1, 2. Ki Sol ti anvi fer Damas?

 EN GROUP dimoun i pros pour ariv Damas e zot anvi fer en move keksoz. Zot pa kontan bann disip Zezi, alor zot pe al tir sa bann disip dan zot lakaz, anmar zot, imilye zot e trenn zot ziska Zerizalenm pour Sannedren pini zot.

² Sol sef sa group i deza enplike dan lanmor en dimoun. a Pa tro lontan avan sa, i ti dakor pour Etyenn, en disip Zezi ki ti devoue, ganny saboule avek ros ziska ki i mor. (Akt 7:57–8:1) Vi ki Sol pa anvi persekit zis bann disip Zezi ki pe reste Zerizalenm, i pe al persekit lezot disip dan lezot landrwa osi. I anvi detri sa sekt ki apel “sa Semen.”​—Akt 9:1, 2; vwar sa bwat “ Lotorite ki Sol ti annan Damas.”

3, 4. (a) Ki ti arive avek Sol? (b) Ki kestyon nou pou reponn?

³ En sel kou, en lalimyer i klere toultour Sol. Ler sa group dimoun ki pe vwayaz avek li i vwar sa lalimyer, zot telman sirprann ki zot nepli kapab koze. Sol i vin aveg e i tonm ater. Menm si i pa vwar nanryen, Sol i tann en lavwa sorti dan lesyel dir li: “Sol, Sol, akoz ou pe persekit mwan?” Sol i dan sok e i demande: “Lekel ou Senyer?” Sol i soke avek sa larepons ki i gannyen. Sa lavwa i dir li: “Mwan menm Zezi ki ou pe persekite.”​—Akt 9:3-5; 22:9.

⁴ Ki nou kapab aprann avek sa ki Zezi ti dir Sol? Ki byenfe nou kapab gannyen ler nou get sa ki ti arive ler Sol ti konverti? Ki leson nou kapab aprann avek lafason ki kongregasyon ti servi sa letan ki zot ti anpe apre ki Sol ti’n konverti?

5, 6. Ki nou kapab aprann avek sa ki Zezi ti dir Sol?

⁵ Ler Zezi ti aret Sol lo semen ki al Damas, Zezi pa ti demann li:  “Akoz ou pe persekit mon bann disip?” Parey nou’n vwar anler, i ti demande: “Akoz ou pe persekit mwan?” (Akt 9:4) Zezi i santi ler son bann disip i pas dan bann problenm.​—Mat. 25:34-40, 45.

⁶ Si ou pe ganny persekite akoz ou lafwa ki ou annan dan Zezi, ou kapab asire ki Zeova ek Zezi i konn ou sityasyon. (Mat. 10:22, 28-31) I kapab ki Zeova pa tir sa problenm deswit. Me rapel, Zezi ti vwar ki mannyer Sol ti enplike dan lanmor Etyenn e i ti vwar ler Sol ti trenn son bann disip fidel ki ti reste Zerizalenm an deor zot lakaz. (Akt 8:3) Me Zezi pa ti fer nanryen sa letan. Kantmenm sa, Zeova ti servi Zezi pour donn Etyenn ek lezot disip sa lafors ki zot ti bezwen pour zot reste fidel.

7. Ki ou devret fer pour ou kapab andir persekisyon?

⁷ Ou osi ou pou kapab andir persekisyon si ou: (1) determinen pour reste fidel nenport kwa ki arive, (2) demann Zeova son led, (Fili. 4:6, 7) (3) les Zeova revanze (Rom. 12:17-21) e (4) annan konfyans ki Zeova pou donn ou sa lafors pour andire ziska ki i tir sa problenm.​—Fili. 4:12, 13.

8, 9. Ki mannyer Ananyas ti’n kapab santi konsernan sa responsabilite ki i ti gannyen?

⁸ Apre ki Zezi ti’n reponn sa kestyon ki Sol ti demande, “Lekel ou Senyer?” Zezi ti dir li: “Leve e al dan lavil e ou ava ganny dir ki ou devret fer.” (Akt 9:6) Vi ki Sol ti aveg, zot ti anmenn li kot i reste Damas e pour trwa zour i ti priye e i pa ti manze, ni bwar. Dan sa menm letan, Zezi ti koz avek Ananyas konsernan Sol. Ananyas ti en disip ki ti reste dan sa lavil e “tou bann Zwif ti koz an byen lo li.”​—Akt 22:12.

