1, 2. (a) Ki sityasyon Pol i ladan? (b) Vi ki Pol ti fer apel avek Sezar, ki kestyon nou kapab demande?

 POL i Sezare e bann solda i ankor pe vey li. I fer de-z-an depi ki Pol in retourn Zide e detrwa zour apre, bann Zwif in esey touy li apepre trwa fwa. (Akt 21:27-36; 23:10, 12-15, 27) Ziska aprezan, son bann lennmi pa’n kapab touy li me zot pe kontinyen rod fason pour touy li. Ler Pol i remarke ki i kapab ganny livre dan zot lanmen, i dir Festis, gouverner Romen: “Mon fer apel avek Sezar!”−Akt 25:11.

² Eski Zeova ti dakor avek sa desizyon ki Pol ti’n fer pour fer apel avek lanperer Ronm? I enportan pour nou konn larepons sa kestyon vi ki nou pe rann temwannyaz afon lo Rwayonm Bondye dan letan lafen. Nou bezwen konnen si sa ki Pol ti fer i en bon legzanp pour nou swiv ler nou “defann e etabli nou drwa legal pour anons sa bon nouvel.”​—Fili. 1:7.

3, 4. (a) Akoz bann Zwif ti demande pour anmenn Pol Zerizalenm e ki mannyer Pol ti sap lanmor? (b) Ki mannyer Zeova i ed son bann serviter ozordi parey i ti ed Pol?

³ Trwa zour apre ki Festis ti’n vin lanperer Romen pour Zide, i ti al Zerizalenm. a Ler i ti laba, i ti ekout bann sef pret ek bann zonm enportan parmi bann Zwif ki ti pe akiz Pol ki i ti’n fer bann krim vreman serye. Zot ti konnen ki sa nouvo gouverner ti anba presyon pour fer sir ki i kontinyen annan lape ant zot e avek tou Zwif. Alor zot ti demann Festis pour anmenn Pol Zerizalenm pour ziz li. Par kont, zot ti bann lennmi Pol e zot ti pe fer plan pour touy Pol dan semen ki sorti Sezare pour al Zerizalenm. Festis pa ti dakor e i ti dir zot: “Fer zot bann sef desann [Sezare] avek mwan e akiz li si vreman sa zonm in fer en keksoz mal.” (Akt 25:5) Ankor enn fwa Pol ti sap lanmor.

⁴ Sak fwa ki Pol ti pas dan problenm, Zeova ti servi Zezi pour ed Pol. Rapel sa ki Zezi ti dir zapot Pol dan en vizyon: “Pran kouraz!” (Akt 23:11) Ozordi osi, bann serviter Bondye i ganny bann problenm. Zeova pa protez  nou kont tou problenm ki nou kapab gannyen me i donn nou lasazes ek lafors pour nou andire. Nou toultan kapab depan lo “lafors ki sorti kot Bondye.”​—2 Kor. 4:7.

5. Ki Festis ti deside fer avek Pol?

⁵ Detrwa zour pli tar, Festis ti al Sezare e i “ti asiz dan sez ziz.” b Pol ek bann dimoun ki ti pe akiz Pol ti debout devan Festis. Sa bann dimoun ti pe akiz Pol menm si zot ti napa laprev e pour defann son lekor, Pol ti dir: “Mon pa’n fer okenn pese kont Lalwa bann Zwif, ni kont tanp e ni kont Sezar.” Zapot Pol ti inosan e i ti devret ganny large. Ki Festis ti pou fer? Vi ki i ti anvi fer plezir bann Zwif, i ti demann Pol: “Eski ou anvi mont Zerizalenm e ganny zize laba devan mwan konsernan sa bann zafer?” (Akt 25:6-9) Sa pa ti fer sans! Si zot ti anmenn Pol Zerizalenm pour li ganny zize, sa bann dimoun ki ti pe akiz Pol ki ti pou ziz li e sirman i ti pou ganny touye. Dan sa sityasyon, Festis ti prefere anpe avek bann Zwif pour li kapab kontinyen dirize konman gouverner dan plas fer ki i annan lazistis. Pons Pilat ki ti en gouverner dan lepase, ti fer menm keksoz ler en prizonnyen pli enportan ki Pol ti ganny akize. (Zan 19:12-16) Ozordi osi, bann ziz i kapab pran bann desizyon ki pa zis pour fer plezir serten dimoun. Alor, nou pa devret sirprann si bann ziz i fer parey ler zot ziz bann ka ki annan pour fer avek pep Bondye.

