1-6. Donn en legzanp ki montre ki mannyer bann Temwen i pres dan diferan kalite sirkonstans.

 EN ZENN fiy Temwen Zeova ki apel Rebecca ki reste Gana, ti konsider lekol konman son teritwar kot i prese. I ti toultan annan bann piblikasyon ki baze lo Labib dan son sak lekol. Ler i ti dan brek, i ti rod loportinite pour li pres avek son bann kanmarad lekol. Rebecca ti konmans etidye Labib avek plizyer manrmay dan son laklas.

² I ti annan de pionye ki reste lo zil Madagaskar, dan kote les Lafrik, ki ti mars apepre 25 kilomet dan soley pour al kot en vilaz ki byen lwen. Ler zot ti laba zot ti fer letid Labib avek bann dimoun ki enterese.

³ Bann Temwen Zeova Paragway ansanm avek bann frer ek ser ki sorti dan 15 lezot pei ti travay ansanm pour fer en bato ki ti pou ed zot al kot bann dimoun ki reste tou dilon larivyer Paragway ek larivyer Parana. Sa bato ti kapab anmenn 45 tonn e i ti annan plas pour 12 dimoun reste lo la. Sa in ed bann proklanmater devoue pour anons sa bon nouvel avek bann dimoun ki reste dan bann landrwa ki difisil pour arive si ou napa en bato.

⁴ Bann Temwen Zeova dan Nor Alaska ti profit en loportinite spesyal pour pres avek bann touris dan sezon lete. Ler letan ti konmans vin so, i ti annan en kantite bato krwazyer ki vini avek en kantite dimoun sorti dan diferan pei. Alor bann Temwen Zeova ti al kot lasose e zot met bann prezantwar ki annan bann piblikasyon ki baze lo Labib dan plizyer langaz. Dan sa menm rezyon, i ti annan en avyon ki ti ed bann frer ek ser al dan bann vilaz ki byen lwen. Alor bann Temwen Zeova ti kapab anons sa bon nouvel avek bann Aleut, Athabascan, Tsimshian ek Klinket.

⁵ En frer ki apel Larry, ki ti reste Texas, Leta-z-ini, ti annan en teritwar spesyal e sa ti sa rezidans pour bann dimoun ki annan dezabilite kot i ti reste. Menm si i ti dan en wiltyer akoz en aksidan, Larry pa ti reste nanryen fer. I ti pres sa mesaz Rwayonm avek lezot e i ti osi dir zot konsernan sa lespwar dan Labib ki ler Rwayonm Bondye pou diriz later, i pou kapab mars ankor.​—Iza. 35:5, 6.

⁶ En group Temwen Zeova Myanmar ti vwayaz trwa zour lo bato sorti Mandalay pour al en lasanble dan nor Myanmar. Vi ki zot ti anvi pres sa bon nouvel, zot ti anmenn bann piblikasyon ki baze lo Labib e zot ti ofer  bann pasaze. Sak fwa ki zot bato ti aret dan en lavil oubyen en vilaz, zot ti debarke e zot ti al kot lakaz bann dimoun vitman e ofer zot bann piblikasyon. Antretan, i ti annan bann nouvo pasaze ki ti’n mont lo bato e ler sa bann frer ek ser ti retourn lo bato, zot ti annan en “nouvo teritwar” pour zot prese.

7. Ki mannyer bann serviter Zeova i anons sa mesaz lo Rwayonm Bondye e ki zot lobzektif?

⁷ Parey sa bann legzanp i montre, bann serviter Zeova ki devoue dan lemonn antye pe “rann temwannyaz afon konsernan Rwayonm Bondye.” (Akt 28:23) Zot al kazankaz, zot ekri let, zot koz avek dimoun dan semen e lo telefonn. Menm si zot dan bis, pe marse dan en landrwa piblik oubyen pe pran brek kot zot travay, zot rod nenport loportinite pour koz avek lezot lo Rwayonm Bondye. Zot fer sa dan diferan fason me zot annan menm lobzektif, zot anvi pres sa bon nouvel nenport landrwa kot zot kapab zwenn dimoun.​—Mat. 10:11.

