1. Ki bann Kretyen dan premye syek ti fer ki Temwen Zeova ozordi pe fer parey?

 ZOT ti rann temwannyaz avek devouman. Zot leker ti pous zot pour aksepte led ek gidans ki lespri sen ti donnen. Zot pa ti aret prese menm si zot ti ganny persekite e Bondye ti beni zot en kantite. Sanmenm sa ki bann Kretyen dan premye syek ti fer e ozordi osi Temwen Zeova i fer parey.

2, 3. Kwa ki enteresan avek liv Akt?

² Sirman sa bann resi dan liv Akt in ankouraz ou. Dan sa liv Labib i annan en kantite levennman ki kapab fer ou lafwa vin pli for. I napa en lot liv ki parey li parski i sa sel liv ki Bondye ti fer ekri konsernan sa ki bann Kretyen dan premye syek ti fer.

³ Liv Akt i mansyonn 95 dimoun ki sorti dan 32 pei, 54 lavil ek 9 zil. I koz lo bann resi enteresan konsernan bann dimoun ordiner, bann dimoun relizye ki ti arogan, bann politisyen orgeye ek bann dimoun ki ti kontinyen persekit bann Kretyen. Me pli enportan ki sa, sa liv i koz lo nou bann frer ek ser dan premye syek ki ti pas dan problenm e ki ti osi anons sa bon nouvel avek devouman.

4. Akoz nou santi nou pros avek bann dimoun parey zapot Pol, Tabita ek lezot temwen fidel dan lepase?

⁴ I annan apepre 2,000 an depi ki sa bann Kretyen dan premye syek ti fer sa travay predikasyon. Sa ti enkli zapot Pyer ek zapot Pol ki ti devoue, Lik sa dokter ki nou kontan, Barnabas ki ti zenere, Etyenn ki ti kouraze, Tabita ki ti kontan ede, Lidi ki ti demontre lospitalite ek en kantite lezot temwen fidel. Menm si zot in viv en bon pe letan pase, nou santi nou pros avek zot. Akoz? Parski nou osi nou annan sa menm travay pour fer disip. (Mat. 28:19, 20) I en privilez pour nou fer sa travay!

5. Kote bann disip Zezi dan premye syek ti konmans fer sa travay predikasyon?

⁵ Reflesir lo sa travay ki Zezi ti donn son bann disip. I ti dir zot: “Zot pou ganny pwisans ler lespri sen pou desann lo zot. Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) Premyerman, lespri sen ti donn bann disip pwisans pour vin bann temwen “Zerizalenm.” (Akt 1:1–8:3) Apre, lespri sen ti gid zot e zot ti rann temwannyaz “partou dan Zide ek Samari.”  (Akt 8:4–13:3) Apre, zot ti konmans anmenn sa bon nouvel “dan bann landrwa pli elwannyen lo later.”​—Akt 13:4–28:31.

6, 7. Ki lavantaz nou annan ozordi dan sa travay predikasyon konpare avek bann disip dan premye syek?

⁶ Nou bann frer ek ser dan premye syek ti napa Labib antye pour zot servi ler zot ti rann temwannyaz. Zot ti ganny Levanzil Matye dan lannen 41. Pol ti ekri serten son bann let avan ki Lik ti fini ekri liv Akt apepre lannen 61. Me bann Kretyen dan premye syek ti napa en kopi Lekritir antye pour zot menm e zot ti napa bann diferan piblikasyon pour donn bann dimoun ki ti enterese pour ekout zot. Avan ki bann Kretyen Zwif ti vin disip Zezi, zot ti’n deza tann Lekritir Ebre ganny lir dan sinagog. (2 Kor. 3:14-16) Me kantmenm sa, zot osi zot ti bezwen etidye Lekritir parski i kapab ki zot ti bezwen konn bann verse parker.

⁷ Ozordi, laplipar nou i annan en Labib ek en kantite piblikasyon. Nou pe anons sa bon nouvel dan plizyer langaz e nou pe fer disip dan 240 pei.

8, 9. (a) Ki lespri sen ti ed bann disip Zezi fer? (b) Ki lespri sen pe ed lesklav fidel fer?