6, 7. Akoz Pol ti fer apel avek Sezar e ki legzanp i’n kite pour bann vre Kretyen ozordi?

 ⁶ Vi ki Festis ti anvi fer plezir bann Zwif, sa ti kapab fer Pol ganny touye. Alor Pol ti servi en drwa ki i ti annan konman en sitwayen Romen. I ti dir Festis: “Mon devan tribinal Sezar, kot mon devret ganny zize. Mon pa’n fer nanryen mal bann Zwif parey ou menm ou konnen. . . . Mon fer apel avek Sezar!” Normalman, ler en dimoun ti demann en keksoz koumsa, zot ti bezwen fer li, i ti en keksoz serye. Sanmenm sa Festis ti dir: “Ou’n fer apel avek Sezar, ou pou al devan Sezar.” (Akt 25:10-12) Vi ki Pol ti’n demande pour al devan en lakour ki annan plis lotorite, sa i en bon legzanp pour bann vre Kretyen ozordi. Ler bann dimoun i “servi lalwa pour fer problenm” pour Temwen Zeova, zot servi byen bann prosedir ki lalwa i permet pour zot defann sa bon nouvel. c​—Ps. 94:20.

⁷ Alor, apre ki Pol ti’n pas de-z-an dan prizon akoz i ti’n ganny akize pour fer bann keksoz ki i pa ti’n fer, Pol ti ganny sa posibilite pour al Ronm pour li defann son lekor. Me avan ki i ti ale, en lot dirizan ti anvi vwar li.

8, 9. Akoz Lerwa Agripa ti al Sezare?

⁸ Detrwa zour apre ki Pol ti’n dir Festis ki i pe fer apel avek Sezar, Lerwa Agripa ek son ser Bernis ti vin kot Festis, sa nouvo gouverner pour “en vizit kourtwazi.” d Dan sa letan ki bann Romen ti pe dirize, bann zofisye ti abitye vizit en dimoun ki ti’n fek vin en gouverner. Ler Agripa ti vin felisit Festis, Agripa ti pe osi esey fer sir ki i ganny sipor Festis dan domenn politik e ki zot vin zanmi akoz sa pou kapab ed li pli tar.​—Akt 25:13.

⁹ Festis ti dir Lerwa Agripa konsernan Pol e lerwa ti dir ki i ti pou kontan ekout Pol li menm. Son lannmen, sa de dirizan ti asiz dan sez ziz. Me sa ki sa prizonnyen ti pe al dir zot ti pou annan en pli gran lefe konpare avek sa pouvwar ki zot ti annan ek sa gran seremoni ki zot ti’n fer.​—Akt 25:22-27.

10, 11. Ki mannyer Pol ti montre ki i ti respekte Agripa e ki Pol ti dir li konsernan sa kalite dimoun ki i ti ete avan?

¹⁰ Pol ti demontre respe pour Lerwa Agripa e i ti remersye li pour donn li sa posibilite pour defann son lekor. I ti osi dir lerwa ki i rekonnet ki lerwa i konn byen tou bann koutim Zwif ek bann problenm ki ti annan parmi zot. Apre, Pol ti koz lo sa kalite dimoun ki i ti ete avan. I ti dir: “Mon ti viv konman en Farizyen dapre lansennyman pli strik dan nou larelizyon.” (Akt 26:5) Vi ki Pol ti en Farizyen, i ti krwar ki Mesi ti pou vini en zour. Me aprezan, vi ki i en Kretyen i fer lezot dimoun konnen ki Zezi Kri i li menm li sa Mesi ki zot ti pe espere. Sa bann dimoun ki ti pe akiz li ti annan sa  menm lespwar zot osi. Zot ti anvi vwar sa promes ki Bondye ti’n fer avek zot bann zanset vin vre, me zot ti pe ziz Pol konsernan sa lespwar. Sa ki Pol ti dir ti fer Lerwa Agripa anvi konn plis lo sa ki i ti annan pour dir. e

¹¹ Pol i rapel ki mannyer i ti tret bann Kretyen dan en move fason e i ti dir: “Personnelman, mon ti konvenki ki mon ti devret fer tou sa ki mon kapab pour opoz non Zezi sa Nazareen. . . . Vi ki mon ti vreman ankoler avek zot [bann disip Kris], mon ti al ziska persekit zot menm dan lezot lavil.” (Akt 26:9-11) Pol pa ti pe egzazere. En kantite dimoun ti konn sa bann move keksoz ki i ti’n fer avek bann Kretyen. (Gal. 1:13, 23) Petet Lerwa Agripa ti demann son lekor, ‘Kwa ki’n fer sa zonm sanze?’