8, 9. (a) Akoz i en mirak ki sa bon nouvel lo Rwayonm pe kontinyen ganny anonse partou lo later? (b) Ki kestyon enportan nou kapab demande e ki nou bezwen fer pour nou konn larepons?

⁸ Ou ki pe lir sa liv, eski ou parmi sa kantite proklanmater ki pe pres dan plis ki 235 pei? Si wi, ou pe ede pour sa bon nouvel lo Rwayonm kontinyen ganny anonse partou lo later! Rezilta ki nou’n gannyen dan lemonn antye i montre ki sa i en mirak. Menm si nou ganny bann gro lobstak ek defi, menm si gouvernman i enterdi nou travay e nou ganny bann persekisyon, bann Temwen Zeova pe rann temwannyaz afon konsernan Rwayonm Bondye avek bann dimoun partou lo later.

⁹ En kestyon enportan ki nou kapab demande i, akoz bann lobstak ki nou gannyen ek bann persekisyon sorti kot Satan pa’n anpes sa travay predikasyon kontinyen progrese? Pour reponn sa kestyon, nou bezwen gete ki ti arive dan premye syek. Sa i akoz an realite, ozordi nou konman bann Temwen Zeova, nou pe kontinyen fer sa travay ki ti konmanse depi premye syek.

10. Ki travay ki ti pli enportan pour Zezi e ki i ti konnen konsernan sa travay?

¹⁰ Zezi Kri, Fondater kongregasyon Kretyen, ti fer tou sa ki i ti kapab pour anons sa bon nouvel lo Rwayonm Bondye. Sa ti sa travay pli enportan dan son lavi. En fwa i ti dir: “Mon bezwen anons sa bon nouvel lo Rwayonm Bondye dan lezot lavil osi parski i pour sa rezon ki mon’n ganny anvoye.” (Lik 4:43) Zezi ti konnen ki i ti pe konmans en travay ki i pa ti pou kapab fini li tousel. Zis avan ki i ti mor, i ti predir ki sa mesaz Rwayonm ti pou ganny anonse “dan tou nasyon.” (Mark 13:10) Me ki mannyer sa travay ti pou ganny fer e lekel ki ti pou fer li?

11. Ki travay enportan Zezi ti donn son bann disip e ki led zot ti pou gannyen pour fer sa travay?

 ¹¹ Apre ki Zezi ti’n mor e resisite, Zezi ti aparet avek son bann disip e i ti donn zot sa travay enportan, i ti dir: “Alor, al kot bann dimoun dan tou nasyon e fer zot vin mon disip, batiz zot o non Papa, o non Garson e o non lespri sen, ansenny zot pour obei tou sa ki mon’n donn zot lord pour fer. Mazinen! Mon avek zot tou le zour ziska lafen sa lemonn.” (Mat. 28:19, 20) Ler Zezi ti dir, “Mon avek zot,” sa i montre ki i ti pou ed son bann disip dan sa travay pour anons sa bon nouvel e fer disip. Zot ti pou bezwen son led akoz Zezi ti predir ki “tou nasyon pou ay zot.” (Mat. 24:9) Bann disip ti pou osi ganny en lot led. Avan ki Zezi ti mont dan lesyel, i ti dir zot ki zot ti pou ganny lespri sen pour zot vin son bann temwen “ziska dan bann landrwa pli elwannyen lo later.”​—Akt 1:8.

12. Ki bann kestyon enportan nou kapab demande e akoz i enportan pour nou konn larepons?

¹² Nou kapab demann bann kestyon enportan parey: Eski bann zapot Zezi ek lezot disip dan premye syek ti pran sa travay o serye? Eski sa pti group Kretyen ki ti enkli bann msye ek bann madanm ti rann temwannyaz afon lo Rwayonm Bondye menm si zot ti ganny en kantite persekisyon? Eski Zeova, Zezi ek bann lanz ti ed zot dan sa travay pour fer disip? Eski zot ti ganny led lespri sen? Nou kapab ganny larepons sa bann kestyon ek lezot ankor dan liv Akt ki dan Labib. I enportan ki nou konn larepons sa bann kestyon. Akoz? Zezi ti promet ki sa travay ki i ti donn son bann disip ti pou kontinyen “ziska lafen sa lemonn.” Alor tou bann vre Kretyen, ki enkli nou ozordi ki pe viv dan sa letan lafen, nou osi nou annan sa menm travay. Sanmenm sa nou enterese avek bann keksoz ki’n arive dan lepase ki’n ganny ekrir dan liv Akt.

