1-3. (a) Lekel sa dimoun ki Pol ti pe vwayaz avek e ki kalite dimoun i ete? (b) Ki nou pou aprann dan sa sapit?

 ANMEZIR ki zot pe marse lo semen ant bann lavil, zapot Pol i get sa garson ki pe marse a kote li. Sa garson i apel Timote. Timote i ankor zenn e i annan en kantite lenerzi, petet i pros pour ganny 20 an oubyen i’n fek ganny 20 an. Pli zot ale, pli Timote i al pli lwen avek son lakour. Anmezir lazournen i fini, zot al pli lwen avek lavil Lis ek Ikonyonm. Ki pou arive apre? Pol i konnen kwa ki kapab arive, parski sa i son dezyenm vwayaz misyonner. I konnen ki i pou annan en kantite danze ek problenm. Ki mannyer Timote pou fer fas avek tousala?

² Pol i annan konfyans dan Timote, petet menm plis ki Timote i annan konfyans dan son prop lekor parski i annan limilite. Bann keksoz ki’n arive pa tro lontan pase in fer Pol realize ki i pou bezwen annan en dimoun ki i kapab depan lo la pour vwayaz avek li. Pol i konnen ki sa travay ki zot pe al fer, setadir vizit bann kongregasyon e ankouraz zot, pou demann en kantite determinasyon e zot pou bezwen travay ansanm dan linite avek lezot. Akoz Pol i santi koumsa? Sa i kapab akoz sa problenm ki ti arive ant Pol ek Barnabas pli boner ki ti fer zot aret travay ansanm.

³ Dan sa sapit, nou pou vwar sa pli bon fason pour rezourd bann problenm. Nou pou osi vwar akoz zapot Pol ti swazir Timote pour vwayaz avek li e nou pou konpran pli byen sa rol enportan ki bann sirveyan rezyonal i annan ozordi.

4. Ki Pol ti pe mazin fer pandan son dezyenm vwayaz misyonner?

⁴ Dan sa sapit avan, nou ti vwar ki mannyer kat frer, setadir Pol, Barnabas, Zida ek Silas, ti ankouraz kongregasyon Antyos ler zot ti fer sa kongregasyon konn sa desizyon ki konsey direkter ti’n pran konsernan sirkonsizyon. Ki Pol ti fer apre sa? I ti koz avek Barnabas lo son nouvo plan. I ti dir li: “Annou retournen aprezan e al vizit bann frer dan tou  lavil ki nou’n anons parol Zeova e vwar ki mannyer zot ete.” (Akt 15:36) Pol pa ti pe koz lo fer zis en pti vizit kot sa bann nouvo Kretyen. Liv Akt i montre akoz zapot Pol ti fer son dezyenm vwayaz misyonner. Premyerman, i ti pou kapab kontinyen fer bann frer ek ser konn bann desizyon ki konsey direkter i fer. (Akt 16:4) Dezyenmman, konman sirveyan rezyonal, Pol ti determinen pour ankouraz bann kongregasyon e ed zot lafwa vin pli for. (Rom. 1:11, 12) Ki mannyer lorganizasyon Temwen Zeova ozordi i swiv legzanp bann zapot?

5. Ki mannyer Konsey Direkter ozordi i gid e ankouraz bann kongregasyon?

⁵ Ozordi, Kris i servi Konsey Direkter Temwen Zeova pour diriz son kongregasyon. Atraver bann let, bann piblikasyon ki swa in ganny enprimen oubyen lo Enternet, renyon ek lezot mwayen kominikasyon, sa bann Kretyen swazir ki fidel i gid e ankouraz tou bann kongregasyon partou dan lemonn. Konsey Direkter i osi rod fason pour reste pros avek sak kongregasyon. Alor zot servi bann sirveyan rezyonal pour fer sa. Konsey Direkter in apwent plizyer milye ansyen ki kalifye partou dan lemonn pour servi konman sirveyan rezyonal.

