1, 2. Akoz Pol pa sirprann ki i pe ganny persekite Zerizalenm?

 BANN solda fek sov Pol devan en lafoul ankoler e Pol i dan prizon ankor enn fwa Zerizalenm. Sa zapot ki devoue pa sirprann ki i pe ganny sa bann persekisyon Zerizalenm. I ti’n ganny dir ki i “pou ganny anprizonnen e pas dan bann leprev” dan sa lavil. (Akt 20:22, 23) Menm si i pa konn sa ki pou arive avek li pli tar, Pol i konnen ki i pou kontinyen soufer akoz non Zezi.​—Akt 9:16.

² Menm bann profet ki ti Kretyen ti averti Pol ki i ti pou ganny anmare e livre “avek dimoun lezot nasyon.” (Akt 21:4, 10, 11) Pa tro lontan pase, en lafoul Zwif ti esey touy li e deswit apre, i paret ki bann ziz dan Sannedren ti pros pour “touy” li ler zot ti pe argimante akoz sa ki i ti’n dir. Aprezan, bann solda Romen in fer li vin en prizonnyen e i pou ganny plis problenm ankor. (Akt 21:31; 23:10) Pol i byen bezwen ganny ankouraze!

3. Ki mannyer nou ganny ankouraze pour nou kontinyen fer sa travay predikasyon?

³ Dan sa letan lafen, nou konnen ki “tou bann ki oule vin disip Kris Zezi e demontre devosyon pour Bondye dan zot lavi pou osi ganny persekite.” (2 Tim. 3:12) Parfwa, nou osi nou bezwen ganny ankouraze pour nou kontinyen fer sa travay predikasyon. Nou rekonesan ki nou ganny bann lankourazman sorti kot “lesklav fidel e pridan” dan sa bon moman atraver nou bann piblikasyon ek renyon. (Mat. 24:45) Zeova in asir nou ki bann ki opoz sa bon nouvel pa pou reisi. Zot pa pou kapab detri bann serviter Bondye konman en group oubyen anpes zot fer sa travay predikasyon. (Iza. 54:17; Zer. 1:19) Me eski zapot Pol ti ganny ankouraze pour li kapab kontinyen rann temwannyaz afon menm si i ti ganny persekite? Si wi, ki mannyer i ti ganny ankouraze e ki mannyer i ti reazir?

4, 5. Ki lankourazman Pol ti gannyen e akoz sa lankourazman ti dan sa bon moman?

⁴ Apre ki i ti’n ganny sove dan Sannedren, son lannmen swar Pol  ti ganny lankourazman ki i ti byen bezwen. Labib i dir: “Senyer ti vin dir li: ‘Pran kouraz! Parski zis parey ou’n rann temwannyaz afon Zerizalenm konsernan mwan, ou osi devret rann temwannyaz Ronm.’” (Akt 23:11) Sa ki Zezi ti dir Pol, ti ankouraz li e i ti asir li ki i pou ganny sove. Pol ti konnen ki i ti pou reste vivan, i ti pou ariv Ronm e ler i ti pou laba, i ti pou ganny loportinite pour rann temwannyaz lo Zezi.

⁵ Pol ti ganny lankourazman dan sa bon moman. Son lannmen, plis ki 40 zonm Zwif “ti fer en konplo e fer serman ki zot ganny modi si zot manze oubyen bwar avan ki zot touy Pol.” Sa “serman ek konplo” ki sa bann Zwif ti fer ti montre ki zot ti determinen pour touy Pol. Si zot pa ti arive fer sa, zot ti krwar ki zot ti pou ganny modi. (Akt 23:12-15) Bann sef pret ek bann ansyen ti dakor avek sa konplo ki zot ti’n fer. Zot ti anvi fer Pol retourn kot Sannedren pour zot kontinyen demann li kestyon, dan en zar konmsi zot ti anvi konpran Pol pli byen. Me anfet, zot ti pou kasyet e esper li dan semen e ler i ti pou pase, zot ti pou touy li.

6. Ki mannyer konplo pour touy Pol ti ganny dekouver e ki bann zenn ozordi i kapab aprann avek sa resi?

⁶ Par kont, neve Pol ti tande ki zot ti pe fer sa konplo e i ti al dir Pol. Pol ti dir li al rakont sa komandan Romen ki ti apel Klod Lisyas sa ki ti pe arive. (Akt 23:16-22) Nou pa konn non neve Pol, me Zeova i kontan bann zenn ki fer parey li e ki demontre kouraz e met lentere pep Bondye avan sa ki pour zot. Zot osi kontinyen fer tou sa ki zot kapab pour ki sa travay Rwayonm i kontinyen ganny fer.