⁸ Ler Zezi ti dir son bann disip ki zot pou vin son bann temwen, i ti dir zot: “Zot pou ganny pwisans ler lespri sen pou desann lo zot.” Lespri sen Bondye ti pou ed bann disip Zezi vin bann temwen partou lo later. Lespri sen ti donn Pyer ek Pol pouvwar pour geri bann dimoun ki ti malad, pour sas bann demon e pour resisit bann dimoun ki’n mor. Me sa pwisans ki lespri sen ti donn zot ti ed zot fer en keksoz pli enportan. I ti fer bann zapot ek lezot disip kapab ed lezot dimoun ganny sa konnesans egzakt ki kapab fer zot ganny lavi eternel.​—Zan 17:3.

⁹ Zour Lapannkot lannen 33, bann disip Zezi ti koz “dan diferan langaz, dapre sa ki lespri sen ti donn zot pouvwar pour koze.” Alor zot ti rann temwannyaz konsernan “bann keksoz merveye ki Bondye in fer.” (Akt 2:1-4, 11) Ozordi, Bondye pa fer mirak pour fer nou koz dan diferan langaz. Me lespri sen Bondye i ed lesklav fidel pour fer bann piblikasyon baze lo Labib dan en kantite langaz. Par egzanp, tou le mwan i annan plizyer milyon Latour Veyer ek Veye! ki ganny enprimen e lo nou sit jw.org, i annan bann piblikasyon ek video baze lo Labib dan plis ki 1,000 langaz. Tou sa bann keksoz i ed nou anons “bann keksoz merveye ki Bondye in fer” avek dimoun sorti dan tou nasyon, tribi ek langaz.​—Rev. 7:9.

10. Depi 1989, kwa ki’n ganny fer konsernan tradiksyon Labib?

¹⁰ Depi 1989, lesklav fidel in konsantre plis lo tradwir Labib​—Tradiksyon nouvo lemonn dan en kantite langaz. Sa Labib in fini ganny tradwir plis ki 200 langaz e plizyer dizenn milyon kopi in ganny enprimen e i annan en kantite ankor ki pe ganny enprimen. Zis Bondye ek led son lespri sen ki kapab fer tou sa bann travay reisi.

11. Ki mannyer Temwen Zeova i tradwir son bann piblikasyon?

 ¹¹ I annan plizyer santenn frer ek ser ki pe ede pour fer sa travay tradiksyon dan plis ki 150 pei ek landrwa. Sa pa devret sirprann nou parski napa en lot lorganizasyon lo later ki lespri sen pe gide pour “rann temwannyaz afon” partou dan lemonn konsernan Zeova, son Lerwa dan son Rwayonm ek son Rwayonm ki’n ganny etablir dan lesyel.​—Akt 28:23.

12. Kwa ki ti ed Pol ek lezot Kretyen pour zot kapab fer sa travay predikasyon?

¹² Ler Pol ti rann temwannyaz avek bann Zwif ek bann dimoun lezot nasyon dan lavil Antyos, Pisidi, “sa bann ki ti annan sa bon kondisyon leker pour ganny lavi eternel ti vin disip.” (Akt 13:48) Ler Lik ti pros pour fini ekri liv Akt, Lik i dir ki Pol ti pe “anons Rwayonm Bondye . . . avek bokou lardyes.” (Akt 28:31) Kote zapot Pol ti pe prese? Zapot Pol ti pe prese dan lavil Ronm ki ti kapital en pouvwar mondyal. Lespri sen ti ed bann disip Zezi dan premye syek pour fer sa travay predikasyon. Zot ti fer sa atraver bann diskour oubyen lezot fason.

13. Akoz nou devret priye ler nou ganny persekite?

¹³ Ler bann disip Zezi dan premye syek ti ganny persekite, zot ti sipliy Zeova pour donn zot lardyes. Ki ti arive apre? Zot ti ranpli avek lespri sen e zot ti anons parol Bondye avek lardyes. (Akt 4:18-31) Nou osi nou priye pour nou ganny lasazes ek lafors pour kontinyen rann temwannyaz menm si nou ganny persekite. (Zak 1:2-8) Vi ki Bondye i beni nou e lespri sen i ed nou, nou kontinyen prese. Napa nanryen ki kapab aret sa travay predikasyon, pa ni menm persekisyon. Ler nou ganny persekite, nou devret priye e demann Bondye pour donn nou son lespri sen, lasazes ek kouraz pour anons sa bon nouvel.​—Lik 11:13.