⁹ Imazin ki mannyer Ananyas ti santi! Zezi Kri ki ti’n resisite, Sef kongregasyon, ti pe koz avek li personnelman e i’n swazir li pour fer en travay spesyal. I ti en loner pour li me sa ti en gro responsabilite! Ler Zezi ti dir Ananyas ki i ti pou  bezwen koz avek Sol, i ti dir: “Senyer, mon’n tann bokou dimoun koz lo sa zonm, konsernan sa kantite ditor ki i’n fer ou bann sen Zerizalenm. Bann sef pret in donn li permisyon pour aret tou sa bann ki kriy lo ou non Damas.”​—Akt 9:13, 14.

10. Ki nou kapab aprann avek lafason ki Zezi ti koz avek Ananyas?

¹⁰ Zezi pa ti koriz Ananyas ler i ti dir kwa ki ti pe fatig li. Par kont, Zezi ti donn li en lenstriksyon kler. Zezi ti demontre konsiderasyon pour Ananyas e i ti dir li akoz i ti anvi i fer sa travay. Zezi ti dir sa lo Sol: “Mon’n swazir sa zonm pour rann temwannyaz lo mon non avek bann nasyon, bann lerwa ek pep Izrael e mon pou montre li klerman  ki kantite i pou bezwen soufer akoz mon non.” (Akt 9:15, 16) Deswit Ananyas ti obei Zezi. I ti rod Sol, sa enn ki ti persekit zot e i ti dir li: “Sol, mon frer, Senyer Zezi ki ti aparet avek ou dan semen ler ou ti pe vin isi in anvoy mwan pour ki ou revwar kler e ganny lespri sen.”​—Akt 9:17.

11, 12. Ki nou aprann avek sa bann levennman ki ti enplik Zezi, Ananyas ek Sol?

¹¹ Nou kapab konpran plizyer keksoz avek sa bann levennman ki ti enplik Zezi, Ananyas ek Sol. Par egzanp, Zezi pe diriz sa travay predikasyon zis parey i ti promet. (Mat. 28:20) Menm si ozordi Zezi pa koz avek nou direkteman, i servi sa lesklav fidel ki i’n met ansarz son bann serviter, pour diriz sa travay predikasyon. (Mat. 24:45-47) Anba direksyon Konsey Direkter, bann proklanmater ek pionye in ganny anvoye pour rod bann dimoun ki anvi konn plis lo Zezi. Parey nou’n vwar dan sa sapit avan, en kantite sa bann dimoun in priye pour ganny gidans Bondye e apre bann Temwen Zeova in vin kot zot.​—Akt 9:11.

¹² Ananyas ti aksepte pour fer sa travay ki i ti gannyen e i ti ganny beni. Eski ou obei sa lord pour rann temwannyaz afon menm si parfwa ou enkyet? Serten dimoun i per pour al prese kazankaz e pour koz avek en dimoun ki zot pa konnen. I annan ki vwar li difisil pour pres avek dimoun dan zot landrwa travay, lo semen, lo telefonn oubyen par let. Ananyas ti aret per e i ti annan sa privilez pour ed Sol ganny lespri sen. b Ananyas ti reisi akoz i ti annan konfyans dan Zezi e i ti vwar Sol konman en dimoun ki ti kapab vin son frer. Parey Ananyas, nou kapab aret per si nou annan konfyans ki Zezi pe diriz sa travay predikasyon, si nou konpran santiman bann dimoun e vwar zot konman bann dimoun ki kapab vin nou frer oubyen ser.​—Mat. 9:36.

13, 14. Si ou pe etidye Labib me ou pa ankor batize, ki ou kapab aprann avek legzanp Sol?

¹³ Sol pa ti tarde pour aplik sa ki i ti’n aprann. Apre ki i ti’n ganny geri, i ti batize e i ti konmans pas letan avek bann disip Damas. Me i ti fer plis ki sa. “Deswit i ti konmans anonse dan bann sinagog ki Zezi i Garson Bondye.”​—Akt 9:20.

¹⁴ Si ou pe etidye Labib me ou pa ankor batize, eski ou pou fer parey  Sol e pa ezite pour aplik sa ki ou’n aprann? Sol ti vwar pour li menm en mirak ki Zezi ti fer e san dout sa ti motiv li pour azir. Me lezot dimoun osi ti vwar bann mirak ki Zezi ti fer. Par egzanp, en group Farizyen ti vwar ler Zezi ti geri en zonm ki en kote son lanmen ti paralize e osi en kantite Zwif ti konnen ki Zezi ti’n resisit Lazar. Kantmenm sa, zot pa ti sanze e serten ti menm opoz Zezi. (Mark 3:1-6; Zan 12:9, 10) De lot kote, Sol ti sanze. Akoz Sol ti azir dan en bon fason menm si lezot dimoun pa ti fer parey li? Parski i ti annan plis respe pour Bondye ki pour zonm e i ti osi vreman apresye ki Kris ti annan konpasyon pour li. (Fili. 3:8) Si ou fer parey Sol, i pou napa nanryen ki pou anpes ou fer sa travay predikasyon e pour kalifye pour batize.

