1, 2. Akoz sa vwayaz ki Barnabas ek Sol pe al fer i spesyal e ki mannyer zot travay pou ede akonpli Akt 1:8?

 I EN zour vreman eksitan pour kongregasyon Antyos. Parmi tou bann profet ek ansenyan ki la, lespri sen in swazir Barnabas ek Sol pour al anons sa bon nouvel dan bann landrwa byen lwen. a (Akt 13:1, 2) I vre, i ti’n deza annan bann zonm kalifye ki ti’n ganny anvoye pour anons sa bon nouvel avan sa. Me dan lepase, sa bann misyonner ti al dan bann landrwa kot i ti deza annan bann Kretyen. (Akt 8:14; 11:22) Safwasi, Barnabas ek Sol, ansanm avek Zan Mark ki pou ed zot, pou ganny anvoye dan bann landrwa kot laplipar dimoun pa ankor tann sa bon nouvel.

² Apepre 14 an pase, Zezi ti’n dir son bann disip: “Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) La ki Barnabas ek Sol in vin bann misyonner, sa pou ede akonpli sa ki Zezi ti predir! b

3. Akoz i ti difisil pour fer bann gran vwayaz dan premye syek?

³ Ozordi, vi ki nou annan diferan transpor parey loto ek avyon, dimoun i kapab vwayaz lwen dan zis enn erdtan oubyen de-z-erdtan. Me i pa ti koumsa dan premye syek. Sa letan, bann dimoun ti bezwen marse pour zot al dan diferan landrwa e souvan sa bann semen ti difisil. En dimoun ki ti vwayaze pour en zour, petet ti pou kapab mars zis en zistans 30 kilomet e i ti pou byen fatige! c Alor menm si Barnabas ek Sol ti anvi konmans fer sa travay ki zot ti’n ganny donnen, zot ti realize ki zot ti pou bezwen fer en kantite zefor ek sakrifis pour fer sa travay.​—Mat. 16:24.

4. (a) Ki mannyer Barnabas ek Sol ti ganny swazir e ki mannyer bann frer dan kongregasyon ti reazir? (b) Ki mannyer nou kapab siport bann ki ganny responsabilite dan kongregasyon?

 ⁴ Me akoz lespri sen ti dir met Barnabas ek Sol apar pour “en travay”? (Akt 13:2) Labib pa dir. Me kantmenm sa, nou konnen ki lespri sen ti gid bann profet ek ansenyan pour swazir Barnabas ek Sol. Napa okenn par dan Labib ki montre ki sa bann profet ek ansenyan Antyos pa ti dakor avek sa desizyon. O kontrer, zot ti donn tou zot sipor sa de zonm ki ti’n ganny apwente. Esey mazinen ki mannyer Barnabas ek Sol ti santi ler bann frer dan kongregasyon pa ti zalou me plito zot ti zennen e priye, apre “zot ti poz lanmen lo zot e fer zot ale.” (Akt 13:3) Nou osi nou devret siport sa bann ki ganny bann responsabilite dan kongregasyon, enkli bann sirveyan dan kongregasyon. Dan plas zalou sa bann ki ganny responsabilite, nou devret “avek lanmour, demontre en konsiderasyon ekstraordiner anver zot akoz zot travay.”​—1 Tesa 5:13.

5. Ki Barnabas ek Sol ti bezwen fer pour pres sa bon nouvel lo zil Sip?

⁵ Apre ki Barnabas ek Sol ti’n marse ziska Selesi, en por o bor Antyos, zot ti pran bato pour al lo zil Sip e sa ti en vwayaz apepre 200 kilomet. d  Vi ki Barnabas ti’n ne Sip, sirman i ti vreman anvi anons sa bon nouvel avek bann dimoun ki ti reste laba. Ler zot ti ariv Salamin, en lavil lo lakot les sa zil, sa bann zonm pa ti gaspiy letan. Deswit, “zot ti konmans anons parol Bondye dan bann sinagog Zwif.” e (Akt 13:5) Barnabas ek Sol ti vwayaz depi en kote zil ziska lot kote zil Sip. I posib ki zot ti pres avek bann dimoun dan bann lavil enportan. Depandan semen ki zot ti pran, i kapab ki sa bann misyonner ti mars apepre 160 kilomet!

6, 7. (a) Lekel Serzis Polous e akoz Bar-Zezi ti esey anpes li ekout sa bon nouvel? (b) Ki Sol ti fer ler Bar-Zezi ti opoz sa mesaz Rwayonm?

