1-3. Kwa ki parey en prizon? Ki Zeova pou fer pour ed nou?

FER krwar ou’n ganny kondannen lavi prizon pour en krim ki ou pa’n komet. Napa okenn sans ki ou pou ganny large. Ou napa okenn lespwar pour lavenir e napa nanryen ki ou kapab fer pour sanz sa sityasyon. Me zis ler ou’n perdi tou lespwar, ou zwenn en dimoun ki kapab ed ou e i promet ki i pou ed ou! Ki mannyer ou ti pou santi?

² Lanmor i parey en prizon. Nou pa kapab fer nanryen pour sap lanmor. Me Zeova i kapab anpes nou mor. An plis, i’n promet ki “dernyen lennmi, lanmor, pou ganny detrir.”​—1 Korentyen 15:26.

³ Zis mazin soulazman ki ou pou gannyen ler ou pa pou bezwen enkyet ki en zour ou pou mor! Me Zeova pa pou zis met en lafen avek lanmor. I pou osi redonn lavi bann ki’n deza mor. Zis mazinen ki sa pou vedir pour ou. Zeova i promet pour “redonn lavi bann ki’n mor.” (Izai 26:19) Sanmenm sa ki Labib i apel rezireksyon.

4. (a) Kwa ki kapab konsol nou ler en dimoun dan nou fanmir ouswa en zanmi i mor? (b) Nonm serten parmi bann bon zanmi Zezi.

⁴ Ler en dimoun dan nou fanmir ouswa enn nou bon zanmi i mor, douler ek sagrinasyon i  kapab paret tro bokou pour siporte. Nou santi nou dezespere. Napa nanryen ki nou kapab fer pour sa dimoun viv ankor. Me lespwar ki Labib i donn nou i vreman rekonfortan. (Lir 2 Korentyen 1:3, 4.) Annou vwar en legzanp ki montre ki kantite Zeova ek Zezi i vreman anvi ki bann dimoun mor i reganny lavi. Ler Zezi ti lo later, i ti abitye vizit Lazar ek son de ser, Mart ek Mari. Zot tou le trwa zot ti bann bon zanmi Zezi. Labib i dir: “Zezi ti kontan Mart, son ser ek Lazar.” Me en zour Lazar ti mor.​—Zan 11:3-5.

5, 6. (a) Ki Zezi ti fer ler i ti vwar fanmir ek zanmi Lazar pe plere? (b) Akoz i rekonfortan pour konnen ki mannyer Zezi ti santi lo lanmor?

⁵ Zezi ti al konsol Mart ek Mari. Ler Mart ti tande ki Zezi ti pe vini, i ti al zwenn li an deor lavil. I ti kontan pour vwar Zezi, me i ti dir li: “Senyer, si ou ti la, mon frer pa ti pou’n mor.” Mart ti krwar ki Zezi ti’n vin tro tar. Apre sa, Zezi ti vwar Mari, ser Mart, pe plere. Ler Zezi ti vwar zot sagrinasyon, son leker ti fermal e li osi i ti plere. (Zan 11:21, 33, 35) I ti santi sa menm douler ki nou santi ler nou perdi en dimoun ki nou kontan.

⁶ I rekonfortan pour konnen ki Zezi i santi parey nou lo lanmor. I osi rekonfortan pour konnen ki Zezi i santi parey son Papa. (Zan 14:9) Zeova i kapab met en lafen avek lanmor pour touzour e sanmenm sa ki i pou fer tre byento.

7, 8. Akoz Mart pa ti anvi ki zot tir sa ros devan latonm Lazar, me ki Zezi ti fer?

⁷ Ler Zezi ti ariv kot sa latonm kot zot ti’n met  lekor Lazar, i ti vwar ki zot ti’n ferm larantre sa latonm avek en gro ros. Zezi ti dir: “Tir sa ros.” Me Mart pa ti oule ki zot fer sa. Lekor Lazar ti’n deza dan latonm depi kat zour. (Zan 11:39) I pa ti konnen ki Zezi ti pe al fer pour ed son frer.

⁸ Zezi ti dir Lazar: “Sorti!” Sa ki Mart ek Mari ti vwar apre sa ti ekstraordiner. “Sa zonm ki ti’n mor ti sorti. Son lipye ek son lanmen ti’n anvlope dan bann bout latwal.” (Zan 11:43, 44) Lazar ti vivan! I ti rezwenn son fanmir ek zanmi. Zot ti kapab may li, tous li e koz avek li. Pa sa ti en mirak! Zezi ti’n resisit Lazar.

9, 10. (a) Lekel ki ti donn Zezi sa pouvwar pour resisit dimoun? (b) Akoz bann resi konsernan rezireksyon i vreman enportan pour nou?

