar Lezot lenformasyon nimero 27.

11. Ki kestyon nou bezwen reponn?

¹¹ Adan ek Ev ti dezobei Zeova e rebel kont li. Zot ti krwar ki zot ti annan drwa desid pour zot menm sa ki byen ek sa ki mal. Ki mannyer Zeova ti kapab  prouve ki bann rebel ti mal e ki i pli konnen kwa ki bon pour nou?

12, 13. (a) Akoz Zeova pa ti touy bann rebel deswit? (b) Akoz Zeova in permet Satan pour diriz sa lemonn e i’n permet bann imen pour gouvern zot lekor?

¹² Zeova pa ti touy Adan ek Ev deswit. Plito, i ti les zot fer zanfan. Apre Zeova ti permet bann zanfan Adan ek Ev swazir lekel ki zot ti oule diriz zot. I ti dan plan Zeova ki later antye i ranpli avek bann dimoun parfe. Son plan ti pou ganny akonplir malgre tou sa ki Dyab i esey fer pour anpes sa arive.​—Zenez 1:28; Izai 55:10, 11.

¹³ Satan ti akiz Zeova devan plizyer milyon lanz. (Zob 38:7; Danyel 7:10) Alor Zeova ti donn Satan letan pour esey prouve ki son lakizasyon ti vre. I ti osi donn bann imen letan pour fer zot prop gouvernman anba gidans Satan pour montre si zot ti kapab reisi diriz zot prop lekor san led Bondye.

14. Kwa ki’n ganny prouve la ki letan in pase?

¹⁴ Pour plizyer milye lannen, bann imen in esey diriz zot lekor, me zot pa’n reisi. Sa i prouve ki Satan in koz manti. Bann imen i bezwen led Bondye. Profet Zeremi ti annan rezon ler i ti dir: “O Zeova, mon konnen ki en dimoun pa kapab deside ki semen i pou swiv. Menm en dimoun ki pe marse pa kapab deside kote i pou met son lipye.”​—Zeremi 10:23, NWT.

15, 16. (a) Akoz Zeova in permet soufrans kontinyen pour tou sa letan? (b) Akoz Zeova pa’n rezourd bann problenm ki Satan in fer?

¹⁵ Akoz Zeova in permet soufrans kontinyen pour  tou sa letan? Akoz i pa anpes bann move keksoz arive? Parski i’n pran letan pour prouve ki fason ki Satan i dirize pa bon. Bann imen in esey tou sort kalite gouvernman, me ni enn pa’n marse. Menm si zot in fer progre dan lasyans ek teknolozi, i annan plis lenzistis, lapovrete, krim ek lager ki zanmen oparavan. Nou pa kapab reisi diriz nou prop lekor san led Bondye.

¹⁶ Par kont, Zeova pa’n rezourd bann problenm ki Satan in fer. Si i ti fer sa, sa ti pou konmsi Bondye i siport dominasyon Satan e I pa pou zanmen fer sa. Deplis, bann imen ti pou krwar ki zot kapab reisi diriz zot prop lekor. Me sa pa vre e Zeova pa ti pou siport sa osi. I pa zanmen koz manti.​—Ebre 6:18.

17, 18. Ki Zeova pou fer konsernan tou sa domaz ki Satan in fer?

¹⁷ Eski Zeova i kapab repar tou sa domaz ki Satan ek bann imen in fer ler zot in rebel kont li? Wi. Pour Bondye, tou keksoz i posib. Zeova i konnen ki kantite letan ki neseser pour prouve ki bann lakizasyon Satan i fo. Apre sa, i pou fer later vin en paradi, parey i ti sipoze ete. Tou bann ki dan “latonm” pou ganny resisite. (Zan 5:28, 29) Dimoun pa pou zanmen tonm malad e mor. Zezi pou retir tou domaz ki Satan in fer. Zeova pou servi Zezi pour “elimin lemal ki Dyab in fer.” (1 Zan 3:8) Nou apresye ki antretan Zeova in demontre pasyans anver nou pour ki nou kapab aprann konn li e swazir li konman nou Dirizan. (Lir 2 Pyer 3:9, 10.) Menm ler nou soufer, i ed nou andire.​—Zan 4:23; lir 1 Korentyen 10:13.

¹⁸ Zeova pa fors nou pour servi li. I’n donn bann  imen liberte pour swazir. Annou vwar ki mannyer nou kapab servi nou liberte pour swazir.

19. Ki zoli kado Zeova in donn nou? Akoz nou devret apresye sa kado?

¹⁹ Nou vreman diferan avek bann zannimo akoz Zeova in donn nou en zoli kado, setadir sa liberte pour swazir. Laplipar ditan bann zannimo i azir dapre zot lensten, me nou nou kapab swazir ki mannyer nou anvi viv nou lavi e deside si nou anvi fer plezir Zeova ouswa non. (Proverb 30:24, NWT) Deplis, nou pa parey bann masin ki zis fer sa ki zot in ganny envante pour fer. Nou nou annan sa liberte pour fer bann desizyon konsernan ki kalite dimoun nou anvi vini, lekel ki nou anvi zanmi avek e ki nou anvi fer avek nou lavi. Zeova i anvi ki nou ere.

20, 21. Ki sa pli bon desizyon ki ou kapab fer la konmela?

²⁰ Zeova i oule ki nou kontan li. (Matye 22:37, 38) I parey en papa ki kontan ler son zanfan i dir li avek tou son leker, “Mon kontan ou Dadi” me pa akoz i ganny forse. Zeova ti donn nou liberte pour swazir si nou anvi servi li oubyen non. Satan, Adan ek Ev ti swazir pour rezet Zeova. Ki mannyer ou ou pou servi sa kado?

²¹ Servi ou liberte pour swazir pour servi Zeova. I annan plizyer milyon lezot ki’n deside pour fer plezir Bondye e rezet Satan. (Proverb 27:11) Ki ou kapab fer la konmela pour fer sir ki ou dan nouvo lemonn Bondye ler i retir tou soufrans? Nou pou reponn sa kestyon dan Sapit 12.