1-3. Ki mannyer Zezi ti kit son bann zapot e ki bann kestyon nou kapab demande?

 ZOT pa ti oule ki sa bon letan ki zot ti pe pase avek Zezi i fini. Sa bann dernyen semenn ti vreman eksitan pour bann zapot! Zezi ti’n resisite e zot ti nepli sagren, zot ti dan lazwa. Pandan 40 zour, Zezi in aparet avek son bann disip plizyer fwa. I ti ansenny zot e ankouraz zot. Me sa zour i dernyen fwa ki Zezi i aparet avek zot.

² Bann zapot pe debout ansanm lo Montanny Pye Zoliv e zot pe ekout atantivman tou sa ki Zezi pe dir. Ler i fini koze, i lev son lanmen e i beni zot. Pour zot, i paret ki sa letan in pas tro vit. Apre, i konmans mont dan lesyel! Son bann disip i get li anmezir ki i mont dan lesyel. Finalman, en nyaz i kouver li e zot nepli vwar li. I’n fini ale, me zot kontinyen get dan lesyel.​—Lik 24:50; Akt 1:9, 10.

³ Sa levennman i en sanzman enportan dan lavi bann zapot Zezi. Ki zot  pou fer aprezan vi ki zot Met, Zezi Kri, in mont dan lesyel? Nou kapab asire ki zot Met in prepar zot pour kontinyen fer sa travay ki i ti’n konmanse. Ki mannyer i ti prepar zot pour sa travay enportan e ki zot ti fer? Ki sa i annan pour fer avek bann Kretyen ozordi? Nou pou trouv bann larepons ki ankourazan dan premye sapit liv Akt.

4. Ki mannyer Lik i konmans ekri liv Akt?

⁴ Ler Lik i konmans ekri liv Akt, i koz avek Teofil, sa menm zonm ki i ti koz avek dan son Levanzil ki i ti ekri avan sa. a Lik i konmans liv Akt par fer en rezimen bann levennman ki i ti ekri a lafen son Levanzil pour li montre ki liv Akt i en kontinyasyon son Levanzil. I ekri bann keksoz dan en lot fason e i donn bann nouvo lenformasyon.

5, 6. (a) Kwa ki pou fer lafwa bann disip Zezi reste for? (b) Ki mannyer lafwa bann Kretyen ozordi i baze lo “en kantite laprev konkret”?

⁵ Kwa ki pou fer lafwa bann disip Zezi reste for? Akt 1:3 i dir: “[Zezi] ti montre zot ki i ti vivan atraver en kantite laprev konkret.” Dan Labib, zis Lik “sa dokter ki [zot ti] kontan” ki’n servi sa lekspresyon “laprev konkret.” (Kol. 4:14) Sa lekspresyon ti ganny servi dan domenn medikal e i refer avek bann levidans ki zot ti kapab depan lo la. Zezi ti montre zot sa kalite levidans. I ti aparet avek son bann disip plizyer fwa, parfwa avek enn oubyen de disip, parfwa avek tou bann zapot e en fwa avek plis ki 500 disip. (1 Kor. 15:3-6) Sa ti vreman bann laprev konkret!

⁶ Lafwa bann vre Kretyen ozordi i osi baze lo “en kantite laprev konkret.” Eski i annan levidans ki montre ki Zezi ti viv lo later, ki i ti mor pour nou bann pese e ganny resisite? Wi i annan! Dan Parol Bondye i annan bann resi kot bann dimoun i rakont sa ki zot ti vwar e nou kapab krwar sa ki zot in dir. Tou sa ki zot in dir i bann levidans ki nou bezwen. Ler nou etidye sa bann resi e nou priye pour nou kapab aplik sa ki nou aprann, sa i kapab fer nou lafwa vin pli for. Nou devret rapel ki bann levidans konkret i kapab fer nou devlop en vre lafwa olye zis krwar sa ki nou tande lizye fermen. I enportan ki nou annan vre lafwa pour nou ganny lavi eternel.​—Zan 3:16.

7. Ki legzanp Zezi in kite pour son bann disip konsernan ansennyen e prese?

⁷ Zezi ti osi “koz avek zot konsernan Rwayonm Bondye.” Par egzanp, i ti eksplik zot bann profesi ki ti montre ki Mesi ti pou bezwen soufer e mor. (Lik 24:13-32, 46, 47) Ler Zezi ti fer zot konpran ki li i sa Mesi, i ti met lanfaz lo Rwayonm Bondye, parski Bondye ti’n swazir li pour vin  Lerwa dan sa Rwayonm. Zezi ti toultan pres konsernan sa Rwayonm e ozordi son bann disip i pres konsernan sa menm Rwayonm.​—Mat. 24:14; Lik 4:43.