⁹ Eski Zezi ti servi son prop pouvwar pour resisit dimoun? Non. Avan ki Zezi ti resisit Lazar, i ti priy Zeova e Zeova ti donn li sa pouvwar pour resisit Lazar. (Lir Zan 11:41, 42.) Me i annan lezot dimoun ki ti ganny resisite osi. Labib i koz lo en pti fiy ki ti byen malad. I ti annan zis 12 an. Son papa Zairis ti’n perdi lespwar e i ti sipliy Zezi pour geri li. I ti son sel zanfan. O menm moman ki i ti pe koz avek Zezi, serten zonm ti vin dir li: “Ou fiy in mor! I pa neseser deranz Ansenyan plis ki sa, non?” Me Zezi ti dir Zairis: “Pa bezwen per, zis annan lafwa e i pou ganny sove.” Apre, zot de Zairis ti marse ziska kot son lakour. Ler zot ti pros pour arive, Zezi ti kapab  vwar e tann dimoun pe plere. Zezi ti dir zot: “Aret plere parski i pa’n mor me i pe dormi.” I bezwen ki papa ek manman sa pti fiy ti demann zot lekor ki Zezi ti pe sey dir. Zezi ti demann tou dimoun pour sorti e i ti al avek papa ek manman sa pti fiy dan lansanm kot i ti ete. Zezi ti pran son lanmen e dir li: “Pti fiy, mon dir ou, leve!” Zis mazinen ki kantite son paran ti kontan ler deswit i ti leve e konmans marse! Zezi ti’n resisit zot pti fiy. (Mark 5:22-24, 35-42; Lik 8:49-56) Depi sa zour, sak fwa ki zot ti vwar zot pti fiy, zot ti rapel sa ki Zeova ti’n fer pour zot gras a Zezi. *

¹⁰ Bann dimoun ki Zezi ti resisite ti mor pli tar. Me sa ki nou lir konsernan sa bann dimoun i enportan parski i donn nou en vre lespwar. Zeova i anvi resisit dimoun e i pou fer li.

11. Ki Eklezyast 9:5 i ed nou konpran lo Lazar?

¹¹ Labib i klerman dir ki “bann mor pa konn nanryen.” Sanmenm sa ki ti’n arive avek Lazar. (Eklezyast 9:5) Zis parey Zezi ti dir, i ti konmsi Lazar ti pe dormi. (Zan 11:11) Ler Lazar ti dan latonm, i ‘pa ti konn nanryen.’

12. Ki mannyer nou konnen ki Lazar ti vreman ganny resisite?

¹² Bokou dimoun ti vwar Zezi ler i ti resisit Lazar.  Menm bann lennmi Zezi ti konnen ki i ti’n fer sa mirak. Lazar ti vivan e sa ti prouve ki i ti’n vreman ganny resisite. (Zan 11:47) An plis ki sa, bokou dimoun ti al vizit Lazar e bokou ti konmans krwar ki Bondye ti’n anvoy Zezi. Bann lennmi Zezi pa ti kontan sa, alor zot ti plàn pour touy tou le de Zezi ek Lazar.​—Zan 11:53; 12:9-11.

13. Akoz nou asire ki Zeova pou kapab resisit bann dimoun mor?

¹³ Zezi ti dir ki “tou bann ki dan latonm” pou ganny resisite. (Zan 5:28) Tou bann ki dan memwar Zeova pou reganny lavi. Me pour Zeova kapab resisit en dimoun, i bezwen rapel tou keksoz lo sa dimoun. Eski i vreman kapab fer sa? Zis mazinen, i annan plizyer bilyon zetwal dan liniver. Labib i dir ki Zeova i konn non tou sa bann zetwal. (Lir Izai 40:26.) Si i kapab rapel non sak zetwal, sirman i kapab fasilman rapel tou keksoz lo bann ki i pou resisite. Pli enportan ankor, Zeova ti kree tou keksoz, alor nou konnen ki i annan sa pwisans pour resisit bann dimoun.

14, 15. Ki parol Zob i ansenny nou lo rezireksyon?

¹⁴ Zob ti en zonm fidel ki ti krwar dan rezireksyon. I ti demande: ‘Eski en dimoun mor i kapab reviv?’ Apre i ti dir avek Zeova: “Ou ava apel mwan e mon ava reponn ou. Ou [“pou vreman anvi vwar sa enn ki,” NWT] ou’n kree.” Zob ti konnen ki Zeova i vreman enpasyan pour resisit bann dimoun mor.​—Zob 14:13-15.

¹⁵ Ki mannyer sa promes lo rezireksyon i fer ou  santi? Petet ou pe demann ou lekor, ‘Eski mon fanmir ek zanmi ki’n mor pou resisite?’ I rekonfort nou pour konnen ki Zeova i vreman anvi resisit bann dimoun ki’n mor. Annou vwar ki Labib i dir konsernan kote zot pou viv e lekel ki pou ganny resisite.

16. Ki mannyer lavi pou ete lo later ler bann dimoun i resisite?

¹⁶ Dan lepase, bann dimoun ki ti ganny resisite ti viv avek zot fanmir ek zanmi lo later. Sanmenm sa ki pou arive a lavenir, me i pou bokou pli gou. Akoz? Parski bann dimoun ki pou resisite lo later pou annan sa loportinite pour viv pour touzour e pa zanmen mor ankor. An plis, zot pou viv dan en lemonn ki totalman diferan avek sa lemonn ozordi. I pou napa ni lager, ni krim, ni maladi.

