1-3. Ki vizyon Pyer ti gannyen e akoz nou bezwen konpran ki sa vizyon i vedir?

 I LANNEN 36, i sezon lotonn e soley pe tape. Pyer i anler lo twa en lakaz o bor lanmer, pros avek por dan lavil Zope e i pe priye. I fer detrwa zour depi ki i pe reste dan sa lakaz. Vi ki i’n pare pour reste dan sa lakaz, sa i montre ki i pa pe fer lapreferans. Pyer pe reste kot Simon, en travayer lapo e normalman bann Zwif pa ti pou reste kot en dimoun ki fer sa kalite travay. a Me kantmenm sa, Pyer pe al aprann en leson enportan lo lefet ki Zeova pa fer lapreferans.

² Ler Pyer pe priye, i ganny en vizyon. Sa ki i vwar dan sa vizyon ti pou fatig en nenport Zwif. Pyer i vwar en keksoz parey en gran tapi ki pe desann sorti dan lesyel e ladan i annan bann zannimo ki enpir dapre Lalwa. Pyer i tann en lavwa ki dir li touy sa bann zannimo e manz zot, me i dir: “Mon pa’n zanmen manz okenn keksoz sal e enpir.” Sa lavwa i dir Pyer trwa fwa: “Pa bezwen konsider sal sa ki Bondye in pirifye.” (Akt 10:14-16) Sa vizyon i fer Pyer konfize me apre i pou konpran sa ki i’n vwar.

³ Ki sa vizyon ki Pyer ti gannyen i vedir? I enportan pour nou konpran ki sa vizyon i vedir parski sa vizyon i montre nou ki mannyer Zeova i vreman vwar dimoun. Konman bann vre Kretyen, nou pa kapab rann temwannyaz afon lo Rwayonm Bondye si nou pa vwar dimoun parey Zeova i vwar zot. Pour nou kapab konpran ki sa vizyon ki Pyer ti gannyen i vedir, annou vwar sa ki ti arive avan e apre ki i ti ganny sa vizyon.

4, 5. Lekel Korney e ki ti arive ler i ti pe priye?

⁴ Pyer pa ti konnen ki son lavey, dan lavil Sezare ki apepre 50 kilomet nor avek Zope, Bondye ti’n fer en zonm ki ti apel Korney ganny en vizyon li osi. Korney ti en zofisye larme Romen e i ti “byen relizye.” b I ti osi en bon  legzanp dan lafason ki i ti pran swen avek son fanmir parski “li e tou bann ki ti dan son lakour . . . ti annan en gran respe pour Bondye.” Korney pa ti’n konverti dan larelizyon Zwif me i ti en dimoun lezot nasyon ki pa ti’n sirkonsi. Me kantmenm sa, i ti demontre konpasyon anver bann Zwif ki ti bezwen led e i ti donn zot sa ki zot ti bezwen. I ti “sipliy Bondye toultan.”​—Akt 10:2.

⁵ Korney ti pe priy Bondye apepre 3 er apremidi. I ti ganny en vizyon e en lanz ti dir li: “Bondye in mazin ou akoz i’n tann ou bann lapriyer e ou’n ed bann pov.” (Akt 10:4) Zis parey sa lanz ti’n demann li pour fer, Korney ti anvoy bann zonm pour al sers zapot Pyer. Korney ti pe al eksperyans en keksoz ki bann dimoun lezot nasyon ki pa ti’n sirkonsi pa ti ankor eksperyanse. Korney ti pe al ganny sa mesaz delivrans.

6, 7. (a) Donn en legzanp pour montre ki Bondye i reponn lapriyer bann dimoun ki senserman anvi konn laverite lo li. (b) Ki sa bann leksperyans i montre nou?

⁶ Eski ozordi Bondye i reponn lapriyer bann dimoun senser ki vreman anvi konn laverite lo li? Annou vwar en legzanp. En madanm Albani ti aksepte en Latour Veyer ki ti pe koz lo ki mannyer pour elve zanfan. c I ti dir sa Temwen ki ti’n vin kot li: “Ou konnen, mon ti pe priy Bondye pour li ed mwan elve mon bann fiy! Bondye in anvoy ou! Ou’n donn mwan sa lenformasyon spesifik ki mon ti bezwen!” Sa madanm ek son bann fiy ti konmans etidye Labib e pli tar son msye osi ti konmans etidye.