6, 7. Ki serten responsabilite bann sirveyan rezyonal i annan?

⁶ Ozordi, ler bann sirveyan rezyonal i vizit bann kongregasyon, zot fer zefor pour ankouraz sak dimoun dan kongregasyon par servi Labib. Ki mannyer zot fer sa? Zot swiv legzanp bann Kretyen dan premye syek, par egzanp zapot Pol. Pol ti ankouraz en sirveyan e i ti dir li: “Anons parol Bondye, pa tarde pour fer li dan letan favorab e dan letan difisil, korize, reprimande, donn konsey, fer tousala avek bokou pasyans e par ansenny byen. . . . Kontinyen anons sa bon nouvel.”​—2 Tim. 4:2, 5.

⁷ Parey sa bann verse i dir, sirveyan rezyonal ansanm avek son madanm si i’n marye, i pres ansanm avek bann proklanmater dan diferan form predikasyon. Sa bann sirveyan rezyonal i devoue dan predikasyon e zot bann bon ansenyan. Sa i anmenn bann byenfe pour troupo. (Rom. 12:11; 2 Tim. 2:15) Zot toultan met lentere lezot avan sa ki pour zot. Zot pare pour servi lezot, zot vwayaze menm si letan i move e menm vwayaz dan bann landrwa danzere. (Fili. 2:3, 4) Zot osi fer bann diskour ki baze lo Labib pour ankouraz, ansenny e konsey sak kongregasyon. Tou dimoun dan kongregasyon i benefisye avek legzanp bann sirveyan rezyonal e zot swiv legzanp zot lafwa.​—Ebr. 13:7.

8. Ki mannyer Barnabas ti reazir ler Pol ti dir li son plan?

⁸ Barnabas ti dakor avek Pol pour “vizit bann frer.” (Akt 15:36) Zot ti’n deza travay ansanm konman misyonner e zot ti konn byen sa  bann landrwa ek sa bann dimoun ki zot ti bezwen vizite. (Akt 13:2–14:28) Alor i ti paret ki i ti en bon nide pour zot vwayaz ansanm me i ti ariv en problenm. Akt 15:37 i dir: “Barnabas ti determinen pour anmenn avek zot Zan ki ti osi apel Mark.” Barnabas pa ti pe zis sizere ki zot anmenn son kouzen Mark me i “ti determinen” pour anmenn Mark lo sa vwayaz misyonner ki zot ti pe al fer.

9. Akoz Pol pa ti dakor avek Barnabas?

⁹ Pol pa ti dakor. Akoz? Sa resi i dir: “Pol pa ti dakor pour anmenn [Mark] avek zot parski i ti’n kit zot ler zot ti Panfili e i pa ti’n reste pour fer sa travay avek zot.” (Akt 15:38) Mark ti’n vwayaz avek Pol ek Barnabas lo zot premye vwayaz misyonner me i pa ti fini fer sa vwayaz avek zot. (Akt 12:25; 13:13) Ler zot ti’n fek konmans zot vwayaz e zot ti Panfili, Mark ti kit zot e i ti retourn kot li Zerizalenm. Labib pa dir akoz Mark ti kit zot me i paret ki zapot Pol ti konsider Mark konman en dimoun ki pa responsab. Petet Pol ti pe mazinen si i pou kapab depan lo Mark.

10. Ki sa problenm ant Pol ek Barnabas ti fer e ki ti arive?

¹⁰ Me kantmenm sa, Barnabas ti determinen pour anmenn Mark avek zot. Me Pol li, i ti determinen pour pa anmenn Mark avek zot. Akt 15:39 i dir: “Akoz sa, zot ti pran en gran lakoler e sakenn ti pran son semen.” Barnabas ti anmenn Mark avek li e zot ti pran bato pour al lo zil Sip kot Barnabas ti reste. Pol ti kontinyen avek son plan. Sa resi i dir: “Pol li, i ti swazir Silas e apre ki bann frer ti’n priye pour ki Zeova i demontre son labonte ekstraordiner anver Pol, zot ti ale.” (Akt 15:40) Alor, Pol ek Silas “ti travers Siri ek Silisi e fortifye bann kongregasyon.”​—Akt 15:41.

