1-4. Ki problenm Pyer ti fer fas avek e ki mannyer ou ti pou santi si ou ti dan son plas?

 EN GRAN baro feray i fermen par deryer Pyer e i fer en gro tapaz. Pyer i dan lasenn ant de solda Romen e zot anmenn li dan kaso. Pyer i esper plizyer erdtan e petet zour pour li konnen ki pou arive avek li. I napa bokou keksoz pour Pyer gete dan sa kaso apard miray, bann bar, son bann lasenn ek bann solda.

² Pyer i ganny en move nouvel. Lerwa Erod Agripa 1 i determinen pour touy Pyer. a Anfet, i anvi anmenn Pyer devan lafoul apre Lapak, parski son lanmor i pou en kado ki zot pou kontan. Sa pa ti zis en menas. Pa bokou letan pase, sa lerwa ti’n osi touy Zak ki ti en zapot parey Pyer.

³ Pyer i dan kaso, son lannmen i sipoze ganny touye. Ki Pyer pe mazinen dan sa fernwanr? Eski i pe mazin sa ki Zezi ti dir li detrwa lannen pase ki en zour i ti pou ganny anmare e ganny anmennen kot i pa anvi ale pour ganny touye? (Zan 21:18, 19) Petet Pyer pe mazinen si sanmenm sa ki pe arive.

⁴ Si ou ti dan plas Pyer, ki mannyer ou ti pou santi? En kantite dimoun ti pou dekouraze e zot ti pou santi ki zot napa lespwar. Me eski i annan en sityasyon kot en vre disip Zezi Kri i napa ditou lespwar? Ki nou kapab aprann avek lafason ki Pyer ek lezot Kretyen ti reazir ler zot ti ganny persekite? Annou vwar.

5, 6. (a) Akoz Lerwa Erod Agripa 1 ti persekit kongregasyon Kretyen e ki mannyer i ti fer sa? (b) Akoz lanmor Zak ti teste kongregasyon?

⁵ Parey nou’n aprann dan sapit 9 dan sa liv, Korney ek son fanmir ki ti bann dimoun lezot nasyon ti vin bann Kretyen e kongregasyon ti vreman kontan. Me i bezwen ki bann Zwif ki pa ti Kretyen ti soke ler zot ti  konnen ki en kantite Kretyen Zwif ti pe ador Bondye ansanm avek bann Kretyen ki pa ti Zwif.

⁶ Erod en politisyen ki ti malen, ti vwar en loportinite pour fer plezir bann Zwif, alor i ti konmans persekit bann Kretyen. San dout, Erod ti’n bezwen tande ki zapot Zak ti vreman pros avek Zezi Kri. Alor i “ti touy Zak frer Zan avek lepe.” (Akt 12:2) Sa ti vreman teste kongregasyon! Zak ti parmi sa trwa zapot ki ti vwar ler laparans Zezi ti sanze e i ti osi vwar lezot mirak ki lezot zapot pa ti’n vwar. (Mat. 17:1, 2; Mark 5:37-42) Zezi ti apel Zak ek son frer Zan “Bann Garson Loraz” akoz zot ti vreman devoue. (Mark 3:17) Alor, kongregasyon ti perdi en dimoun ki ti annan lardyes, en temwen fidel e en zapot ki zot ti vreman kontan.

7, 8. Ki kongregasyon ti fer ler Pyer ti ganny met dan prizon?

⁷ Bann Zwif ti kontan ler Zak ti ganny touye e sanmenm sa ki Agripa ti anvi. Sa ti fer li anvi fer menm parey avek Pyer. Parey nou’n vwar o konmansman sa sapit, i ti fer Pyer ganny arete. Me petet Agripa ti rapel ki dan lepase i ti annan bann mirak ki ti arive kot bann zapot ti sorti dan prizon, parey nou ti vwar dan Sapit 5 dan sa liv. Erod ti anvi fer sir ki Pyer pa kapab sove, alor i ti fer Pyer ganny anmare ant 2 solda e i ti fer 16 solda vey li sakenn son tour lizour konman aswar pour fer sir ki i pa sove. Si Pyer ti sove, sa bann solda ti pou ganny touye dan plas Pyer. Ki bann lezot Kretyen ti pou fer dan sa sityasyon difisil?