14, 15. (a) Ki ti arive ler i ti annan “persekisyon apre lanmor Etyenn”? (b) Dan nou letan, ki mannyer en kantite dimoun Siberi in konn laverite?

¹⁴ Etyenn ti rann temwannyaz avek lardyes avan ki son bann lennmi ti touy li. (Akt 6:5; 7:54-60) Ler i ti konmans annan en “gran persekisyon,” tou bann disip eksepte bann zapot ti disperse partou dan Zide ek Samari. Me sa pa ti fer zot aret fer sa travay predikasyon. Filip ti al Samari pour “pres avek bann dimoun laba konsernan Kris” e i ti ganny bann bon rezilta. (Akt 8:1-8, 14, 15, 25) An plis ki sa, Labib i dir: “Bann disip ki ti’n ganny disperse akoz persekisyon apre lanmor Etyenn ti ariv Fenisi, Sip ek Antyos, me zot ti anons sa mesaz zis avek bann Zwif. Me serten parmi zot ki ti sorti Sip ek Sirenn ti al Antyos e konmans anons sa bon nouvel konsernan Senyer Zezi avek dimoun ki koz Grek.” (Akt 11:19, 20) Sa letan, persekisyon ti ede pour propaz sa mesaz Rwayonm.

¹⁵ Dan nou letan, i’n annan bann keksoz koumsa ki ti arive dan ansyen Linyon Sovyetik. Par egzanp, dan lannen 1950, plizyer milye Temwen Zeova ti ganny egzile Siberi. Vi ki zot ti’n ganny anvoye dan diferan landrwa,  sa bon nouvel ti kontinyen propaze dan sa gran pei. I ti pou enposib pour sa kantite Temwen Zeova ganny ase larzan pour vwayaz dan sa bann landrwa zot menm, apepre 10,000 kilomet pour anons sa bon nouvel. Me gouvernman ki ti anvoy zot partou dan sa pei. En frer ti dir: “Finalman, bann lotorite ki’n ed plizyer milye dimoun senser Siberi pour konn laverite.”

16, 17. Ki mannyer liv Akt i montre ki Zeova ti beni sa travay predikasyon?

¹⁶ San dout, Zeova ti beni bann Kretyen dan premye syek. Pol ek lezot Kretyen ti plante e aroze, “me Bondye ki’n kontinyen fer pouse.” (1 Kor. 3:5, 6) Bann resi dan liv Akt i montre ki sanmenm sa ki ti arive parski Zeova ti beni sa travay predikasyon. Par egzanp, “parol Bondye ti kontinyen propaze e lakantite disip ti kontinyelman ogmante en kantite Zerizalenm.” (Akt 6:7) Anmezir ki sa travay predikasyon ti kontinyen ganny fer dan plizyer landrwa, “kongregasyon partou dan Zide, Galile ek Samari ti vin deplizanpli for e anpe. Lakantite disip ti ogmante parski zot ti annan en gran respe pour Zeova e zot ti ganny rekonforte par lespri sen.”​—Akt 9:31.

¹⁷ Dan lavil Antyos, Siri, bann Zwif ek bann dimoun ki ti koz Grek ti aprann laverite avek bann temwen ki ti demontre kouraz. Sa resi i osi dir ki “Zeova ti avek zot e en kantite dimoun ti vin disip e konmans krwar dan Senyer.” (Akt 11:21) Zot ti kontinyen ganny bann bon rezilta dan sa lavil e Labib i dir: “Parol Zeova ti kontinyen propaz partou e bokou dimoun ti vin disip.” (Akt 12:24) Pol ek lezot Kretyen ti fer sa travay predikasyon afon parmi bann dimoun lezot nasyon e “dan en fason ekstraordiner, parol Zeova ti kontinyen propaz partou e vin deplizanpli pwisan.”​—Akt 19:20.

18, 19. (a) Ki mannyer nou konnen ki ‘Zeova i avek nou’? (b) Donn en legzanp ki montre ki Zeova i ed son pep.

¹⁸ San dout, ‘Zeova i avek nou’ ozordi osi. Sanmenm sa en kantite dimoun pe vin bann disip e zot pe batize pour montre ki zot in dedye zot lavi avek Zeova. An plis ki sa, vi ki Zeova i ed nou e beni nou, sa i ed nou pour andire menm si nou ganny opoze oubyen pas dan bann gran persekisyon. Sa i osi ed nou pour kontinyen fer sa travay predikasyon, parey Pol ek lezot Kretyen dan premye syek ti fer. (Akt 14:19-21) Zeova pou toultan ed nou. Son “lebra eternel” pou toultan ed nou dan tou problenm ki nou pas ladan. (Det. 33:27) Annou toultan rapel ki Zeova i anvi ki son gran non i ganny respekte, alor i pa pou zanmen abandonn son pep.​—1 Sam. 12:22; Ps. 94:14.