11. Ki bann kalite nou devret annan pour anpes en problenm kontinyen afekte nou lanmitye avek en dimoun ki’n ofans nou?

¹¹ Sa resi i fer nou rapel ki nou enparfe. Konsey direkter ti’n apwent Pol ek Barnabas konman zot bann reprezantan spesyal. I paret ki pli tar Pol ti form parti sa konsey direkter. Me kantmenm sa, dan sa sityasyon, Pol ek Barnabas ti les zot lakoler kontrol zot. Me eski zot ti les sa problenm kontinyen afekte zot lanmitye? Menm si zot ti enparfe, Pol ek Barnabas ti annan limilite e zot ti konn fason panse Kris. San dout, avek letan zot ti montre ki zot ti bann Kretyen ki parey de frer e zot ti pardonn kanmarad. (Efe. 4:1-3) Pli tar, Pol ek Mark ti travay ansanm dan lezot travay dan kongregasyon. a​—Kol. 4:10.

12. Ki bann kalite ki Pol ek Barnabas ti annan ki bann sirveyan osi i devret annan ozordi?

¹² Barnabas ek Pol pa ti abitye pran bann gran lakoler. Barnabas ti  renonmen konman en dimoun ki ti annan lanmour e ki ti zenere, sanmenm sa bann zapot ti apel li Barnabas ki vedir “Garson Rekonfor,” dan plas apel li Zozef ki ti son premye non. (Akt 4:36) Pol osi ti renonmen konman en dimoun ki annan tandres ek ladouser. (1 Tesa. 2:7, 8) Ozordi, tou bann ansyen enkli bann sirveyan rezyonal i devret swiv legzanp Pol ek Barnabas. Zot devret toultan fer zefor pour demontre limilite e pour tret lezot ansyen ek troupo antye avek tandres.​—1 Pyer 5:2, 3.

13, 14. (a) Lekel Timote e ki mannyer zapot Pol ti zwenn li? (b) Kwa ki ti fer Pol remark Timote? (c) Ki responsabilite Timote ti gannyen?

¹³ Ler Pol ti fer son dezyenm vwayaz misyonner, i ti al Ronm ki dan provens Galasi. I ti deza annan detrwa kongregasyon laba. Finalman, “Pol ti ariv Derb e apre i ti al Lis.” Sa resi i dir: “Laba i ti annan en disip ki ti apel Timote. Son manman ti en Zwif e i ti en disip osi me son papa ti en Grek.”​—Akt 16:1. b

¹⁴ Pol ti’n zwenn fanmir Timote ler i ti al laba pour premye fwa lannen 47. Me aprezan pandan son dezyenm vwayaz, de oubyen trwa lannen pli tar, Pol ti remark Timote. Akoz? Parski “bann frer . . . ti koz an byen lo [Timote].” Pa zis bann frer dan son kongregasyon ki ti kontan Timote, me bann frer dan lezot kongregasyon osi ti konn son bon repitasyon. Sa resi i montre ki bann frer dan lavil Lis ek Ikonyonm ki ti en zistans apepre 30 kilomet avek kot Timote ti reste, ti osi koz an byen lo li. (Akt 16:2) Avek gidans lespri sen, bann ansyen ti donn Timote en gro responsabilite, setadir pour travay avek Pol ek Silas konman en sirveyan rezyonal.​—Akt 16:3.

15, 16. Kwa ki ti fer Timote ganny en bon repitasyon?