⁸ Kongregasyon ti konn tre byen sa ki zot devret fer. Akt 12:5 i dir: “Pandan ki Pyer ti dan prizon, kongregasyon ti priy Bondye en kantite pour li.” Wi, zot ti priy en kantite pour zot frer ki zot ti vreman kontan.  Zot pa ti dekouraze menm si Zak ti’n mor e zot pa ti santi ki lapriyer ti napa valer. Bann lapriyer i vreman enportan pour Zeova. I reponn bann lapriyer ki annakor avek son lavolonte. (Ebr. 13:18, 19; Zak 5:16) Sa i en leson enportan pour bann Kretyen ozordi.

9. Ki nou kapab aprann avek legzanp bann Kretyen dan premye syek konsernan lapriyer?

⁹ Eski ou konn bann frer ek ser ki pe pas dan plizyer problenm? I kapab ki zot pe ganny bann persekisyon oubyen gouvernman in enterdi travay predikasyon dan zot pei oubyen zot in ganny afekte avek bann dezas natirel. Alor, annou priy pour zot. I kapab ki ou konn lezot frer ek ser ki pe pas dan lezot problenm ki lezot dimoun pa konnen, par egzanp problenm dan zot fanmir, dekourazman oubyen serten difikilte ki zot pe fer fas avek akoz zot lafwa. Si ou reflesir byen avan ou fer lapriyer, ou pou kapab mazin plizyer dimoun e mansyonn zot non ler ou koz avek Zeova, “sa Enn ki ekout lapriyer.” (Ps. 65:2) Apre tou, ou osi ou bezwen ou bann frer ek ser pour fer menm parey pour ou ler ou pas dan problenm.

10, 11. Dekri lafason ki lanz Zeova ti fer Pyer sorti dan prizon.

¹⁰ Eski Pyer ti enkyet pour sa sityasyon ki i ti ladan? Nou pa vreman konnen, me pandan sa dernyen lannwit ki Pyer ti dan prizon, Pyer ti dan en profon sonmey ant sa de solda ki ti pe vey li. Pyer ki ti annan lafwa ti konnen ki nenport kwa ki ti pou arive son lannmen, Zeova ti pou pran swen avek li. (Rom. 14:7, 8) Me kantmenm sa, Pyer pa ti kapab imazin sa ki ti pe al arive. En sel kou, en lalimyer ti klere dan son kaso. En lanz ti pe debout me bann solda pa ti vwar li. Deswit sa lanz ti  lev Pyer. Sa bann lasenn dan son lanmen ki ti paret vreman for ti zis tonm ater!

¹¹ Sa lanz ti donn Pyer bann lord spesifik. I ti dir: “Depese, leve! . . . Met ou lenz ek ou sandalet. . . . Met ou manto.” Deswit Pyer ti fer sa ki sa lanz ti dir li. Finalman, sa lanz ti dir: “Swiv mwan” e sanmenm sa ki Pyer ti fer. Zot ti sorti dan sa kaso, zot ti pas devan sa group gard ki ti deor e san fer tapaz, zot ti al kot sa gran baro feray. Ki mannyer zot pou kapab pas dan sa baro? Si Pyer ti pe demann son lekor sa kestyon, i ti pou al konn larepons dan en pti moman. Ler zot ti ariv kot baro, i ti zis ouver “tousel.” Avan ki Pyer ti konpran sa ki ti pe arive, zot ti’n fini pas dan sa baro e zot ti’n ariv dan semen e apre, sa lanz ti disparet. Ler Pyer ti dan semen, en sel kou i ti realize ki tou sa ki ti’n pase ti’n vreman arive. I pa ti en vizyon. Pyer ti lib!​—Akt 12:7-11.

12. Akoz i kapab ankouraz nou ler nou reflesir lo ki mannyer Zeova ti sov Pyer?

¹² Pa i vreman rekonfortan ler nou medit lo ki mannyer Zeova i servi son gran pwisans pour sov son bann serviter? Sa lerwa ki ti’n met Pyer dan prizon ti pe ganny sipor sa gouvernman pli pwisan ki ti’n deza egziste dan lemonn. Me pourtan, i ti fasil pour Pyer sorti dan prizon! Byensir, Zeova pa fer sa bann kalite mirak pour tou son bann serviter. I pa ti fer mirak pour Zak, ni menm pour Pyer ler sa ki Zezi ti dir konsernan sa zapot ti ganny akonplir pli tar. Ozordi, bann Kretyen pa ekspekte ki Zeova pou fer mirak pour sov zot. Me kantmenm sa, nou devret gard antet ki Zeova pa’n sanze. (Mal. 3:6) Byento, Zeova pou servi son Garson pour tir plizyer milyon dimoun ki dan sa prizon kot zot pa kapab sorti, setadir lanmor. (Zan 5:28, 29) Nou kapab ganny en kantite kouraz si nou reflesi lo sa bann promes ler nou pas dan bann problenm ozordi.