15, 16. Ki Sol ti fer dan sinagog e ki bann Zwif Damas ti fer?

¹⁵ Eski ou kapab mazinen ki mannyer sa lafoul ti sirprann, etonnen e ankoler ler Sol ti konmans koz lo Zezi dan sinagog? Zot ti demande: “Pa li menm li sa zonm ki ti servi vyolans pour atak bann disip Zezi Zerizalenm?” (Akt 9:21) Ler Sol ti eksplike akoz i ti’n sanz son latitid konsernan Zezi, i “ti prouve avek bann largiman lozik ki Zezi i li menm Kris.” (Akt 9:22) Me pa tou dimoun ki vwar keksoz dan en fason lozik. Si en dimoun i determinen pour swiv tradisyon oubyen i orgeye, i pou difisil pour li sanz son fason panse. Me kantmenm sa, Sol pa ti abandonnen.

¹⁶ Trwa-z-an pli tar, bann Zwif Damas ti ankor pe opoz Sol. Finalman, zot ti fer plan pour touy li. (Akt 9:23; 2 Kor. 11:32, 33; Gal. 1:13-18) Ler Sol ti tande ki zot ti’n fer en konplo kont li, i ti kit sa lavil an kasyet. Zot ti fer li desann dan en pannyen par en trou dan miray. Lik i dir ki sa bann dimoun ki ti ed Sol sove pandan lannwit ti “son bann disip.” (Akt 9:25) Alor sa i montre ki serten dimoun ki ti tann Sol koze Damas ti vin bann disip Kris.

17. (a) Ki mannyer dimoun i reazir anver laverite ki dan Labib? (b) Ki nou devret kontinyen fer e akoz?

¹⁷ Ler ou ti fek konmans koz avek ou fanmir, ou bann zanmi ek lezot dimoun lo bann bon keksoz ki ou ti pe aprann, petet ou ti mazinen ki tou dimoun ti pou aksepte sa laverite ki dan Labib akoz i lozik. Petet serten in aksepte tandis ki en kantite pa’n aksepte. Anfet, i kapab ki ou prop fanmir in tret ou parey en lennmi. (Mat. 10:32-38) Par kont, si ou kontinyen amelyor lafason ki ou servi Lekritir pour fer dimoun reflesir e si ou kontinyen annan en bon kondwit konman en Kretyen, ptitapti sa i kapab sanz latitid bann dimoun ki opoz ou.​—Akt 17:2; 1 Pyer 2:12; 3:1, 2, 7.

18, 19. (a) Ler Barnabas ti verifye ki Sol ti’n vreman vin en disip, ki ti arive? (b) Ki mannyer nou kapab swiv legzanp Barnabas ek Sol?

 ¹⁸ Ler Sol ti ariv Zerizalenm, bann disip pa ti oule krwar ki i ti’n vin en disip. Par kont, ler Barnabas ti verifye ki Sol ti’n vreman vin en disip, bann zapot ti aksepte li e Sol ti reste avek zot pour en pe letan. (Akt 9:26-28) Sol ti pridan me i pa ti onte akoz sa bon nouvel. (Rom. 1:16) I ti pres avek lardyes Zerizalenm, sa menm landrwa kot i ti persekit bann disip Zezi Kri. Bann Zwif ti realize ki sa zonm ki zot ti krwar ti pou sa enn ki ti pou diriz zot pour detri bann Kretyen, i aprezan en disip Zezi. Alor, zot ti rod fason pour touy li. Sa resi i dir: “Ler bann frer ti tann sa, zot ti anmenn li Sezare e anvoy li Tars.” (Akt 9:30) Sol ti soumet avek gidans ki Zezi ti donnen atraver kongregasyon. Sa ti fer ki Sol ek kongregasyon osi ti benefisye.

¹⁹ Barnabas ti pran linisyativ pour ed Sol. San dout, sa bon aksyon ti ede pour sa de serviter Zeova ki devoue vin de bon zanmi. Parey Barnabas, eski ou pare pour ed bann nouvo dan kongregasyon, travay avek zot dan predikasyon e ed zot progrese spirityelman? Si ou fer sa, ou pou ganny rekonpanse. Si ou en nouvo proklanmater sa bon nouvel, eski ou aksepte led ki ou gannyen parey Sol ti fer? Si ou travay ansanm avek bann proklanmater ki annan plis leksperyans, ou pou amelyor ou abilite dan predikasyon, ou pou ganny plis lazwa e ou pou ganny bann bon zanmi ki pou la pour touzour.