⁷ Eski sa in ariv par azar? Non! Sa bann leksperyans koumsa i toultan arive partou dan lemonn, alor i pa kapab en keksoz ki ariv zis par azar. Me ki sa i montre nou? Premyerman, Zeova i reponn lapriyer bann dimoun ki senserman anvi konn laverite lo li. (1 Rwa. 8:41-43; Ps. 65:2) Dezyenmman, bann lanz pe siport nou dan sa travay predikasyon.​—Rev. 14:6, 7.

8, 9. Ki lespri sen ti fer Pyer konnen e ki mannyer Pyer ti azir?

⁸ Ler Pyer ti ankor anler lo twa lakaz e “pe demann son lekor ki sinifikasyon sa vizyon,” bann zonm ki Korney ti’n anvoye ti vin kot sa lakaz kot i ti ete. (Akt 10:17) Eski Pyer, ki ti’n dir trwa fwa ki i pa pou manz bann keksoz ki ganny konsidere enpir dapre Lalwa, ti pou pare pour li al avek sa bann zonm e antre dan lakaz en dimoun lezot nasyon? Bondye ti servi son lespri sen e fer Pyer konn son lavolonte dan sa sityasyon. Pyer ti ganny dir: “Gete! I annan trwa zonm ki pe rod ou. Alor, leve, desann anba e al avek zot, pa bezwen annan okenn dout parski mwan ki’n anvoy zot.” (Akt 10:19, 20) Sirman, sa vizyon ki Pyer ti’n fek gannyen konsernan sa keksoz parey en gran tapi ti prepar li pour aksepte gidans lespri sen.

⁹ Ler Pyer ti tande ki Bondye ki ti’n demann Korney pour vin sers li, Pyer ti envit sa bann mesaze lezot nasyon, pour antre anndan “e i ti fer zot reste avek li.” (Akt 10:23a) Zapot Pyer ki ti en dimoun obeisan, ti’n fini konmans sanz son pwennvi ler i ti’n konpran sa vizyon konsernan lavolonte Bondye.

10. Ki mannyer Zeova i diriz son pep e ki kestyon nou devret demann nou lekor?

¹⁰ Ziska ozordi, Zeova pe diriz son pep e deplizanpli i pe fer bann keksoz vin pli kler. (Prov. 4:18) Zeova i servi son lespri sen pour gid “lesklav fidel e pridan.” (Mat. 24:45) Parfwa, nou kapab ganny serten leklersisman lo lafason ki nou konpran Parol Bondye oubyen i kapab annan serten sanzman dan lafason ki lorganizasyon Zeova i marse. Ler sa i arive, nou devret demann nou lekor: ‘Ki mannyer mon reazir ler i annan sa bann sanzman? Eski mon les lespri sen Bondye gid mwan pour aksepte sa bann sanzman?’

11, 12. Ki Pyer ti fer ler i ti ariv Sezare e ki i ti aprann?

¹¹ Son lannmen apre ki Pyer ti ganny sa vizyon, Pyer ek nef lezot dimoun, setadir sa trwa mesaze ki Korney ti’n anvoye ek “sis frer [Zwif]” sorti Zope, ti al Sezare. (Akt 11:12) Vi ki Korney ti pe esper Pyer, i ti rasanble “son bann fanmir ek zanmi pros.” Aparaman zot tou zot ti bann dimoun lezot nasyon. (Akt 10:24) Ler Pyer ti arive, i ti fer en keksoz ki i pa ti’n zanmen krwar i pou fer. I ti antre dan lakaz en dimoun ki pa ti’n sirkonsi! Pyer ti dir: “Zot konn byen ki i kont lalwa pour en Zwif frekant oubyen vin kot en zonm en lot ras. Pourtan Bondye in montre mwan ki mon pa devret konsider okenn zonm sal oubyen enpir.” (Akt 10:28) Aprezan Pyer ti’n konpran ki sa vizyon ki i ti’n gannyen pa ti pe zis ansenny li en leson lo bann diferan kalite manze ki en dimoun i kapab manze me osi ki i “pa devret konsider okenn zonm [menm si i en dimoun lezot nasyon] sal.”