13-15. (a) Ki mannyer bann frer ek ser ki ti’n zwenn ansanm kot lakaz Mari ti reazir ler zot ti vwar Pyer? (b) Ki liv Akt i konsantre lo la apre sa ki ti’n arive e ki Pyer ti kontinyen fer pour bann frer ek ser?

¹³ Pyer ti debout dan semen dan fernwanr pe reflesi kote i pou ale. Apre i ti deside kot i pou ale. I ti annan en madanm Kretyen ki ti apel Mari ki pa ti reste tro lwen. Mari ti en vev e i ti ris. I ti annan en lakaz ki ti ase gran pour en kongregasyon kapab rasanble kot li. Mari ti manman Zan Mark ki ganny mansyonnen pour premye fwa dan liv Akt. Pli tar, Zan Mark ti vin parey en garson pour Pyer. (1 Pyer 5:13) Sa menm zour swar, menm si i ti tar, en kantite frer ek ser dan sa kongregasyon ti kot Mari e zot ti pe priy en kantite. San dout, zot ti pe priye pour Pyer ganny large me zot pa ti ekspekte ki Zeova ti pou reponn zot lapriyer dan sa fason!

 ¹⁴ Pyer ti tap baro sa lakour ki devan sa lakaz. En servant ki ti apel Roda ti vin kot baro. Sa non Roda i vedir “Roz” dan langaz Grek. I pa ti kapab krwar sa ki i ti pe tande. Sa ti lavwa Pyer! I ti telman kontan ki dan plas ouver baro, i tay dan lakaz e kit Pyer deor e i ti al esey konvenk bann frer ek ser ki Pyer ti deor. Zot ti dir li ki i ti pe perdi latet me i ti determinen. I ti kontinyen ensiste ki sa ki i ti pe dir zot ti vre. Serten ti dir ki petet i’n vwar en lanz ki ti pe reprezant Pyer. (Akt 12:12-15) Pandan tou sa letan, Pyer ti pe kontinyen tap baro ziska ki zot ti al ouver sa baro.

¹⁵ Ler zot ti ouver baro, “zot ti vwar li e zot ti etonnen”! (Akt 12:16) Zot ti telman kontan ki Pyer ti bezwen demann zot pour reste trankil pour li kapab rakont zot sa ki ti’n arive. Pyer ti dir zot rakont Zak ek lezot frer sa ki ti’n arive. Apre sa, Pyer ti ale avan ki bann solda Erod ti vin rod li. Pyer ti al dan en lot landrwa kot i ti pou pli an sekirite pour li kontinyen servi Zeova. Dernyen fwa ki liv Akt i koz lo Pyer i dan sapit 15 ler i ti ede rezourd sa problenm konsernan sirkonsizyon. Apre, liv Akt i konsantre lo travay ek bann vwayaz zapot Pol. Me kantmenm sa, nou kapab asire ki Pyer ti ranforsi lafwa son bann frer ek ser nenport landrwa kot i ti ale. Ler Pyer ti kit bann frer ek ser ki ti kot lakaz Mari, zot ti dan lazwa.

16. Akoz nou kapab asire ki a lavenir nou pou pli zwaye?

¹⁶ Parfwa Zeova i donn son bann serviter bokou plis keksoz ki zot ti pe ekspekte e sa i fer zot sitan zwaye ki zot pa oule krwar sa ki’n arive. Koumsanmenm bann frer ek ser ti santi sa zour swar. Parfwa nou osi nou kapab santi menm parey ler nou ganny bann benediksyon Zeova ozordi. (Prov. 10:22) Dan lavenir, nou pou vwar tou bann promes Zeova ganny akonplir dan lemonn antye. Ler sa pou arive, i pou plis ki sa ki nou kapab imazinen ozordi. Alor, si nou kontinyen reste fidel, nou pou kapab asire ki nou pou pli zwaye dan lavenir.

17, 18. Akoz lafoul ti esey ponp Erod?