20, 21. Ki mannyer bann serviter Bondye dan lepase ek ozordi in profite dan ‘bann letan lape’?

²⁰ Apre ki Sol ti’n konverti e i ti’n kapab kit sa landrwa sen e sof, “kongregasyon partou dan Zide, Galile ek Samari ti . . . anpe.” (Akt 9:31) Ki mannyer bann disip ti servi sa letan favorab? (2 Tim. 4:2) Sa resi i dir ki zot ti “vin deplizanpli for.” Bann zapot ek lezot frer responsab ti ranforsi lafwa bann disip e diriz zot anmezir ki kongregasyon “ti annan en gran respe pour Zeova e zot ti ganny rekonforte par lespri sen.” Par egzanp, Pyer ti servi sa letan pour ankouraz bann disip dan lavil Lida ki ti Saronn. Son zefor ti fer bann dimoun ki reste dan sa landrwa konmans krwar “dan Senyer.” (Akt 9:32-35) Bann disip pa ti les zot bann lobzektif personnel distrer zot me plito zot ti fer tou sa ki zot ti kapab pour pran swen avek kanmarad e pres sa bon nouvel. Sa ti fer ki lakantite disip dan kongregasyon “ti ogmante.”

²¹ Ver lafen 20 tyenm syek, bann Temwen Zeova dan en kantite pei ti “anpe.” Bann gouvernman ki ti opoz pep Bondye pour plizyer lannen ti nepli la e sa ti fer li fasil pour pres dan bann pei kot sa travay  predikasyon ti ganny restrikte. Dan serten ka, sa bann restriksyon ti ganny tire konpletman. Plizyer dizenn milye Temwen Zeova ti profit sa loportinite pour pres an piblik e zot ti ganny bann bon rezilta.

22. Ki mannyer ou kapab servi byen sa liberte ki ou annan?

²² Eski ou pe byen servi sa liberte ki ou annan? Si ou reste dan en pei kot ou kapab ador Bondye dan en fason lib, Satan pou anvi tant ou pour rod bann keksoz materyel olye rod lentere Rwayonm. (Mat. 13:22) Pa les ou ganny distrer. Servi byen sa letan lape ki ou annan la konmela. Vwar sa letan konman en loportinite pour rann temwannyaz afon e fer kongregasyon vin deplizanpli for. Rapel ki ou sirkonstans i kapab sanze en sel kou.

23, 24. (a) Ki nou aprann lo sa resi konsernan Tabita? (b) Ki nou devret determinen pour fer?

²³ Annou vwar sa ki ti arive avek en disip ki ti apel Tabita oubyen Dorkas. I ti reste Zope, en lavil ki pa lwen avek Lida. Sa ser fidel ti servi byen son letan ek son bann keksoz ki i ti annan. I ti fer “en kantite dibyen pour lezot e ed bann pov.” Me en sel kou i ti tonm malad e i ti mor. c Bann disip Zope, sirtou bann vev ti vreman sagren ler i ti mor akoz i ti fer bann bon keksoz pour zot. Ler Pyer ti ariv kot sa lakaz kot zot ti pe prepar lekor Tabita pour lanterman, i ti fer en mirak ki bann zapot Zezi pa ti’n deza fer avan. Pyer ti priye e apre Tabita ti resisite! Eski ou kapab mazin sa lazwa ki bann vev ek lezot disip ti santi ler Pyer ti kriy zot dan lasanm e montre zot ki Tabita ti vivan? Pa sa bann levennman ti’n bezwen donn zot lafors pour fer fas avek bann keksoz ki ti pe al arive avek zot! Sa nouvel konsernan sa mirak “ti fannen partou Zope e en kantite dimoun ti vin disip Senyer.”​—Akt 9:36-42.

²⁴ Nou aprann de keksoz enportan avek sa resi ankourazan konsernan Tabita. (1) Lavi i kourt. Alor i enportan ki nou annan en bon repitasyon devan Bondye kan nou ankor kapab! (Ekle. 7:1) (2) Sa lespwar lo rezireksyon i asire. Zeova ti vwar bann bon keksoz ki Tabita ti fer e i ti rekonpans li. Zeova pa pou oubliy  nou travay dir ki nou’n fer e si nou mor avan Armagedon, i pou resisit nou. (Ebr. 6:10) Alor, ki swa nou pe andir bann “letan difisil” oubyen nou “anpe,” annou persevere pour rann temwannyaz afon lo Zezi.​—2 Tim. 4:2.