7, 8. Ki Klod Lisyas ti fer pour protez Pol?

⁷ Dek ki Klod Lisyas ki ti ansarz 1,000 zonm, ti tann konsernan sa konplo pour touy Pol, i ti donn lord pour ki en group 470 solda, bann solda ki ti servi lans ek bann kavalye, i kit Zerizalenm sa zour swar e anmenn Pol sen e sof Sezare. Ler zot ti pou ariv laba, zot ti devret livre li avek Gouverner Feliks. a Menm si i ti annan en kantite Zwif ki ti reste dan lavil Sezare, ki ti sa landrwa enportan pour bann travay ladministrasyon dan Zide pour bann Romen, i ti annan plis dimoun lezot nasyon ki ti reste dan sa lavil. Bann dimoun dan sa lavil pa ti fer problenm, konpare avek bann dimoun dan lavil Zerizalenm ki ti ay lezot larelizyon e zot ti fer en kantite dezord. Sezare ti osi sa landrwa kot bann solda Romen ti ete dan Zide.

⁸ Parey lalwa Romen ti demande, Lisyas ti anvoy en let pour Feliks pour eksplik li sa sityasyon. Lisyas ti dir ki ler i ti tande ki Pol ti en sitwayen Romen, i ti vin sov li pour ki bann Zwif pa “touy li.” I ti osi dir  ki i pa ti’n vwar okenn keksoz ki Pol ti’n fer mal “ki merit lanmor ouswa prizon,” me ki i ti pe livre Pol avek Feliks parski i ti annan en konplo ki ti’n ganny fer kont Pol e konman gouverner i ti pou kapab ekout sa bann dimoun ki ti pe akiz Pol e ziz sa sityasyon.​—Akt 23:25-30.

9. (a) Ki mannyer bann drwa ki Pol ti annan konman en sitwayen Romen pa ti ganny respekte? (b) Akoz parfwa nou servi nou bann drwa ki nou annan konman en sitwayen dan en pei?

⁹ Eski Lisyas ti dir laverite dan sa let? Pa tou keksoz ki i ti dir ki ti vre. I paret ki i ti pe esey montre sa gouverner ki i ti en bon dimoun. Me i pa ti’n vin sov Pol zis akoz i ti’n tande ki Pol ti en sitwayen Romen. An plis ki sa, Lisyas pa ti dir ki i ti’n “anmar . . . [Pol] avek de lasenn” e ki apre i ti donn lord ki Pol i “ganny fwete pour zot konn egzakteman” ki’n arive. (Akt 21:30-34; 22:24-29) Lisyas pa ti respekte bann drwa ki Pol ti annan konman en sitwayen Romen. Ozordi, Satan i servi bann dimoun dan bann larelizyon ki opoz nou, pour persekit nou e anpes nou ador Bondye dan en fason lib. Me parey Pol, parfwa pep Bondye i servi zot bann drwa ki zot annan konman sitwayen dan en pei e zot osi servi lalwa dan sa pei pour protez zot.

10. Ki lakizasyon bann Zwif ti fer kont Pol?

¹⁰ Dan lavil Sezare, Pol ti pe “ganny veye par bann gard dan pale Erod” e i ti pe esper sa bann dimoun ki ti pe akiz li, vini sorti Zerizalenm. (Akt 23:35) Senk zour pli tar, sa bann dimoun ti arive e sa ti Granpret Ananyas, en avoka ki ti apel Tertilis ek en group ansyen. Tertilis ti premyerman felisit Feliks pour sa ki i ti fer pour bann Zwif. I ti pe flat li pour ganny son sipor. b Apre, i ti konmans koz lo Pol e i ti dir: “Sa zonm i fer en ta dezord, i fer bann Zwif revolte partou kote e li menm i sef sekt bann Nazareen. I ti osi esey sali tanp alor nou’n tyonbo li.” Bann lezot Zwif osi “ti donn lanmen akiz li, par dir ki sa bann keksoz ti vre.” (Akt 24:5, 6, 9) En dimoun ki ti fer lezot dimoun revolte, ki ti sef en sekt ki ti danzere e ki ti sali tanp, ti devret ganny touye, parski sa ti bann sarz ki ti grav.

11, 12. Ki mannyer Pol ti montre ki sa bann lakizasyon kont li pa ti vre?