 ¹² Tou dimoun ki ti la ti anvi ekout sa ki Pyer ti annan pour dir. Korney ti dir: “Nou tou nou la devan Bondye pour ekout tou sa ki Zeova in dir ou dir.” (Akt 10:33) Zis mazinen ki mannyer ou ti pou santi si en dimoun ki anvi aprann konn Zeova i dir ou en keksoz koumsa! Pyer ti koz avek konviksyon e i ti dir: “La aprezan mon vreman konpran ki Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.” (Akt 10:34, 35) Pyer ti aprann ki Bondye pa get dimoun dapre zot ras, nasyonalite oubyen laparans. Apre sa, Pyer ti konmans rann temwannyaz lo travay predikasyon ki Zezi ti fer, lo son lanmor ek son rezireksyon.

13, 14. (a) Ler Korney ek lezot dimoun lezot nasyon ti konverti lannen 36, ki sa ti montre? (b) Akoz nou pa devret ziz bann dimoun dapre zot laparans?

¹³ Aprezan, en keksoz ki pa’n zanmen arive ti arive pour premye fwa: “Ler Pyer ti ankor pe [koze], . . . dimoun lezot nasyon ti pe ganny lespri sen.” (Akt 10:44, 45) Sa i sa sel fwa ki Labib i dir ki bann dimoun ti ganny lespri sen avan ki zot batize. Pyer ti realize ki sa ti montre ki zot ti annan laprouvasyon Bondye, alor “i ti demann zot [sa group dimoun lezot nasyon] pour batize.” (Akt 10:48) Ler sa bann dimoun lezot nasyon ti konverti lannen 36, sa ti montre ki Bondye ti nepli konsider bann Zwif konman son pep spesyal. (Dan. 9:24-27) Pyer ti profit sa lokazyon pour li servi sa trwazyenm e dernyen “lakle rwayonm.” (Mat. 16:19) Sa lakle ti donn bann dimoun lezot nasyon ki pa ti’n sirkonsi sa loportinite pour vin bann Kretyen swazir.

¹⁴ Ozordi, konman bann proklanmater Rwayonm, nou rekonnet ki “Bondye pa fer lapreferans.” (Rom. 2:11) I lavolonte Bondye ki “tou sort kalite dimoun i ganny sove.” (1 Tim. 2:4) Alor, nou pa devret zanmen ziz dimoun dapre zot laparans. Nou annan sa travay pour rann temwannyaz afon lo Rwayonm Bondye e sa i enplik anons sa bon nouvel avek tou dimoun san get zot ras, nasyonalite, laparans oubyen zot larelizyon.

15, 16. Akoz serten Kretyen Zwif ti kritik Pyer e ki mannyer i ti eksplik sa ki i ti’n fer?

¹⁵ San dout, Pyer ti enpasyan pour rakont lezot sa ki ti’n arive, alor i ti al Zerizalenm. I paret ki bann dimoun Zerizalenm ti’n tann sa nouvel konsernan bann dimoun lezot nasyon ki ti’n “aksepte parol Bondye” avan ki Pyer ti’n ariv laba. Dek ki Pyer ti arive, “bann ki ti an faver sirkonsizyon ti konmans kritik li.” Zot pa ti kontan ki Pyer ti’n al dan “lakaz bann zonm ki pa sirkonsi e [i ti’n] manz avek zot.” (Akt 11:1-3) I pa ti en problenm pour zot ki bann dimoun lezot nasyon i vin bann disip Kris, me plito, zot ti pe ensiste ki dimoun lezot nasyon i devret obei Lalwa, ki ti demann bann dimoun pour sirkonsi, pour zot kapab ador Zeova dan en fason akseptab. I kler ki i ti difisil pour serten disip Zwif aret swiv Lalwa Moiz.

