Ser proklanmater Rwayonm:

Fer konmsi ou enn bann zapot ki pe debout lo Montanny Pye Zoliv. Zezi i aparet devan ou. Zis ler i pros pour mont dan lesyel, i dir: “Zot pou ganny pwisans ler lespri sen pou desann lo zot. Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) Ki ou pou fer?

Petet ou pou santi ki tro bokou pour ou fer. Petet ou kapab demann ou lekor, ‘Ki mannyer nou, sa pti gin nou, pou kapab rann temwannyaz “ziska dan bann landrwa pli elwannyen lo later”?’ Petet ou pou rapel sa lavertisman ki Zezi ti donnen sa zour swar avan son lanmor: “En lesklav pa pli gran ki son met. Si dimoun in persekit mwan, zot pou persekit zot osi, si dimoun in obei mon parol, zot pou osi obei sa ki pour zot. Me bann dimoun pou fer tou sa bann keksoz kont zot akoz zot port mon non, parski sa bann dimoun pa konn sa Enn ki’n anvoy mwan.” (Zan 15:20, 21) Ler ou reflesir lo sa parol, petet ou kapab demann ou lekor, ‘Ki mannyer mon kapab rann temwannyaz afon ler mon ganny opoze oubyen persekite?’

Ozordi, nou kapab demann nou lekor sa bann menm kestyon. Konman Temwen Zeova nou osi nou bezwen rann temwannyaz afon “ziska dan bann landrwa pli elwannyen lo later,” avek “dimoun dan tou nasyon.” (Mat. 28:19, 20) Ki mannyer sa travay i kapab ganny akonplir sirtou si i annan lopozisyon parey in ganny predir?

Sa ki bann zapot ti fer dan liv Akt i montre nou ki mannyer bann zapot ek lezot Kretyen dan premye syek ti reisi avek led Zeova akonpli zot travay. Sa liv ki ou pe lir pou ed ou egzamin sa resi e santi sa menm leksitasyon parey sa bann levennman ki’n ganny rikorde ladan. Ou pou etonnen pour vwar ki annan plizyer keksoz ki parey sa ki bann serviter Zeova ti fer dan premye syek ek son pep ozordi. Ou pou remarke ki i pa zis sa ki zot fer ki parey me osi lafason ki zot ganny organize pour fer sa travay. Ler ou reflesir lo tousala sa pou fortifye ou lafwa ki Zeova i ankor pe diriz son lorganizasyon lo later.

Nou swete e priye ki ler ou etidye sa liv Akt, sa pou fer ou annan plis konfyans ki Zeova pou ed ou e donn ou lafors ki ou bezwen atraver son lespri sen. Alor nou ankouraz ou pour kontinyen “rann temwannyaz afon” lo Rwayonm Bondye e ed lezot pour ki zot osi zot ganny sove.​—Akt 28:23; 1 Tim. 4:16.