1. Ki lapriyer nou pou diskit lo la aprezan?

PLIZYER milyon dimoun i konn sa lapriyer ki souvan ganny apele Notreper. Zezi ti servi sa lapriyer pour montre son bann disip konman pour priye. Ki i ti demande dan son lapriyer? Akoz sa lapriyer i enportan pour nou ozordi?

2. Ki sa trwa keksoz enportan ki Zezi ti montre nou pour priy lo la?

² Zezi ti dir: “Se koumsa ki zot devret priye: ‘Nou Papa ki dan lesyel, ki ou non i ganny sanktifye [oubyen konsidere konman sen]. Ki ou Rwayonm i vini. Ki ou lavolonte i ganny fer lo later parey dan lesyel.’” (Lir Matye 6:9-13.) Akoz Zezi ti montre nou pour priy pour sa trwa keksoz?​—Vwar Lezot lenformasyon nimero 20.

3. Ki nou bezwen konnen lo Rwayonm Bondye?

³ Nou’n aprann ki Bondye i apel Zeova. Nou’n osi diskit lo plan Bondye pour bann imen ek later. Me ki Zezi ti pe sey dir ler i ti demann nou pour priye: “Ki ou Rwayonm i vini”? Nou pou aprann kisisa Rwayonm Bondye, ki i pou fer e ki mannyer i pou fer non Bondye vin sen.

4. Kisisa Rwayonm Bondye e lekel son Lerwa?

⁴ Zeova ti etabli en gouvernman dan lesyel e swazir Zezi pour vin Lerwa. Labib i apel sa gouvernman Rwayonm Bondye. Zezi i “Lerwa sa bann ki pe dirize  konman lerwa e Senyer sa bann ki pe dirize konman senyer.” (1 Timote 6:15) Zezi i kapab fer bokou plis dibyen ki okenn dirizan imen e i bokou pli pwisan ki tou bann dirizan imen.

5. Kote gouvernman Bondye i ete? Lo ki i pou dirize?

⁵ Karant zour apre ki Zezi ti resisite, i ti retourn dan lesyel. Pli tar, Zeova ti apwent li konman Lerwa dan son Rwayonm. (Akt 2:33) Gouvernman Bondye ki dan lesyel pou diriz later. (Revelasyon 11:15) Sanmenm sa Labib i apel Rwayonm Bondye en “Rwayonm ki dan lesyel.”​—2 Timote 4:18.

6, 7. Akoz Zezi pou en pli bon lerwa ki okenn lerwa imen?

⁶ Labib i dir ki Zezi i pli siperyer ki okenn lerwa imen parski “zis li ki imortel.” (1 Timote 6:16) Avek letan tou bann dirizan imen i mor, me Zezi pa pou zanmen mor. Tou bann bon keksoz ki Zezi pou fer pour nou pou reste pour touzour.

⁷ Bann profesi Labib ti dir ki Zezi pou en Lerwa ki zis e ki annan konpasyon: “Lespri Zeova pou lo li, lespri lasazes ek lentelizans, lespri konsey ek lafors, lespri konnesans ek gran respe pour Zeova. I pou kontan pour annan gran respe pour Zeova. I pa pou zis ziz dapre sa ki son lizye i vwar, ni koriz dapre sa ki son zorey i tande. I pou ziz bann dernyen dimoun [oubyen bann pov] dan en fason zis.” (Izai 11:2-4, NWT) Eski ou ti pou kontan annan en lerwa koumsa?

8. Ki mannyer nou konnen ki Zezi pa pou diriz li tousel?

⁸ Bondye in swazir serten imen ki pou diriz avek Zezi dan son gouvernman dan lesyel. Par egzanp,  zapot Pol ti dir Timote: “Si nou kontinyen andire, nou pou dirize konman bann lerwa avek li.” (2 Timote 2:12) Konbyen lerwa pou diriz avek Zezi?

9. Konbyen lerwa pou diriz avek Zezi? Kan ki Bondye ti konmans swazir zot?

⁹ Parey nou ti aprann dan Sapit 7, zapot Zan ti ganny en vizyon kot i ti vwar Lerwa Zezi avek 144,000 lezot lerwa dan lesyel. Lekel sa 144,000? Zan i eksplike ki zot “annan son non [Zezi] ek non son Papa ekri lo zot fron.” I osi azoute: “Zot kontinyen swiv sa Pti Mouton partou kot i ale. Zot in ganny aste parmi bann imen.” (Lir Revelasyon 14:1, 4.) Sa 144,000 i bann Kretyen fidel ki Bondye in swazir pour “diriz lo later antye konman lerwa” avek Zezi. Ler zot mor, zot ganny resisite pour al viv dan lesyel. (Revelasyon 5:10) Depi letan bann zapot, Zeova in swazir bann Kretyen fidel pour form parti sa group 144,000 lerwa.