 ¹⁶ Ki mannyer Pyer ti eksplik sa ki i ti’n fer? Dapre Akt 11:4-16, Pyer ti koz lo kat keksoz ki ti montre ki Zeova pe diriz sa ki ti pe arive: (1) Bondye ti fer li ganny en vizyon (Verse 4-10), (2) lespri sen ti dir li ki pour fer (Verse 11, 12), (3) lanz ti vizit Korney (Verse 13, 14) e (4) bann dimoun lezot nasyon ti ganny lespri sen. (Verse 15, 16) Pour fini, Pyer ti demann en kestyon vreman enportan: “Alor, si Bondye in donn zot [bann dimoun lezot nasyon ki krwar dan Zezi] sa menm kado [lespri sen] ki i’n donn nou [bann Zwif], nou ki’n krwar dan Senyer Zezi Kri, ki mwan mon ete pour anpes Bondye azir?”​—Akt 11:17.

17, 18. (a) Ki desizyon bann Kretyen Zwif ti bezwen fer apre sa ki Pyer ti’n dir? (b) Akoz i kapab difisil pour gard linite dan kongregasyon e ki kestyon nou devret demann nou lekor?

¹⁷ Sa ki Pyer ti dir ti fer sa bann Kretyen Zwif pran en desizyon. Eski zot ti pou kapab aret ziz lezot dimoun e aksepte sa bann dimoun lezot nasyon ki ti’n fek batize konman zot bann frer ek ser Kretyen? Sa resi i osi dir: “Ler zot [bann zapot ek lezot Kretyen Zwif] ti tann sa bann keksoz, zot ti aret argimante e zot ti glorifye Bondye: ‘Alor savedir Bondye in osi donn dimoun lezot nasyon loportinite pour repantir e ganny lavi.’” (Akt 11:18) Sa bon leta lespri ki zot ti demontre ti gard linite dan kongregasyon.

¹⁸ Ozordi, i kapab difisil pour bann vre serviter Bondye gard linite akoz zot sorti “dan tou nasyon, tribi, pep ek langaz.” (Rev. 7:9) Sanmenm sa dan en kantite kongregasyon i annan diferan ras dimoun, kiltir e zot tou zot in grandi dan diferan fason. Alor nou devret demann nou lekor: ‘Eski mon pe ziz lezot dimoun dan mon leker? Eski mon determinen pour pa zanmen les bann move keksoz dan sa lemonn ki fer divizyon parey lafyerte pour mon pei, pour mon tribi, mon kiltir ek mon ras, enfliyans lafason ki mon tret mon bann frer ek ser dan kongregasyon?’ Pa oubliy sa ki ti arive avek Pyer (Sefas) detrwa lannen pli tar apre ki bann premye dimoun lezot nasyon ti konverti. Pyer ti fer parey bann dimoun ki ti ziz lezot e i ti “aret frekant . . . e manz avek” bann dimoun lezot nasyon ki ti’n vin Kretyen e zapot Pol ti bezwen koriz li.  (Gal. 2:11-14) Annou toultan veye ki nou pa tonm dan sa pyez pour ziz lezot dimoun.

19. Avek ki bann Kretyen dan lavil Antyos ti konmans prese e ki rezilta zot ti gannyen?

¹⁹ Eski bann disip Zezi ti konmans pres avek bann dimoun lezot nasyon ki pa ti’n sirkonsi? Annou get sa ki ti arive pli tar dan lavil Antyos, Siri. d Menm si i ti annan en kantite Zwif ki ti reste dan sa lavil, bann Zwif ek bann dimoun lezot nasyon ti viv byen avek kanmarad. Alor Antyos ti en bon teritwar pour bann Kretyen pres avek bann dimoun lezot nasyon. I ti dan sa lavil ki serten disip Zwif ti konmans anons sa bon nouvel avek “dimoun ki koz Grek.” (Akt 11:20) Zot pa ti pres zis avek bann Zwif ki ti koz Grek me osi avek bann dimoun lezot nasyon ki pa ti’n sirkonsi. Zeova ti beni sa travay e “en kantite dimoun ti vin disip.”​—Akt 11:21.

20, 21. Ki mannyer Barnabas ti montre ki i ti konn son limit e ki mannyer nou osi nou kapab montre ki nou konn nou limit ler nou dan predikasyon?