¹⁵ Ki mannyer Timote ti annan en bon repitasyon menm si i ti ankor zenn? Eski akoz i ti malen oubyen akoz i ti en zoli garson oubyen akoz bann abilite ki i ti annan? Souvan bann dimoun i enpresyonnen avek sa bann kalite. En fwa, menm profet Samyel ti ganny enfliyanse par laparans en dimoun. Me Zeova ti dir li: “Zonm pa vwar keksoz dan menm fason ki Bondye i vwar, parski zonm i vwar zis laparans, me Zeova i vwar sa ki i annan dan leker.” (1 Sam. 16:7) Alor, bann zoli kalite ki Timote ti annan ki ti fer li ganny en bon repitasyon parmi son bann frer ek ser me pa akoz bann abilite ki i ti annan.

¹⁶ Plizyer lannen pli tar, zapot Pol ti koz lo serten bann zoli kalite ki Timote ti annan. Pol ti koz lo sa bon latitid ki Timote ti annan, ki  i ti met lentere lezot avan sa ki pour li e ki i ti devoue pour akonpli son bann responsabilite dan kongregasyon. (Fili. 2:20-22) Dimoun ti osi konn Timote konman en dimoun ki ti annan “lafwa senser.”​—2 Tim. 1:5.

17. Ki mannyer bann zenn ozordi i kapab swiv legzanp Timote?

¹⁷ Ozordi, bann zenn i swiv legzanp Timote ler zot devlop bann kalite ki Bondye i kontan. Ler zot fer sa, zot ganny en bon repitasyon devan Zeova ek son pep, menm si zot ankor zenn. (Prov. 22:1; 1 Tim. 4:15) Zot demontre lafwa senser e zot pa fer krwar zot pe servi Zeova e an menm tan zot pe fer sa ki mal. (Ps. 26:4) Alor parey Timote, en kantite zenn i kapab annan en rol enportan dan kongregasyon. Ler zot kalifye pour pres sa bon nouvel e pli tar zot dedye zot lavi avek Zeova e batize, sa i ankouraz tou dimoun ki kontan Zeova dan kongregasyon.

18. (a) Ki travay Pol ek Timote ti fer konman sirveyan rezyonal? (b) Ki benediksyon kongregasyon ti gannyen?

¹⁸ Pol ek Timote ti travay ansanm pour plizyer lannen. Konman bann sirveyan rezyonal, zot ti fer en kantite travay pour konsey direkter. Labib i dir: “Dan sak lavil kot zot ti pase, zot ti fer bann disip konn desizyon ki bann zapot ek ansyen ti’n fer Zerizalenm pour ki zot kapab swiv sa bann lord.” (Akt 16:4) I kler ki bann kongregasyon ti swiv lenstriksyon bann zapot ek ansyen ki ti Zerizalenm. Alor, “lafwa bann kongregasyon ti vin deplizanpli for e lakantite disip ti ogmante zour apre zour.”​—Akt 16:5.

19, 20. Akoz bann Kretyen i devret obei “bann ki pe diriz zot”?

¹⁹ Pareyman ozordi, bann Temwen Zeova i ganny en kantite benediksyon ler zot obei tou bann lenstriksyon ki zot gannyen sorti kot “sa bann ki pe diriz zot.” (Ebr. 13:17) Vi ki sa lemonn pe toultan sanze, i vreman enportan ki bann Kretyen i toultan obei bann lenstriksyon ki “lesklav fidel e pridan” i donnen. (Mat. 24:45; 1 Kor. 7:29-31) Si nou fer sa, sa pou kapab anpes nou elwannyen avek laverite e sa pou osi ed nou pour kontinyen reste san okenn tas dan sa lemonn.​—Zak 1:27.

²⁰ Ozordi, bann sirveyan rezyonal ek bann frer lo Konsey Direkter i enparfe zis parey Pol, Barnabas, Mark ek lezot ansyen ki ti ganny swazir par lespri sen dan premye syek. (Rom. 5:12; Zak 3:2) Me vi ki Konsey Direkter i fer sir ki i swiv byen Parol Bondye e i fer sir ki i swiv legzanp bann zapot, sa i montre ki Konsey Direkter i diny konfyans. (2 Tim. 1:13, 14) Alor, bann kongregasyon i kontinyen ganny ankouraze e zot lafwa i vin pli for.