8, 9. (a) Ki de keksoz ki bann zapot Zezi ti krwar ladan ki pa ti vre? (b) Ki mannyer Zezi ti ed son bann zapot sanz zot fason panse e ki bann Kretyen ozordi i kapab aprann avek sa?

⁸ Ler bann zapot ti rasanble lo Montanny Pye Zoliv, sa ti dernyen fwa ki zot ti avek Zezi lo later. Alor zot ti demann li: “Senyer, eski ou pe al retabli rwayonm Izrael la konmela?” (Akt 1:6) Sa kestyon i montre de keksoz ki bann zapot ti krwar ladan ki pa ti vre. Premyerman, zot ti krwar ki Rwayonm Bondye ti pou rekonmans diriz nasyon Izrael. Dezyenmman, zot ti krwar ki sa Rwayonm ti pou konmans dirize deswit, setadir “la konmela.” Ki mannyer Zezi ti ed zot sanz zot fason panse?

⁹ Zezi ti konnen ki sa ki ti pou arive apre ti pou ed zot sanz sa premye nide ki zot ti krwar ladan. Annefe, dan dis zour son bann disip ti pou vwar konmansman en nouvo nasyon e sa i Izrael spirityel! Sa lanmitye spesyal ki Bondye ti annan avek pep Izrael ti pe al fini. Konsernan sa dezyenm nide ki zot ti krwar ladan, Zezi ti dir zot zantiman: “I pa neseser pour zot konn letan ek lepok ki zis mon Papa i annan drwa deside kan i pou arive.” (Akt 1:7) Zeova i toultan fer keksoz dan sa pli bon moman. Avan ki Zezi ti mor, i ti dir ki ni menm Garson pa konn “sa zour ek sa ler” ki lafen pou arive me “zis Papa tousel ki konnen.” (Mat. 24:36) Menm ozordi, si bann Kretyen i enkyet tro bokou konsernan kan lafen sa move lemonn pou arive, annefe, zot pe enkyet konsernan en keksoz ki zot napa drwa deside kan i pou arive.

10. Ki latitid bann zapot ti annan ki nou osi nou devret annan e akoz?

¹⁰ Me kantmenm sa, nou pa devret annan en move pwennvi lo bann zapot Zezi akoz zot ti annan bokou lafwa. Zot ti demontre limilite e zot ti aksepte led Zezi ler i ti koriz zot. An plis ki sa, menm si zot nide konsernan sa ki sa Rwayonm pou fer, pa ti vre, zot ti annan en bon latitid. Zezi ti ankouraz son bann disip plizyer fwa par dir zot: “Kontinyen veye.” (Mat. 24:42; 25:13; 26:41) Zot ti reste eveye spirityelman e zot ti kontinyen rod bann levidans ki montre ki Zeova ti pe al pran aksyon. Nou osi nou bezwen annan sa menm latitid ozordi. Vi ki nou pe viv dan “bann dernyen zour” sa i fer li pli enportan pour nou reste eveye.​—2 Tim. 3:1-5.

11, 12. (a) Ki travay Zezi ti donn son bann disip pour fer? (b) Akoz i ti byen pour Zezi koz lo lespri sen ler i ti pe koz lo sa travay predikasyon?

¹¹ Zezi ti fer son bann zapot rapel kwa ki ti devret pli enportan pour zot. I ti dir zot: “Zot pou ganny pwisans ler lespri sen pou desann lo zot. Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) Sa nouvel ki Zezi  ti’n ganny resisite ti pou ganny anonse premyerman dan Zerizalenm, sa lavil kot bann dimoun ti touy Zezi. Apre sa, sa mesaz ti pou ganny anonse partou dan Zide, apre Samari e dan lezot landrwa ki pli lwen.

¹² Zezi ti promet son bann disip ankor ki i pou anvoy lespri sen pour ed zot e apre i ti koz lo sa travay predikasyon. I ti byen ki Zezi ti fer sa. Sa lekspresyon “lespri sen” i ganny servi plis ki 40 fwa dan liv Akt. Plizyer fwa, sa liv Labib i montre nou ki nou pa kapab fer lavolonte Zeova si nou pa ganny led lespri sen. Alor i enportan ki nou priy Zeova regilyerman e demann li son lespri sen! (Lik 11:13) Ozordi nou bezwen lespri sen plis ki avan.

13. Ziska kote pep Bondye i ale ozordi pour fer sa travay predikasyon e akoz nou devret fer tou sa ki nou kapab dan sa travay?