¹⁷ Erod osi ti etonnen ler i ti konnen ki Pyer ti’n sove e sa ti fer li ankoler. Deswit, i ti donn lord pour rod Pyer partou e apre i ti donn lord pour kestyonn sa bann solda ki ti pe vey Pyer. Sa bann solda ti “ganny pini,” petet zot ti ganny touye. (Akt 12:19) Erod Agripa pa ti en dimoun ki ti annan konpasyon oubyen pitye. Eski sa zonm kriyel pa ti ganny pini?

¹⁸ I kapab ki Agripa ti santi ki i ti’n ganny imilye akoz i pa’n kapab touy Pyer me pa bokou letan apre i ti revin arogan. I ti annan en problenm ki ti arive ki apre son bann lennmi ti anvi fer lape avek li, alor i ti anvi fer en diskour devan en kantite dimoun. Lik i dir ki “Erod ti met  son lenz rwayal.” En istoryen Zwif ki apel Josephus ti ekri ki sa lenz ki Erod ti’n mete ti ganny fer annarzan, pour ki ler lalimyer ti kler lo lerwa, i ti klate pour ki dimoun i krwar i en bondye. Apre, sa politisyen arogan ti fer en diskour. Lafoul ti esey ponp li par dir: “Lavwa en bondye sa, pa lavwa en zonm!”​—Akt 12:20-22.

19, 20. (a) Akoz Zeova ti pini Erod? (b) Ki mannyer sa resi konsernan lafason ki Erod Agripa ti mor en sel kou, i kapab rekonfort nou?

¹⁹ Zis Bondye ki devret ganny sa kalite laglwar e Bondye ti pe get sa ki ti pe pase. Erod ti annan sa loportinite pour li evit sa maler ki ti pou arive. I ti’n kapab reprimann lafoul oubyen i ti’n kapab montre ki i pa dakor avek sa ki zot ti pe dir. Me plito, sa ki i ti fer ti montre ki sa ki Proverb 16:18 i dir i vre: “Avan maler, i annan lorgey.” “Deswit lanz Zeova ti frap li.” Sa zonm orgeye ti soufer e mor dan en fason terib. “Lever ti manz li e i ti mor.” (Akt 12:23) Josephus osi ti ekri ki Agripa ti ganny frape deswit e ki sa lerwa ti konnen ki i ti pe mor akoz i ti’n les lafoul ponp li. Josephus ti ekri ki Agripa ti kontinyen soufer pour senk zour avan ki i mor. b

²⁰ Parfwa, i paret ki bann move dimoun i kapab fer bann keksoz mal me zot pa zanmen ganny pini. Sa pa sirprann nou vi ki “lemonn antye i anba kontrol sa enn move.” (1 Zan 5:19) Me parfwa ler bann serviter Bondye ki fidel i vwar ki bann move dimoun pa ganny pini pour sa ki zot fer, sa i kapab fatig zot. Sa i en rezon akoz bann resi ki parey sa enn ki nou’n fek vwar i kapab rekonfort nou. Anfet, nou vwar ki Zeova pe pran aksyon e i rapel tou son bann serviter ki i kontan lazistis. (Ps. 33:5) Byento i pou fer ki i annan lazistis.

21. Ki sa leson enportan nou aprann dan Akt sapit 12 e akoz sa i kapab ankouraz nou ozordi?

²¹ Sa resi i montre nou en leson ki byen ankourazan e sa i: “Parol Zeova ti kontinyen propaz partou e bokou dimoun ti vin disip.” (Akt 12:24) Lafason ki sa travay predikasyon ti kontinyen ganny fer dan lezot landrwa, i fer nou rapel ki mannyer Zeova in beni sa menm travay ki pe ganny fer ozordi. Sa resi dan Akt sapit 12 pa pe koz zis lo lanmor en zapot e ler en lot zapot ti ganny sove. Me i osi koz lo Zeova e lo ki mannyer i’n anpes Satan detri kongregasyon Kretyen e aret sa travay predikasyon. Satan pa’n reisi fer sa bann keksoz, zis parey i pa pou arive akonpli tou son bann plan. (Iza. 54:17) De lot kote, sa bann ki lo kote Zeova ek Zezi Kri pe fer en travay ki pou toultan reisi. Pa sa i ankourazan? Ozordi, nou annan sa privilez pour ede fer “parol Zeova” propaze!