12, 13. (a) Ki Pol ti dir konsernan lafason ki i ti vin Kretyen? (b) Ki mannyer Pol ti “parey en bef ki pe donn koudpye baton pwent son met ki pe gid li”?

¹² Sa ki Pol ti dir apre ti reponn sa kestyon. Pol ti dir: “Mon ti dan semen pour al Damas akoz bann sef pret ti donn mwan lotorite ek lord pour fer menm zafer laba. Lerwa Agripa, ler mon ti dan semen ver midi, mon ti vwar en lalimyer ki ti pli klate ki soley dan lesyel e i ti klere toultour mwan ek bann ki ti pe vwayaz avek mwan. Apre ki nou tou nou ti’n tonm ater, mon ti tann en lavwa koz avek mwan dan langaz Ebre e dir: ‘Sol, Sol, akoz ou pe persekit mwan? Ou pe fer ou lekor dimal par kontinyen lalit kont mwan.’ Me mon ti dir: ‘Lekel ou Senyer?’ Senyer ti dir  mwan: ‘Mwan menm Zezi ki ou pe persekite.’” f​—Akt 26:12-15.

¹³ Avan ki Pol ti ganny sa vizyon, dan en sans Pol ti “parey en bef ki pe donn koudpye baton pwent son met ki pe gid li.” Ler en bef i donn koudpye bato pwent son met, sa bef i ganny blese e pareyman, ler Pol ti pe fer bann keksoz pour anpes lavolonte Bondye ganny akonplir, sa ti anpes li annan en bon lanmitye avek Bondye. Pol ti en dimoun senser me i pa ti konpran tou keksoz, alor ler Zezi ti aparet avek li dan semen pour al Damas, Pol ti sanz son fason panse.​—Zan 16:1, 2.

14, 15. Ki Pol ti dir konsernan sa bann sanzman ki i ti’n fer dan son lavi?

¹⁴ Pol ti fer bann gro sanzman dan son lavi. I ti dir Agripa: “Mon pa’n dezobei sa ki Zezi ti dir mwan fer dan sa vizyon. Sanmenm ki mon’n anmenn sa mesaz kot dimoun Damas premye, apre kot dimoun Zerizalenm, osi partou dan Zide e kot dimoun lezot nasyon, ki zot devret repantir e retourn ver Bondye par fer bann aksyon ki montre ki zot in repantir.” (Akt 26:19, 20) Pour en kantite lannen, Pol in fer sa travay ki Zezi ti’n donn li ler i ti koz avek li dan sa vizyon ki i ti gannyen sa zour ver midi. Ki rezilta i’n gannyen? Sa bann dimoun ki ti aksepte sa bon nouvel ki Pol ti pres avek zot ti repantir e aret fer bann keksoz ki Bondye pa ti kontan e zot ti konmans ador Bondye. Sa bann dimoun ti vin bann bon sitwayen e zot ti respekte lalwa gouvernman.

¹⁵ Me sa bann Zwif ki ti opoz Pol pa ti apresye sa bann bon keksoz. Pol ti dir: “Sanmenm rezon ki bann Zwif ti tyonbo mwan dan tanp e esey touy mwan. Me lefet  ki mon’n eksperyans led Bondye, ziska aprezan mon ankor pe rann temwannyaz avek bann dimoun, pti konman gran.”​—Akt 26:21, 22.