17. Lekel ki pou ganny resisite?

¹⁷ Lekel ki pou ganny resisite? Zezi ti dir ki “tou bann ki dan latonm pou tann son lavwa e zot pou resisite.” (Zan 5:28, 29) Revelasyon 20:13 osi i dir: “Lanmer ti rann bann mor ki ti dan li, lanmor ek Latonm ti rann bann mor ki ti dan zot.” Zis mazinen, plizyer bilyon dimoun pou reganny lavi. Zapot Pol ti dir ki tou “dimoun bon konman move” pou resisite. (Lir Akt 24:15.) Ki sa i vedir?

18. Lekel sa bann ‘bon dimoun’ ki pou ganny resisite?

¹⁸ “Dimoun bon” i enkli bann serviter fidel Zeova ki ti viv avan ki Zezi ti vin lo later. Par egzanp, Noe, Abraam, Sara, Moiz, Rit ek Ester pou resisite  pour viv lo later. Ebre sapit 11 i koz lo serten sa bann dimoun. Me ki pou arive avek bann serviter fidel Zeova ki mor dan nou letan? Zot osi zot bann ‘bon dimoun,’ alor zot pou ganny resisite.

19. Lekel sa bann ‘move dimoun’ ki pou ganny resisite? Ki loportinite Zeova pou donn zot?

¹⁹ Bann ‘move dimoun’ i enkli sa plizyer bilyon  dimoun ki pa ti ganny sa loportinite pour konn Zeova avan zot mor. Kantmenm sa, Zeova pa’n oubliy zot. I pou resisit zot e zot pou ganny sa loportinite pour aprann konn li e servi li.

20. Akoz pa tou dimoun ki pou ganny resisite?

²⁰ Eski sa i vedir ki tou dimoun ki’n mor pou ganny resisite? Non. Zezi ti dir ki serten dimoun pa pou reganny lavi. (Lik 12:5) Lekel ki pou deside si en dimoun pou ganny resisite ouswa non? Zeova i sa Ziz siprenm me i’n donn Zezi lotorite “pour ziz bann vivan ek bann mor.” (Akt 10:42) Dimoun ki ganny zize konman bann move dimoun ki pa oule repantir oubyen sanze pa pou ganny resisite.​—Vwar Lezot lenformasyon nimero 19.

21, 22. (a) Ki savedir ganny resisite pour al viv dan lesyel? (b) Lekel sa premye dimoun ki ti resisite pour al viv dan lesyel?

²¹ Labib i osi dir nou ki serten dimoun pou al viv dan lesyel. Ler en dimoun i ganny resisite pour al viv dan lesyel, i pa reganny lavi konman en imen avek en lekor imen. I ganny resisite pour al viv dan lesyel konman en lespri.

²² Zezi ti sa premye dimoun ki ti resisite pour al viv dan lesyel. (Zan 3:13) Zeova ti resisit Zezi trwa zour apre ki i ti’n ganny touye. (Psonm 16:10; Akt 13:34, 35) Zezi pa ti resisit avek en lekor imen. Zapot Pyer i eksplike ki Zezi “ti ganny met amor konman en imen me i ti reganny lavi konman en lespri.” (1 Pyer 3:18) Zezi ti resisite e vin en lespri  pwisan! (1 Korentyen 15:3-6) Me Labib i dir ki i ti pou annan lezot ki pou resisite pour al dan lesyel.

23, 24. Lekel sa “pti troupo” ki Zezi ti koz lo la e konbyen zot i pou annan?

²³ Zis avan Zezi ti mor, i ti dir son bann disip fidel: “Mon pe ale pour prepar en plas pour zot.” (Zan 14:2) Sa i vedir ki serten son bann disip ti pou resisite pour viv avek li dan lesyel. Konbyen zot ki ti pou al dan lesyel? Zezi ti dir ki i ti pou napa bokou zot, zot ti pou en “pti troupo.” (Lik 12:32) Zapot Zan ti donn sa sif egzakt ler i ti dir ki i ti vwar Zezi “pe debout lo Montanny Siyon [dan lesyel] e avek li, i ti annan 144,000.”​—Revelasyon 14:1.

²⁴ Kan ki sa 144,000 Kretyen ti pou ganny resisite? Labib i dir ki sa ti pou arive apre ki Kris i konmans dirize dan lesyel. (1 Korentyen 15:23) Ozordi nou pe viv dan sa letan e laplipar sa 144,000 in fini ganny resisite dan lesyel. Bann ki ankor lo later e ki mor dan nou letan pou ganny resisite osito pour al viv dan lesyel. Par kont, laplipar dimoun ki pou ganny resisite a lavenir pou viv dan Paradi la lo later.

25. Ki nou pou aprann dan Sapit 8?

²⁵ Tre byento, Zeova pou liber tou bann imen avek pese e lanmor pou disparet pour touzour! (Lir Izai 25:8.) Me ki sa bann dimoun pou fer ler zot al dan lesyel? Labib i eksplike ki zot pou diriz ansanm avek Zezi dan en Rwayonm, andotmo en gouvernman. Nou pou aprann plis lo sa gouvernman dan Sapit 8.