⁶ Dan premye syek, i ti annan en kantite fo ladorasyon lo zil Sip. Barnabas ek Sol ti vwar sa ler zot ti ariv Pafos, ki ti lo lakot was sa zil. Laba zot ti zwenn “en zonm Zwif ki ti apel Bar-Zezi ki ti en sorsye e en fo profet. I ti avek gouverner provens Romen Serzis Polous, en zonm entelizan.” f Dan premye syek, en kantite Romen ki ti byen edike, menm “en zonm entelizan” parey Serzis Polous, ti souvan al kot en sorsye oubyen kot en astrolog pour rod led pour zot kapab fer bann desizyon enportan. Me kantmenm sa, Serzis Polous ti enterese avek sa mesaz Rwayonm e “i ti vreman oule tann parol Bondye.” Me Bar-Zezi pa ti kontan sa. Bar-Zezi ti osi koni konman Elimas, ki vedir “Sorsye.”​—Akt 13:6-8.

⁷ Bar-Zezi ti opoz sa mesaz Rwayonm. Byensir, pour li kapab protez son pozisyon konman konseye Serzis Polous, “i ti esey anpes gouverner aksepte lafwa.” (Akt 13:8) Me Sol pa ti pou les en mazisyen fer Serzis Polous aret enterese avek sa mesaz Rwayonm. Alor ki Sol ti fer? Sa resi i dir: “Sol ki ti osi apel Pol ti ranpli avek lespri  sen e i ti get li [Bar-Zezi] dan son figir e dir li: ‘Ou anbet lezot, ou ranpli avek lemal, ou garson Dyab ek lennmi sa ki drwat, eski ou pa pou aret devir semen drwat Zeova? Gete! Zeova pou pini ou e ou pou vin aveg. Ou pa pou vwar lalimyer soley pour en pe letan.’ Deswit i ti annan en vwal lo son lizye e son lizye ti vin sonm. I ti ale vini pour rod en dimoun pour atrap son lanmen pour gid li.” g Ki ti arive apre sa mirak? “Ler gouverner ti vwar sa ki ti’n arive, i ti vin en disip parski i ti vreman etonnen avek lansennyman Zeova.”​—Akt 13:9-12.

8. Ki mannyer nou kapab pres avek lardyes parey Pol?

⁸ Pol pa ti per Bar-Zezi. Pareyman, nou pa devret per bann dimoun ki opoz nou e ki anpes bann dimoun ki enterese aksepte sa mesaz Rwayonm. Byensir, sa ki nou dir “i devret touzour agreab, konmsi i asezonnen avek disel.” (Kol. 4:6) Par kont, nou pa devret ezite pres avek en dimoun ki enterese zis akoz nou per pangar lezot dimoun i fer problenm avek nou. Nou pa devret per pour koz lo fo lansennyman ki bann fo larelizyon i ansennyen ki pe kontinyen “devir semen drwat Zeova” zis parey Bar-Zezi ti fer. (Akt 13:10) Annou fer parey Pol e anons laverite avek lardyes dan en fason ki atir bann dimoun ki senser. Menm si nou pa vwar lafason ki Bondye i ed nou parey i ti fer avek Pol, nou kapab asire ki Zeova pou servi son lespri sen pour atir bann dimoun ki merit konn laverite.​—Zan 6:44.

9. Ki mannyer Pol ek Barnabas in kit en bon legzanp pour bann frer ki pe diriz kongregasyon ozordi?

⁹ I kler ki keksoz ti sanze ler sa bann zonm ti kit Pafos e pran bato pour al Perze ki ti lakot Lazi Miner, en vwayaz apepre 250 kilomet dan bato. Akt 13:13 i dir ki sa group dimoun ti “Pol ek bann ki ti avek li.” Sa i montre ki depi sa letan, Pol ti sa enn ki ti pe diriz sa group. Me napa  okenn par dan Labib ki dir ki Barnabas ti zalou Pol. O kontrer, sa de zonm ti kontinyen travay ansanm pour fer lavolonte Bondye. Pol ek Barnabas in kit en bon legzanp pour bann frer ki pe diriz kongregasyon ozordi. Dan plas fer konpetisyon pour ganny bann responsabilite dan kongregasyon, bann Kretyen i devret rapel sa ki Zezi ti dir: “Zot tou zot frer.” I ti osi dir: “Sa ki oule ganny onore pou ganny abese e sa ki abes son lekor pou ganny onore.”​—Mat. 23:8, 12.