13, 14. (a) Lekel ki ti ekri liv Akt e ki mannyer sa dimoun ti ganny son bann lenformasyon? (b) Ki liv Akt i koz lo la?

¹³ Lekel ki ti ekri liv Akt? Nou pa trouv non sa dimoun ki ti ekri sa liv okenn par dan sa liv me lafason ki sa liv i konmanse i montre ki sa dimoun ki ti ekri liv Akt ti osi ekri Levanzil Lik. (Lik 1:1-4; Akt 1:1, 2) Alor depi lontan, Lik ki ti en “dokter ki [zot ti] kontan” e en bon istoryen, in ganny konsidere konman sa dimoun ki ti ekri liv Akt. (Kol. 4:14) Sa liv i rakont bann keksoz ki ti arive pandan 28 an, depi lannen 33 ler Zezi ti mont dan lesyel ziska lannen 61 ler Pol ti ganny met dan prizon Ronm. Ler Lik i rakont sa ki ti’n arive, i annan letan i dir “zot” e i annan letan i dir “nou.” Ler i dir “nou,” sa i montre ki li osi i ti la ler sa bann keksoz ti pe arive. (Akt 16:8-10; 20:5; 27:1) Lik ti en dimoun ki ti kontan fer byen son bann resers e san dout i ti kapab ganny son bann lenformasyon avek Pol, Barnabas, Filip oubyen lezot dimoun ki i koz lo la dan sa liv.

¹⁴ Ki liv Akt i koz lo la? Dan son Levanzil ki i ti ekri avan liv Akt, Lik ti  ekri sa ki Zezi ti dir e sa ki i ti fer. Par kont dan liv Akt, Lik i koz lo sa ki bann disip Zezi ti dir e sa ki zot ti fer. Alor liv Akt i koz lo bann dimoun ki ti fer en gran travay menm si lezot dimoun ti konsider zot konman bann dimoun ki ti “napa bokou ledikasyon e ki zot ti bann zonm ordiner.” (Akt 4:13) Sa liv ki’n ganny enspire par Bondye, i koz en pti pe lo ki mannyer kongregasyon Kretyen ti konmanse e ki mannyer i ti agrandi. Liv Akt i montre nou ki mannyer bann Kretyen dan premye syek ti prese, setadir diferan fason ki zot ti prese ek zot leta lespri. (Akt 4:31; 5:42) I osi met lanfaz lo ki mannyer lespri sen i ede pour ki sa bon nouvel i kontinyen ganny anonse partou. (Akt 8:29, 39, 40; 13:1-3; 16:6; 18:24, 25) Liv Akt i osi met lanfaz lo tenm Labib ki non Bondye pou ganny sanktifye gras a son Rwayonm ki ganny dirize par Kris e i montre ki mannyer sa mesaz Rwayonm in kontinyen ganny prese dan plizyer landrwa menm si i ti annan en kantite persekisyon.​—Akt 8:12; 19:8; 28:30, 31.

15. Ki byenfe nou pou gannyen ler nou etidye liv Akt?

¹⁵ Ler nou etidye liv Akt, sa pou fer nou lafwa vin pli for e nou pou kontan! Si nou mazin lo sa ki bann premye disip Kris ti fer, lafason ki zot ti demontre kouraz e ki mannyer zot ti devoue, sa pou vreman ed nou. Sa pou fer nou anvi imit lafwa nou bann frer ek ser ki ti viv dan premye syek. Koumsa nou pou pli pare pour nou fer sa travay ki nou’n ganny demande pour fer, pour “al kot bann dimoun . . . e fer zot vin [bann] disip.” Sa liv ki ou pe lir in ganny fer pour ed ou pour ou kapab etidye byen sa liv Akt.