10. Kwa ki montre ki Zeova i kontan nou e akoz?

¹⁰ Zeova i telman kontan nou ki i’n fer laranzman pour bann imen diriz ansanm avek Zezi. Zezi pou en bon dirizan parski i konpran nou. I konnen ki savedir viv konman en imen e soufer. Pol ti dir ki Zezi i pran pitye pour nou, i kapab “konpran nou febles” e i’n “ganny teste dan tou keksoz parey nou menm.” (Ebre 4:15; 5:8) Sa 144,000 Kretyen swazir osi i konnen ki savedir viv konman en imen. Zot in osi lalit avek lenperfeksyon ek maladi. Alor nou kapab asire ki Zezi ek sa 144,000 Kretyen pou konpran ki mannyer nou santi e osi bann problenm ki nou bezwen fer fas avek.

11. Akoz Zezi ti ansenny son bann disip pour priye ki lavolonte Bondye i ganny fer dan lesyel?

¹¹ Zezi ti demann son bann disip pour priye ki lavolonte Bondye i ganny fer dan lesyel. Akoz? Parey nou ti aprann dan Sapit 3, Satan ti rebel kont Zeova. Apre ki Satan ti’n rebele, Zeova ti les li ek son bann move lanz oubyen demon reste dan lesyel pour en pe letan. Alor pa tou bann lanz dan lesyel ki ti pe fer lavolonte Bondye. Dan Sapit 10, nou pou aprann plis lo Satan ek bann demon.

12. Ki sa de levennman enportan ki ganny dekrir dan Revelasyon 12:10?

¹² Labib i eksplike ki pa tro bokou letan apre ki Zezi ti vin Lerwa dan Rwayonm Bondye, i ti al lager kont Satan. (Lir Revelasyon 12:7-10.) Verse 10 i dekrir de levennman vreman enportan. Premyerman, Rwayonm Bondye i konmans dirize e Zezi Kri i vin Lerwa dan sa Rwayonm. Dezyenmman, Satan i ganny tire dan lesyel e zete lo later. Parey nou pou vwar, sa bann levennman in fini arive.

13. Ki ti arive dan lesyel ler Satan ti ganny tire?

¹³ Labib i dir ki bann lanz fidel ti vreman kontan ler Satan ek son bann demon ti ganny tire dan lesyel. I dir: “Lesyel ek zot ki reste dan lesyel, zot devret dan lazwa!” (Revelasyon 12:12) Aprezan i annan lape ek linite partou dan lesyel parski tou bann ki dan lesyel pe fer lavolonte Bondye.

14. Vi ki Satan in ganny tire dan lesyel, ki’n arive lo later?

¹⁴ Me lavi lo later i konpletman diferan. Bann move keksoz i arive avek dimoun “parski Dyab in  desann” lo later e i annan “en gran lakoler, parski i konnen i reste li zis en ptigin letan.” (Revelasyon 12:12) Satan i vreman ankoler. I’n ganny tire dan lesyel e i konnen ki byento i pou ganny detrir. I fer tou sa ki i kapab pour li fer problenm avek bann imen partou lo later e fer zot soufer.

15. Ki plan Bondye pour later?

¹⁵ Me plan Bondye pour later pa’n sanze. I ankor anvi ki bann imen parfe i viv pour touzour dan Paradi lo later. (Psonm 37:29) Alor ki mannyer Rwayonm Bondye pou fer sa posib?

16, 17. Ki Danyel 2:44 i dir nou lo Rwayonm Bondye?

¹⁶ Sa profesi dan Danyel 2:44 i dir: “Dan lepok sa bann lerwa, Bondye lesyel pou etabli en rwayonm ki pa pou zanmen ganny detri; sa rwayonm pa pou zanmen pas avek en lot pep. I pou kraz tou sa bann rwayonm e detri tou konpletman; me li, i pou reste pour touzour.” Ki sa profesi i ansenny nou konsernan Rwayonm Bondye?

¹⁷ Premyerman, i dir nou ki Rwayonm Bondye ti pou konmans dirize “dan lepok sa bann lerwa.” Sa i vedir ki i ti pou ankor annan lezot gouvernman ler Rwayonm Bondye ti pou konmans dirize. Dezyenmman, i dir nou ki Rwayonm Bondye pou reste pour touzour e ki en lot gouvernman pa pou zanmen ranplas li. Trwazyenmman, i pou annan lager ant Rwayonm Bondye ek lezot gouvernman lo later. Rwayonm Bondye pou ranport laviktwar dan sa lager e vin sa sel gouvernman ki diriz later. Apre sa, bann imen pou annan sa pli bon gouvernman ki’n deza egziste.