¹³ Lafason ki bann dimoun ti konpran sa lekspresyon “bann landrwa pli elwannyen lo later” dan premye syek, i diferan avek lafason ki nou vwar li ozordi. Parey nou’n vwar dan sa sapit avan, bann Temwen Zeova in aksepte sa travay pour pres sa bon nouvel avek tou zot leker akoz zot konnen ki Bondye i oule ki tou sort kalite dimoun i tann sa bon nouvel konsernan son Rwayonm. (1 Tim. 2:3, 4) Eski ou pe fer tou sa ki ou kapab dan sa travay predikasyon ki sov lavi? Ou pa pou kapab vwar en travay ki pli satisfezan ki sa okenn par! Zeova pou donn ou sa lafors ki ou bezwen pour fer sa travay. Liv Akt pou montre ou bann bon metod ki ou pou kapab servi e ki kalite latitid ou devret annan pour ou kapab ganny bann bon rezilta dan sa travay.

14, 15. (a) Ki bann lanz ti dir konsernan ler Zezi pou retournen e ki sa i vedir? (Get not anba lo paz.) (b) Dan ki sans Zezi ti pou retournen “dan menm fason” ki i ti ale?

¹⁴ Parey i’n ganny dir konmansman sa sapit, Zezi ti mont dan lesyel e zot ti nepli vwar li. Me son 11 zapot ti kontinyen debout e get dan lesyel. Finalman, de lanz ti aparet e dir zot zantiman: “Zonm sorti Galile, akoz zot la pe get dan lesyel? Sa Zezi ki ti avek zot e ki’n mont dan lesyel pou vini dan menm fason ki zot in vwar li al dan lesyel.” (Akt 1:11) Eski bann lanz ti pe dir ki Zezi ti pou retourn dan sa menm lekor ki i ti annan, parey serten larelizyon i ansennyen? Non, zot pa ti pe dir sa. Ki mannyer nou konn sa?

¹⁵ Sa bann lanz pa ti dir ki Zezi pou retourn dan sa menm lekor ki i ti annan, me zot ti dir “dan menm fason” b ki i ti ale. Dan ki fason i ti ale? Bann zapot ti nepli vwar Zezi ler bann lanz ti pe koz avek zot. Zis sa detrwa zonm, setadir bann zapot, ki ti konpran ki Zezi ti’n kit later e ki i ti pe mont kot son Papa dan lesyel. Zezi Kri pou retourn dan sa menm fason. Koumsanmenm in arive. Ozordi, zis bann dimoun ki konpran Labib e ki rekonnet sa letan ki nou pe viv ladan ki realize ki Zezi i la konman lerwa dan lesyel. (Lik 17:20) Nou bezwen konpran bann levidans ki montre ki  Zezi i la konman lerwa e dir lezot dimoun, koumsa zot osi zot pou vwar ki nou pe viv dan en letan ki irzan.

16-18. (a) Dapre Akt 1:13, 14, ki nou kapab aprann konsernan ler bann Kretyen ti zwenn ansanm pour ador Bondye? (b) Ki nou kapab aprann avek legzanp Mari, manman Zezi? (c) Akoz i enportan pour bann Kretyen zwenn ansanm ozordi?

¹⁶ Nou kapab konpran akoz bann zapot ti “retourn Zerizalenm dan en gran lazwa.” (Lik 24:52) Me ki mannyer zot ti pou fer sa ki Zezi ti’n ansenny zot? Dan Akt sapit 1 verse 13 ek 14 i dir ki zot ti’n rasanble dan en “lasanm anler” e nou kapab aprann bann keksoz enteresan konsernan ler zot ti rasanble ansanm koumsa. Dan sa letan, laplipar lakaz dan Palestin ti annan en lasanm anler me bann peron pour mont kot sa lasanm ti an deor lakaz. I kapab ki sa “lasanm anler” ti kot lakaz manman Mark ki Akt 12:12 i koz lo la. I paret ki sa lasanm ti en landrwa ki ti senp e apropriye pour bann disip Zezi zwenn ansanm. Me lekel ki ti la e ki zot ti pe fer?

¹⁷ Remarke ki pa zis bann zapot ki ti la e pa zis bann msye ki ti la. I ti osi annan “serten madanm” e sa ti enkli Mari, manman Zezi. Sa i dernyen fwa ki Labib i koz lo Mari. Mari pa ti anvi ki lezot i konsider li konman en dimoun enportan me o kontrer i ti demontre limite e i ti zwenn ansanm avek bann frer ek ser pour ador Zeova. I bezwen ki Mari ti kontan ki son kat lezot garson ti la avek li, menm si zot pa ti bann disip Zezi ler Zezi ti lo later. (Mat. 13:55; Zan 7:5) Depi ler zot demi frer ti’n mor e resisite, zot ti’n sanz zot latitid.​—1 Kor. 15:7.