16. Ki sa trwa lobzektif sa liv?

¹⁶ Ki lobzektif sa liv? Sa liv i annan trwa lobzektif e sa i (1) pour fer nou pli asire ki Zeova i servi son lespri sen pour ed nou anons sa bon nouvel lo Rwayonm e fer disip, (2) pour ed nou fer tou sa ki nou kapab dan predikasyon ler nou get sa ki bann disip Kris ti fer dan premye syek e (3) pour fer nou pli apresye lorganizasyon Zeova ek bann ansyen ki pe diriz sa travay predikasyon e ki pe diriz kongregasyon.

17, 18. Ki mannyer bann lenformasyon dan sa liv in ganny organize e ki lezot keksoz ki pou ed ou ler ou fer ou letid Labib personnel?

¹⁷ Ki mannyer bann lenformasyon dan sa liv in ganny organize? Sa liv in ganny separe dan wit parti e sak parti i koz lo en bout dan liv Akt. Bann sapit pa koz lo bann verse dan liv Akt enn par enn me par kont, i pou ed nou vwar bann keksoz ki nou kapab aprann avek bann levennman ki’n ganny rakonte dan sa liv. I pou osi ed nou vwar ki mannyer nou kapab aplik sa ki nou aprann. Konmansman sak sapit, i annan en fraz ki dir sa pwen enportan ki sa sapit i koz lo la e osi bann verse dan liv Akt ki nou pou etidye.

¹⁸ I osi annan lezot keksoz dan sa liv ki pou ed nou ler nou fer nou letid Labib personnel. I annan bann zoli portre ki montre diferan levennman  enteresan dan liv Akt ki pou ed ou konpran pli byen sa ki ti pe arive sa letan. Dan en kantite sapit, i annan bann bwat ki donn lezot lenformasyon ki pou ed ou. Serten bwat i donn plis lenformasyon lo en dimoun dan Labib ki nou kapab swiv son legzanp. I osi annan lezot bwat ki donn plis lenformasyon lo bann landrwa, lo bann levennman ki ti arive, lo koutim bann dimoun oubyen bann lenformasyon lo lezot dimoun ki liv Akt i koz lo la.

19. Ki bann kestyon nou devret demann nou lekor tanzantan?

¹⁹ Sa liv i kapab ed ou analiz byen ou lekor. Nenport ki kantite letan ki ou en proklanmater, tanzantan i bon ki ou pran letan pour egzamin ou bann priyorite dan ou lavi e osi lafason ki ou vwar predikasyon. (2 Kor. 13:5) Demann ou lekor: ‘Eski lafason ki mon prese i montre ki mon vwar ki lafen i pros? (1 Kor. 7:29-31) Eski mon montre ki mon vreman krwar dan sa bon nouvel ki mon pe anonse? Eski mon devoue? (1 Tesa. 1:5, 6) Eski mon pe fer tou sa ki mon kapab pour anons sa bon nouvel e fer disip?’​—Kol. 3:23.

20, 21. Akoz sa travay ki nou’n ganny demande pour fer i vreman enportan e ki nou devret determinen pour fer?

²⁰ Annou toultan gard antet ki nou’n ganny demande pour fer en travay enportan, pour anons sa bon nouvel e fer disip. Toulezour sa travay i vin pli irzan. Lafen sa move lemonn i vreman pros. Ozordi, lavi en kantite dimoun i an danze. Nou pa konnen ki kantite dimoun ki annan sa bon kondisyon leker ki pou aksepte sa bon nouvel ki nou pe prese. (Akt 13:48) Me nou annan sa responsabilite pour ed zot avan i tro tar.​—1 Tim. 4:16.

²¹ Alor, i vreman enportan pour nou swiv legzanp bann proklanmater dan premye syek ki ti fer tou sa ki zot ti kapab pour anons sa bon nouvel lo Rwayonm. Nou swete ki ler ou etidye byen sa liv sa pou ed ou pour fer tou sa ki ou kapab dan predikasyon e ki ou pou annan plis kouraz. Nou osi swete ki ou pou pli determinen pour kontinyen “rann temwannyaz afon konsernan Rwayonm Bondye.”​—Akt 28:23.