¹⁹ Annou vwar en legzanp. Pandan Dezyenm Lager Mondyal, bann Nazi ti anvoy Frer Harald Abt dan kan konsantrasyon Sachsenhausen parski i ti pe kontinyen rann temwannyaz. Dan mwan Me 1942, Gestapo ti al kot  lakour son madanm, Elsa. Zot ti aret li e pran son pti fiy. I ti ganny anvoye dan diferan kan. Ser Abt ti dir: “Mon’n aprann en leson enportan pandan sa bann lannen ki mon’n pase dan bann kan konsantrasyon Lalmanny. Sa leson i ki lespri sen Zeova i kapab donn nou lafors ler nou pas dan bann gro problenm. Avan ki mon ti ganny arete, mon ti’n lir en let ki en ser ti’n ekri e sa ser ti dir ki ler nou pas dan bann gro problenm, lespri sen Zeova i ed nou pour reste kalm. Mon ti krwar ki sa ser ti pe egzazere. Me ler mon ti pas dan problenm, mon ti konpran ki sa ki sa ser ti’n dir ti vre. Sanmenm sa ki arive. I difisil pour imazin sa si ou pa’n pas ladan ou menm. Me pourtan, sanmenm sa ki ti arive avek mwan.”

20. Ki Pol ti fer ler i ti en prizonnyen dan en lakaz e ki mannyer sa i kapab ankouraz serten nou bann frer ek ser?

²⁰ Dernyen verse dan liv Akt i dir ki Pol ti pe “anons Rwayonm Bondye” avek devouman. (Akt 28:31) Vi ki i ti en prizonnyen dan en lakaz, i pa ti lib pour li kapab pres kazankaz dan lavil Ronm. Me kantmenm sa, i ti kontinyen rann temwannyaz avek tou dimoun ki ti vin kot li. Ozordi, serten nou bann frer ek ser pa kapab kit zot lakour petet akoz zot malad lo en lili oubyen zot pe reste dan lakour bann dimoun aze akoz zot laz oubyen en maladi oubyen lezot problenm lasante. Me kantmenm sa, zot vreman kontan Bondye e zot vreman anvi kontinyen rann temwannyaz. Nou kapab priy pour zot e demann nou Papa ki dan lesyel pour ed zot zwenn bann dimoun ki anvi aprann konn li ek son plan merveye.

21. Akoz i irzan pour nou rann temwannyaz?

²¹ Laplipar nou, nou kapab al kazankaz pour anons sa bon nouvel e fer disip oubyen nou kapab fer li dan lezot fason osi. Alor annou fer tou sa ki nou kapab pour akonpli nou responsabilite konman bann proklanmater Rwayonm e rann temwannyaz “ziska dan bann landrwa pli elwannyen lo later.” Nou bezwen realize ki sa travay i irzan parski nou kapab vwar bann “siny” ki montre ki Kris i la. (Mat. 24:3-14) Nou bezwen servi byen nou letan. Nou “annan bokou keksoz pour fer dan travay Senyer.”​—1 Kor. 15:58.

22. Ki nou devret determinen pour fer anmezir ki nou pe esper zour Zeova arive?

²² Anmezir ki nou pe esper “zour Zeova ki gran e efreyan” arive, annou determinen pour kontinyen rann temwannyaz avek devouman e fidelman. (Zoel 2:31) Si nou fer sa, nou pou trouv en kantite dimoun ki parey bann Zwif Bere ki “ti aksepte parol Bondye avek bokou lentere.” (Akt 17:10, 11) Alor annou kontinyen rann temwannyaz ziska ki dan en sans, nou tann sa parol: “Ou’n byen fer, ou en lesklav ki bon e fidel!” (Mat. 25:23) Si nou fer sa travay fer disip avek devouman e nou reste fidel avek Zeova, nou pou ere pour touzour parski nou ti annan sa privilez pour “rann temwannyaz afon” lo Rwayonm Bondye!