¹¹ Apre sa, zot ti les Pol koze. I ti dir: “Mon kontan pour prezant mon defans.” I ti dir ki sa bann lakizasyon pa ti vre. I pa ti’n sali tanp e i pa  ti’n esey fer bann Zwif revolte. I ti osi dir ki i pa ti dan lavil Zerizalenm pour “en bon pe lannen” e ki i ti’n retourn Zerizalenm pour anmenn “larzan pour ed” bann Kretyen ki ti pov, petet akoz lafanmin ek persekisyon. Pol ti dir ki avan ki i ti antre dan tanp, i ti’n fini fer son “seremoni pirifikasyon” e osi i ti’n fer tou sa ki i ti kapab pour “gard en konsyans kler devan Bondye ek zonm.”​—Akt 24:10-13, 16-18.

¹² Par kont, Pol ti admet ki i ti pe ador Bondye son bann zanset “dapre sa ki zot zot apel en ‘sekt.’” Me i ti osi dir ki i ti krwar “tou sa ki’n ganny ekrir dan Lalwa ek liv bann Profet.” I ti annan sa lespwar ki “dimoun bon konman move pou resisite” e sa bann dimoun ki ti pe akiz li ti krwar sa zot osi. Apre, Pol ti dir sa bann dimoun ki ti pe akiz li: “Les sa bann zonm dir zot menm lo ki keksoz mal ki mon ti ganny trouve koupab ler mon ti ganny zize devan Sannedren, eksepte pour sa sel keksoz ki mon ti dir for ler mon ti devan zot: ‘Mon pe ganny zize parski mon krwar dan rezireksyon!’”​—Akt 24:14, 15, 20, 21.

13-15. Akoz Pol i en bon legzanp konsernan donn en temwannyaz avek lardyes devan bann lotorite?

¹³ Pol in kit en bon legzanp pour nou swiv si en zour nou ganny anmennen devan bann lotorite akoz nou ladorasyon e zot akiz nou e dir ki nou fer dezord, ki nou fer lezot dimoun revolte oubyen ki nou form parti en “sekt danzere.” Pol pa ti esey flat gouverner parey Tertilis ti fer. Pol ti reste kalm e i ti demontre respe. I ti servi bon zizman e i ti donn en temwannyaz ki ti kler e vre. Pol ti dir ki “serten Zwif sorti dan provens Lazi” ki ti’n akiz li konmkwa i ti’n sali tanp, pa ti la  e dapre lalwa, zot ti devret la pour Pol ekout zot bann lakizasyon.​—Akt 24:18, 19.

¹⁴ Sa ki pli enteresan i ki Pol pa ti ezite pour donn en temwannyaz lo son krwayans. Avek lardyes, zapot Pol ti koz ankor lo son krwayans konsernan rezireksyon parski sanmenm sa ki ti fer sa bann problenm ler i ti devan Sannedren. (Akt 23:6-10) Ler Pol ti prezant son defans, i ti koz lo rezireksyon. Akoz? Parski Pol ti pe rann temwannyaz lo Zezi ek Son rezireksyon e sa bann dimoun ki ti opoz li pa ti aksepte sa. (Akt 26:6-8, 22, 23) Anfet, sa topik rezireksyon ti en problenm pour zot, sirtou vi ki zot pa ti krwar dan Zezi e ki i ti’n resisite.

¹⁵ Parey Pol, nou kapab donn en temwannyaz avek lardyes e nou kapab ganny ankouraze avek sa ki Zezi ti dir son bann disip. I ti dir zot: “Tou dimoun pou ay zot akoz zot port mon non. Me sa enn ki’n andire ziska lafen pou ganny sove.” Eski nou devret enkyet konsernan sa ki nou devret dir? Non, parski Zezi ti donn nou sa lasirans ler i ti dir: “Ler zot ganny arete pour ganny anmennen devan lakour, pa bezwen trakase davans ki zot pou dir. Me sa letan zot pou konnen ki pour dir. Dir sanmenm, parski pa zot ki pou koze, me se avek led lespri sen ki zot pou koze.”​—Mark 13:9-13.

16, 17. (a) Ki Feliks ti fer e ki i ti dir ler i ti pe ziz Pol? (b) Akoz Feliks ti per e akoz i ti kontinyen vwar Pol?

¹⁶ Sa pa ti sa premye fwa ki Gouverner Feliks ti’n tann konsernan sa ki bann Kretyen ti krwar ladan. Labib i dir: “Lefet ki Feliks ti konn en bon pe keksoz konsernan sa Semen [zot ti servi sa mo ler zot ti pe koz lo bann Kretyen dan premye syek], i ti anvoy sa zafer pour pli tar e dir: ‘Ler Lisyas, komandan militer i vini, mon pou deside ki mon pou fer avek zot.’ I ti donn lord zofisye larme ki sa zonm i reste an detansyon, me ki zot devret donn li serten laliberte e ki son bann dimoun i devret kapab vin donn li sa ki i bezwen.”​—Akt 24:22, 23.