18. Ki mannyer sa dernyen lager ant Rwayonm Bondye ek bann gouvernman sa lemonn i apele?

 ¹⁸ Ki mannyer Rwayonm Bondye pou pran pouvwar lo later? Avan dernyen lager ki apel Armagedon, bann demon pou anbet “bann lerwa partou lo later, pour rasanble zot pour sa lager sa gran zour Bondye Tou Pwisan.” Wi, bann gouvernman imen pou lager kont Rwayonm Bondye.​—Revelasyon 16:14, 16; vwar Lezot lenformasyon nimero 10.

19, 20. Akoz nou bezwen ki Rwayonm Bondye i diriz later?

¹⁹ Akoz nou bezwen Rwayonm Bondye? I annan omwen trwa rezon. Premyerman, nou fer pese, alor nou tonm malad e mor. Me Labib i dir ki ler Rwayonm Bondye pou dirize, nou pou viv pour touzour. Anfet, Zan 3:16 i dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.”

²⁰ En dezyenm rezon ki nou bezwen Rwayonm Bondye se akoz bann move dimoun i partou kote. Bokou zot i koz manti, tronp lezot e viv en lavi imoral. Napa nanryen ki nou kapab fer pour tir zot, me Bondye i kapab. Dimoun ki kontinyen fer bann move keksoz pou ganny detrir pandan lager Armagedon. (Lir Psonm 37:10.) En trwazyenm rezon ki nou bezwen Rwayonm Bondye i akoz bann gouvernman imen i fay, kriyel e koronpi. Zot pa enterese pour ed bann dimoun obei Bondye. Labib i dir ki “zonm i domin lo son kanmarad pour fer son maler.”​—Eklezyast 8:9.

21. Ki mannyer Rwayonm Bondye pou akonpli lavolonte Bondye lo later?

 ²¹ Apre lager Armagedon, Rwayonm Bondye pou fer sir ki lavolonte Bondye i ganny fer lo later. Par egzanp, i pou tir Satan ek son bann demon. (Revelasyon 20:1-3) Avek letan, i pou napa personn ki pou tonm malad ouswa mor. Gras a ranson, tou bann imen fidel pou kapab viv pour touzour dan Paradi. (Revelasyon 22:1-3) Rwayonm Bondye pou fer non Bondye vin sen. Ki sa i vedir? I vedir ki ler Rwayonm Bondye i diriz later, tou bann imen pou onor non Zeova.​—Vwar Lezot lenformasyon nimero 21.

22. Ki mannyer nou konnen ki Zezi pa ti vin Lerwa ler i ti ankor lo later ouswa deswit apre ki i ti ganny resisite?

²² Zezi ti demann son bann disip pour priye: “Ki ou Rwayonm i vini.” Alor i ti evidan ki gouvernman Bondye ti pou vin a lavenir. Premyerman Zeova ti pou etabli son gouvernman e fer Zezi vin Lerwa dan sa gouvernman. Eski Zezi ti vin Lerwa deswit apre ki i ti retourn dan lesyel? Non, i ti pou bezwen espere.  Tou le de Pyer ek Pol ti fer sa kler en pe letan apre ki Zezi ti’n resisite, ler zot ti aplik sa profesi dan Psonm 110:1 avek Zezi. Dan sa profesi Zeova i dir: “Asiz lo mon kote drwat ziska ki mon met ou bann lennmi anba ou lipye.” (Akt 2:32-35; Ebre 10:12, 13) Konbyen letan Zezi ti pou bezwen espere avan ki Zeova ti pou fer li vin Lerwa?

23. (a) Kan ki Zezi ti konmans dirize konman Lerwa dan Rwayonm Bondye? (b) Ki nou pou aprann dan Sapit 9?

²³ Plizyer lannen avan 1914, en group Kretyen senser ti konpran ki sa lannen 1914 ti pou en lannen enportan an rapor avek bann profesi Labib. Bann levennman dan lemonn depi 1914 in montre ki zot ti annan rezon. Zezi ti konmans dirize konman Lerwa sa lannen. (Psonm 110:2) Pa bokou letan apre sa, Satan ti ganny zete lo later e aprezan “i reste li zis en ptigin letan.” (Revelasyon 12:12) Dan Sapit 9, nou pou vwar plis levidans ki nou pe viv dan sa letan. Nou pou osi aprann ki tre byento Rwayonm Bondye pou fer sir ki lavolonte Bondye i ganny fer lo later.​—Vwar Lezot lenformasyon nimero 22.