¹⁸ I annan en lot rezon akoz sa bann disip ti’n rasanble ansanm. Akt 1:14 i dir: “Zot tou zot ti kontinyen priy en kantite avek menm bi.” Alor in toultan enportan pour bann Kretyen zwenn ansanm pour ador Bondye. Nou zwenn ansanm pour ankouraz kanmarad, pour ganny ansennyen, pour ganny bann konsey e pli enportan, pour ador Zeova nou Papa ki dan lesyel. Nou bann lapriyer ki nou fer ek bann kantik ki nou sante ler nou zwenn ansanm i fer li vreman kontan e i enportan pour nou. Annou pa zanmen aret zwenn ansanm dan sa bann rasanbleman ki sen e ankourazan!​—Ebr. 10:24, 25.

19-21. (a) Ki nou aprann avek rol Pyer dan kongregasyon? (b) Akoz en lot dimoun ti bezwen ranplas Zida e ki nou kapab aprann avek lafason ki zot ti rezourd sa problenm?

¹⁹ Apre sa, bann disip ti annan en lot problenm difisil e zapot Pyer ti fer laranzman pour rezourd sa problenm. (Verse 15-26) I rekonfortan pour vwar bann sanzman ki Pyer ti’n fer pandan sa bann semenn ki’n pase depi sa zour ki i ti trai son Senyer trwa fwa. (Mark 14:72) Nou tou nou fer pese e nou bezwen rapel ki Zeova i ‘bon e pare pour pardonn’ sa bann ki repantir senserman.​—Ps. 86:5.

 ²⁰ Pyer ti realize ki en lot dimoun ti pou bezwen ranplas Zida, sa zapot ki ti trai Zezi. Me lekel ki ti pou ranplas li? Sa nouvo zapot ti devret en dimoun ki ti akonpanny Zezi ler Zezi ti pe prese e ki ti vwar Zezi apre ki i ti’n ganny resisite. (Akt 1:21, 22) Sa ti parey sa promes ki Zezi ti fer ler i ti dir: “Zot ki’n swiv mwan pou asiz lo 12 tronn pour ziz sa 12 tribi Izrael.” (Mat. 19:28) Zeova ti anvi ki 12 zapot i swiv Zezi ler Zezi ti pe anons sa bon nouvel lo later pour zot vin sa “12 ros dan fondasyon” Nouvo Zerizalenm. (Rev. 21:2, 14) Alor Bondye ti fer Pyer konpran ki sa profesi ki dir, “ki son responsabilite konman sirveyan i ganny donnen avek en lot,” ti pe refer avek Zida.​—Ps. 109:8.

²¹ Ki mannyer zot ti swazir sa dimoun ki ti pou ranplas Zida? Zot ti tir o sor. Sa ti en keksoz ki zot ti abitye fer dan letan Labib. (Prov. 16:33) Par kont, sa i dernyen fwa ki Labib i montre ki tir o sor ti ganny fer dan sa fason. Aparaman, pli tar ler zot ti ganny lespri sen zot ti aret tir osor pour swazir en dimoun. Me akoz zot ti bezwen tir o sor? Bann zapot ti priye e dir: “Ou, O Zeova, ki konn leker tou dimoun, fer nou konnen lekel parmi sa de zonm ki ou’n swazir.” (Akt 1:23, 24) Zot ti anvi ki Zeova i swazir. Zeova ti swazir Matyas. I paret ki Matyas ti parmi sa 70 disip ki Zezi ti anvoye pour al prese. Alor, Matyas ti vin enn parmi “sa 12 zapot.” c​—Akt 6:2.

22, 23. Akoz ozordi nou devret soumet avek bann sirveyan dan kongregasyon e obei zot?

²² Sa ki ti arive i montre nou ki i enportan ki pep Bondye i travay dan en fason ki byen organize. Ozordi, bann frer responsab i ganny swazir pour vin bann sirveyan dan kongregasyon. Bann ansyen i servi sa ki Labib i dir pour deside si en frer i kalifye pour vin en sirveyan e zot priye pour ganny led lespri sen. Alor bann frer ek ser dan kongregasyon i konpran ki sa bann frer in ganny swazir par lespri sen. Pour sa rezon nou devret soumet avek zot e obei sa ki zot dir nou e sa pou fer ki tou dimoun dan kongregasyon pou korpere avek zot.​—Ebr. 13:17.

²³ Aprezan, vi ki bann disip ti’n reganny lafors akoz zot ti’n vwar Zezi apre ki i ti’n ganny resisite e zot ti’n osi ganny ankouraze par lafason ki kongregasyon ti pou ganny organize, zot ti pare pour sa ki ti pe al arive. Dan sa lot sapit nou pou vwar sa levennman enportan.