¹⁷ Detrwa zour pli tar, Feliks ek son madanm Drisil ki ti en Zwif, ti fer Pol vini e i “ti ekout li koz lo son krwayans lo Kris Zezi.” (Akt 24:24) Par kont, ler Pol ti koz konsernan “ladrwatir, kontrol lo son lekor ek sa zizman ki pou vini, Feliks ti per,” petet sa i parski son konsyans ti pe fatig li akoz i ti’n fer bann move keksoz. Alor i ti dir Pol: “Ale pour lemoman, mon pou kriy ou en lot fwa ler mon ganny letan.” Feliks ti vwar Pol plizyer fwa apre sa, pa akoz i ti anvi konn laverite me akoz i ti krwar ki Pol ti pou donn li larzan.​—Akt 24:25, 26.

18. Akoz Pol ti koz avek Feliks ek son madanm konsernan “ladrwatir, kontrol lo son lekor ek sa zizman ki pou vini”?

 ¹⁸ Akoz Pol ti koz avek Feliks ek son madanm konsernan “ladrwatir, kontrol lo son lekor ek sa zizman ki pou vini”? Rapel ki zot ti anvi konn plis lo son “krwayans lo Kris Zezi.” Vi ki Pol ti konnen ki zot ti imoral, kriyel e enzis, i ti montre zot bann keksoz ki en dimoun ki ti anvi vin en disip Zezi ti bezwen fer. Sa ki Pol ti dir ti montre byen kler ki lafason ki Feliks ek Drisil ti viv ti vreman diferan avek bann standar ladrwatir Bondye. Sa ti devret ed zot konpran ki tou dimoun i bezwen rann kont avek Bondye pour sa ki zot mazin lo la, pour sa ki zot dir e pour sa ki zot fer. An plis ki sa, lafason ki Bondye pou ziz zot ti pli enportan ki lafason ki Feliks ti pou ziz Pol. Sanmenm sa Feliks “ti per”!

19, 20. (a) Dan predikasyon, ki nou devret fer si nou zwenn en dimoun ki paret enterese me ki pa anvi sanz son fason viv? (b) Ki mannyer nou konnen ki Feliks pa ti zanmi Pol?

¹⁹ Dan predikasyon, nou kapab zwenn bann dimoun ki parey Feliks. O konmansman, zot kapab paret enterese avek laverite me an realite, zot pa anvi sanz zot fason viv. Alor nou devret fer atansyon ler nou pe esey ed bann dimoun koumsa. Nou devret fer parey Pol e avek respe dir zot konsernan bann standar drwat Bondye. Petet laverite pou tous zot leker. Me si nou remarke ki zot pa anvi sanz zot fason viv, nou devret les zot trankil e rod bann dimoun ki pe vreman rod laverite.

²⁰ Labib i ed nou konpran pli byen motivasyon Feliks. I dir: “Apre ki de-z-an ti’n pase, Porsis Festis ti ranplas Feliks e vi ki Feliks ti oule fer plezir bann Zwif, i ti kit Pol an detansyon.” (Akt 24:27) Feliks pa ti zanmi Pol. Feliks ti konn tre byen ki bann disip “sa Semen” pa ti fer lezot dimoun revolte e ki zot pa ti rebel. (Akt 19:23) I ti osi konnen ki Pol pa ti’n kas okenn lalwa Romen. Me kantmenm sa, Feliks ti kit li dan prizon pour “fer plezir bann Zwif.”

21. Ki ti arive avek Pol ler Porsis Festis ti vin gouverner e kwa ki ti kontinyen ankouraz Pol?

²¹ Parey nou’n vwar dan dernyen verse dan Akt sapit 24, Pol ti ankor dan prizon ler Porsis Festis ti vin gouverner dan plas Feliks. Plizyer fwa Pol ti bezwen al devan diferan zofisye. Sa zapot kouraze ti “ganny anmennen devan bann lerwa ek gouverner.” (Lik 21:12) Parey nou pou vwar, pli tar i pou donn en temwannyaz avek sa dirizan ki ti pli pwisan sa letan. Menm si Pol ti pas dan tou sa bann problenm, Pol pa ti zanmen perdi son lafwa. Nou kapab asire ki i ti ganny ankouraze ler Zezi ti dir li: “Pran kouraz!”