10. Dekri sa vwayaz depi Perze ziska Antyos, Pisidi.

¹⁰ Ler zot ti ariv Perze, Zan Mark ti kit Pol ek Barnabas e i ti retourn Zerizalenm. Labib pa dir akoz Zan Mark ti kit zot en sel kou. Pol ek Barnabas ti kontiny zot vwayaz depi Perze ziska Antyos, Pisidi, en lavil dan provens Galasi. Sa vwayaz pa ti fasil akoz Antyos, Pisidi ti apepre 1,100 met par lao nivo lanmer. Bann semen ti dan montanny e i ti danzere. Normalman i ti annan en kantite voler dan sa bann semen. An plis ki sa, i paret ki Pol ti pe konmans ganny bann problenm lasante. h

11, 12. Ki mannyer Pol ti evey lentere bann dimoun ki i ti koz avek dan sinagog Antyos, Pisidi?

¹¹ Ler Pol ek Barnabas ti dan lavil Antyos, Pisidi, zot ti al dan sinagog zour Saba. Sa resi i dir: “Apre ki Lalwa ek liv bann profet ti’n ganny lir an piblik, bann zofisye sinagog ti dir: ‘Bann frer, si zot annan okenn keksoz pour dir pour ankouraz nou, koze.’” (Akt 13:15) Alor Pol ti debout pour koze.

¹² Pol ti konmans koz avek bann dimoun e i ti dir: “Mon bann frer, bann Izraelit ek zot tou ki annan en gran respe pour Bondye.” (Akt 13:16) Sa bann dimoun ki ti pe ekout Pol ti bann Zwif ek  bann dimoun ki ti’n konverti dan larelizyon Zwif. Ki mannyer Pol ti evey lentere bann dimoun ki pa ti rekonnet sa rol ki Zezi i annan dan plan Bondye? Premyerman, Pol ti koz lo listwar nasyon Zwif. I ti eksplike ki mannyer Zeova “ti ed sa pep ler zot ti viv konman bann etranze dan pei Lezip” e ki mannyer Bondye ti “siport zot move konportman dan dezer” pour 40 an apre ki zot ti’n sorti Lezip. Pol ti osi koz lo ki mannyer bann Izraelit ti reisi pran Later Promiz e ki mannyer Zeova “ti donn pep Izrael sa pei konman en leritaz.” (Akt 13:17-19) Serten dimoun in deza dir ki Pol ti kapab pe refer avek serten bout dan Lekritir ki ti’n fek ganny lir sa zour Saba. Si sa i vre, sa i en lot legzanp ki montre ki Pol ti konnen ki mannyer pour “vin tou, pour tou sort kalite dimoun.”​—1 Kor. 9:22.

13. Ki mannyer nou kapab fer bann dimoun anvi aprann konn Zeova?

¹³ Nou osi nou devret fer nou mye pour fer ki nou mesaz i enteresan pour bann dimoun ki nou pres avek. Par egzanp, si nou konnen ki larelizyon en dimoun i ladan, sa i kapab ed nou pour swazir bann topik ki kapab enteres sa dimoun. Nou osi kapab servi bann verse Labib ki sa dimoun i konnen. I pli bon si nou fer sa dimoun lir sa verse dan son prop Labib. Nou devret rod fason pour fer sa dimoun anvi aprann konn Zeova.

14. (a) Ki mannyer Pol ti konmans koz lo sa bon nouvel lo Zezi e ki lavertisman i ti donnen? (b) Ki lafoul ti fer ler zot ti tann diskour Pol?

¹⁴ Apre sa, Pol ti montre ki mannyer “en sover. . . Zezi” ti en desandans bann lerwa Izrael. I ti osi dir ki Zan ki batize ti prepar bann dimoun avan ki Zezi ti vini. Apre, Pol ti eksplike ki mannyer Zezi ti ganny touye e ganny resisite. (Akt 13:20-37) Pol ti dir: “Ekoute mon bann frer, mon pe anons zot ki se atraver sa enn ki zot pese i kapab ganny pardonnen. . . . Me atraver sa enn, Bondye i kapab konsider inosan tou sa ki krwar.” Apre, zapot Pol ti donn zot sa lavertisman: “Veye ki sa ki’n ganny ekrir dan liv bann Profet pa ariv zot: ‘Zot ki kontan boufonnen, get sa ki mon pe fer dan zot letan. Zot pa pou oule krwar sa ki mon’n fer menm si en dimoun ti’n koz lo la an detay avek zot. Me zot pou sirprann e zot pou ganny detrir.’” Sa bann dimoun ki ti pe ekout Pol ti reazir dan en fason enkrwayab. Labib i dir ki “bann dimoun ti sipliy zot pour koz lo sa bann keksoz avek zot son lot Saba.” An plis ki sa, apre sa renyon dan sinagog, “en kantite Zwif ek bann ki’n konverti dan larelizyon Zwif ti swiv Pol ek Barnabas.”​—Akt 13:38-43.