16. Ki mannyer nou kapab fer parey Pol ler nou koz avek bann ziz ek bann dirizan konsernan sa ki nou krwar ladan?

¹⁶ Konman bann vre Kretyen, nou devret “touzour pare pour defann” nou lafwa. (1 Pyer 3:15) Ler nou koz avek bann ziz oubyen avek bann dirizan konsernan sa ki nou krwar ladan, nou kapab fer parey Pol ti fer ler i ti koz avek Agripa ek Festis. Nou bezwen koz avek respe e nou kapab dir zot ki mannyer bann laverite dan Labib in ed nou ek bann dimoun ki’n aksepte sa bon nouvel pour vin bann pli bon dimoun. Si nou fer sa, sa i kapab tous leker sa bann o zofisye.

17. Ki Festis ti fer ler Pol ti defann son lekor e ki mannyer bann dimoun ozordi i annan sa menm latitid?

¹⁷ Anmezir ki sa de dirizan ti ekout Pol, zot pa ti kapab reste trankil,  zot ti bezwen koze. Annou gete ki ti arive apre. Labib i dir: “Pandan ki Pol ti pe prezant son defans, Festis ti dir byen for: ‘Ou pe perdi latet Pol! Tou sa konnesans ki ou annan pe fer ou perdi latet!’” (Akt 26:24) Festis ti annan menm latitid parey en kantite dimoun i annan ozordi. En kantite dimoun i krwar ki sa bann dimoun ki ansenny sa ki Labib i dir in perdi latet. Souvan, bann dimoun ki ganny konsidere saz, i vwar li difisil pour aksepte sa ki Labib i ansennyen lo rezireksyon.

18. Ki Pol ti dir Festis e ki Agripa ti dir li?

¹⁸ Pol ti dir gouverner: “Onorab Festis, mon pa pe perdi latet mwan, me mon pe koz laverite e sa ki fer sans. Anfet, mon’n kapab koz fran avek lerwa akoz i konn tre byen sa bann keksoz. . . . Me eski ou, Lerwa Agripa, ou krwar dan bann Profet? Mon konnen ki ou krwar.” Me Agripa ti dir Pol: “Dan en pti moman, ou ti pou’n kapab persyad mwan pour vin en Kretyen.” (Akt 26:25-28) Nou pa konnen si sa ki Agripa ti dir ti vre oubyen non, me i montre ki sa ki Pol ti’n dir zot ti annan en gran lefe lo lerwa.

19. Ki Festis ek Agripa ti dir konsernan Pol?

¹⁹ Apre, Agripa ek Festis ti debout e sa ti montre ki zot ti pe ale. “Ler zot ti pe ale, zot ti dir antre zot: ‘Sa zonm pa’n fer nanryen ki merit lanmor ni ganny met dan prizon.’ Alor Agripa ti dir Festis: ‘Sa zonm ti’n kapab ganny large si i pa ti’n fer apel avek Sezar.’” (Akt 26:31, 32) Zot ti konnen ki sa zonm ki ti’n fek defann son lekor ti inosan. Petet sa ti pou fer zot annan en pli bon pwennvi lo bann Kretyen.

20. Ki ti arive vi ki Pol ti rann temwannyaz avek bann o zofisye?

²⁰ I paret ki sa bann dirizan dan sa resi ki ti annan en kantite pouvwar pa ti aksepte sa bon nouvel lo Rwayonm Bondye. Eski i ti en bon nide pour zapot Pol defann son lekor devan sa bann zonm? Wi. Vi ki Pol ti “ganny anmennen devan bann lerwa ek gouverner” Zide, sa ti fer li posib pour li rann temwannyaz avek bann zofisye Romen ki normalman i ti difisil pour zwenn zot. (Lik 21:12, 13) An plis ki sa, leksperyans Pol e lafason ki i ti reste fidel ler i ti pas dan problenm ti ankouraz bann frer ek ser.​—Fili. 1:12-14.

21. Ki bon rezilta nou kapab gannyen si nou kontinyen pres sa bon nouvel lo Rwayonm?

²¹ Ozordi osi, ler nou kontinyen pres sa bon nouvel lo Rwayonm menm si nou ganny bann problenm ek persekisyon, nou kapab ganny en kantite bon rezilta. Nou kapab rann temwannyaz avek bann zofisye ki normalman i difisil pour zwenn zot. Ler nou reste fidel e nou andire menm si nou ganny bann problenm, sa i kapab ankouraz bann frer ek ser pour zot osi annan plis lardyes pour rann temwannyaz afon lo Rwayonm Bondye.