²⁰ Kongregasyon Zerizalenm ti fer Barnabas al Antyos pour li pres avek bann dimoun dan sa lavil ki ti pare pour ekout sa bon nouvel. Me i ti telman annan en kantite dimoun ki ti enterese avek sa bon nouvel ki i ti difisil pour Barnabas fer sa travay li tousel. Alor, lekel sa pli bon dimoun ki ti pou kapab ed Barnabas apard ki Sol ki pli tar ti vin en zapot pour bann nasyon? (Akt 9:15; Rom. 1:5) Eski Barnabas ti pou krwar ki Sol ti pe vin fer konpetisyon avek li? Non, o kontrer Barnabas ti montre ki i ti konn son limit. I ti deside pour al Tarsis pour rod Sol e i ti retourn avek li Antyos pour Sol ed li. Pour en lannen antye zot tou le de zot ti ankouraz bann disip dan sa kongregasyon.​—Akt 11:22-26a.

²¹ Ki mannyer nou kapab montre ki nou konn nou limit ler nou dan predikasyon? Nou tou nou annan nou bann pwen for ek nou bann abilite. Par egzanp, i annan dimoun ki vwar li fasil pour donn en temwannyaz enformel oubyen pres kazankaz me zot vwar li difisil pour fer bann retourn vizit oubyen konmans bann letid Labib. Si ou ti pou kontan amelyore dan serten laspe predikasyon, akoz ou pa demann led? Ler ou fer sa, ou pou kapab ganny bann pli bon rezilta dan predikasyon e ou pou osi ganny plis lazwa.​—1 Kor. 9:26.

22, 23. Ki bann disip dan lavil Antyos ti fer pour montre ki zot kontan kanmarad e ki mannyer pep Bondye ozordi pe fer parey zot?

²² Premye fwa ki “bann disip ti ganny apele Kretyen atraver gidans Bondye” ti Antyos. (Akt 11:26b) Sa non i apropriye akoz i dekri byen bann disip Kris ki viv zot lavi par swiv legzanp Kris. Ler bann dimoun lezot  nasyon ti vin bann Kretyen, eski bann Kretyen Zwif ti vin pli pros avek zot? Annou vwar sa ki ti arive ler i ti annan en gran lafanmin lannen 46. e Sa letan, lafanmin ti afekte bann pov en kantite akoz zot ti napa larzan oubyen manze. I paret ki en kantite Kretyen Zwif ki ti pe reste Zide ti pov e pandan sa lafanmin, zot ti bezwen manze ek lezot keksoz. Ler bann Kretyen Antyos, enkli dimoun lezot nasyon ki ti Kretyen ti tann sa, zot ti “anvoy led pour zot bann frer ki ti pe reste Zide.” (Akt 11:29) Pa sa i en zoli fason pour demontre lanmour pour kanmarad!

²³ Ozordi osi i parey parmi pep Bondye. Ler nou tande ki nou bann frer ek ser dan en lot pei oubyen kot nou reste i bezwen led, nou pare pour fer tou sa ki nou kapab pour ed zot. Ler i annan bann dezas natirel, enkli siklonn, tranblemandter ek tsounami, deswit bann Komite Biro Brans i organiz bann Komite Sekour pour ed nou bann frer ek ser ki bezwen led. Tou sa ki nou fer pour ed nou bann frer ek ser i montre ki nou vreman enterese avek zot.​—Zan 13:34, 35; 1 Zan 3:17.

24. Ki mannyer nou kapab montre ki nou pran o serye sa vizyon ki Pyer ti gannyen?

²⁴ Konman bann vre Kretyen, nou pran o serye sa vizyon ki Pyer ti gannyen ler i ti lo twa en lakaz dan lavil Zope dan premye syek. Nou ador en Bondye ki pa fer lapreferans. I son lavolonte ki nou rann en temwannyaz afon lo son Rwayonm e sa i enplik anons sa bon nouvel avek tou dimoun san get zot ras, zot nasyonalite ek zot pozisyon dan lasosyete. Alor, annou determinen pour donn tou dimoun ki pare pour ekoute sa loportinite pour aksepte sa bon nouvel.​—Rom. 10:11-13.