15. Ki ti arive zour Saba apre ki Pol ti’n fer son diskour?

¹⁵ Son lot Saba, “preski lavil antye” ti rasanble pour ekout Pol. Me serten Zwif ti ankoler e zot “ti konmans koz an mal pour kontredir sa ki Pol ti pe dir.” Avek lardyes, Pol ek Barnabas ti dir zot: “Zot ki ti bezwen  tann parol Bondye premye. Me vi ki zot pe rezet li e zot pa konsider zot diny pour ganny lavi eternel, alor nou pe al anons sa mesaz avek dimoun lezot nasyon. Parski Zeova in donn nou sa lord atraver sa parol: ‘Mon’n apwent ou konman lalimyer pour bann nasyon, pour ki ou kapab anons mesaz delivrans ziska dan bann landrwa pli lwen lo later.’”​—Akt 13:44-47; Iza. 49:6.

16. Ki mannyer bann Zwif ti reazir anver sa ki sa bann misyonner ti’n dir e ki Pol ek Barnabas ti fer ler bann dimoun ti opoz zot?

¹⁶ Bann dimoun lezot nasyon ki ti pe ekoute ti vreman kontan e “tou sa bann ki ti annan sa bon kondisyon leker pour ganny lavi eternel ti vin disip.” (Akt 13:48) Deswit apre, Parol Zeova ti propaz partou dan sa pei. Me bann Zwif ti azir dan en fason diferan. Anfet, sa bann misyonner ti dir zot ki menm si zot ti’n tann parol Bondye premye, zot in deside pour rezet Mesi e alor Bondye pou ziz zot. Bann Zwif ti met presyon lo bann madanm o plase e lo bann zonm enportan dan sa lavil “e zot ti persekit Pol ek Barnabas e pous zot an deor sa distrik.” Ki Pol ek Barnabas ti fer? Zot “ti tap zot lipye pour tir lapousyer konman temwannyaz kont zot e zot ti al Ikonyonm.” Eski tou ti’n fini pour larelizyon Kretyen Antyos, Pisidi? Definitivman non! Bann disip ki ti’n reste laba “ti kontinyen dan lazwa e ranpli avek lespri sen.”​—Akt 13:50-52.

17-19. Ki mannyer nou kapab swiv bon legzanp Pol ek Barnabas e ki mannyer nou pou ganny lazwa si nou fer sa?

¹⁷ Nou kapab aprann en leson enportan avek sa ki sa de frer fidel ti fer ler bann dimoun ti opoz zot. Nou pa devret aret prese menm si bann dimoun enportan dan sa lemonn i esey anpes nou pres sa bon nouvel. Ler bann dimoun Antyos ti rezet sa mesaz, Pol ek Barnabas “ti tap zot lipye pour tir lapousyer.” Sa pa ti vedir ki Pol ek Barnabas ti ankoler me plito i ti montre ki zot pa ti responsab pour sa ki ti pou al arive avek sa bann dimoun. Sa bann misyonner ti realize ki zot pa kapab kontrol lafason ki bann dimoun i reazir. Sa ki zot ti kapab kontrole ti si zot ti pou kontinyen prese. Sanmenm sa ki zot ti fer anmezir ki zot ti al Ikonyonm!

¹⁸ Ki ti arive avek sa bann disip ki ti’n reste Antyos? I vre zot ti dan en landrwa kot dimoun ti opoz sa bon nouvel, me zot lazwa pa ti depan lo si dimoun ti pou ekout zot. Zezi ti dir: “Ere sa bann ki tann parol Bondye e obei li!” (Lik 11:28) Sanmenm sa ki bann disip Antyos, Pisidi ti deside fer.

¹⁹ Parey Pol ek Barnabas, nou devret toultan rapel ki nou annan sa responsabilite pour pres sa bon nouvel. Sa bann dimoun ki ekout nou ki devret deside si zot pou aksepte oubyen rezet sa mesaz. Si bann dimoun ki nou pres avek pa enterese avek sa mesaz, nou kapab fer parey bann disip dan premye syek. Si nou kontan laverite e nou les lespri sen gid nou, nou osi nou pou kapab annan lazwa menm ler bann dimoun i opoz nou.​—Gal. 5:18, 22.