TRAKA i afekte tou dimoun, menm pep Bondye. Sa psalmis ti ekri: “Bann traka ti fatig mwan en kantite.” (Psonm 94:19) Deplis, Zezi ti dir ki pandan letan lafen bann “traka lavi” pou fer li pli difisil pour servi Zeova. (Lik 21:34) Be ou? Eski ou anba en ta presyon akoz bann problenm larzan, fanmir ouswa lasante? Ki mannyer Zeova i kapab ed ou?

I enposib pour nou fer fas avek traka nou tousel. Zapot Pol ti ekri: “Nou ganny pouse dan tou kote,” “nou enkyet” e “nou ganny rabat.” Me i ti osi dir ki sa i arive “san [ki nou] ganny kraze,” “perdi lespwar” oubyen “ganny detri.” Kwa ki ed nou andire? “Sa pisans ki napa son parey” e sa pwisans i sorti kot Zeova, nou Bondye Tou Pwisan.​—2 Korentyen 4:7-9.

Reflesir lo ki mannyer ou ti ganny “pisans ki napa son parey” dan lepase. Eski ou rapel en diskour ankourazan ki ti ogmant ou lapresyasyon pour lanmour fidel Zeova? Eski ou lafwa dan bann promes Zeova ti vin pli for ler ou ti ansenny lezot lo sa lespwar pour viv dan Paradi? Ler nou asiste bann renyon e partaz nou lafwa avek lezot nou ganny lafors pour andir bann traka lavi e nou ganny lape lespri ki permet nou servi Zeova avek lazwa.

I tre probab ki ou santi ki ou annan en ta keksoz pour fer. Par egzanp, Zeova i demann ou pour rod plito son Rwayonm e pour annan en bon progranm spirityel. (Matye 6:33; Lik 13:23) Me ki i arive si lopozisyon, problenm lasante ouswa fanmir in sis tou ou lafors? Ki arive si ou travay i pran sa letan ek lenerzi ki ou ti pou servi dan kongregasyon? Ler ou annan tou sa bann keksoz pour fer me ou napa ase letan ek lenerzi ou kapab santi ou dekouraze. Petet ou’n menm demande si Zeova pa pe ekspekte tro bokou avek ou.

Zeova i konpran nou. I pa zanmen ekspekte ki nou fer plis ki nou kapab. I osi rekonnet ki i pran letan pour refer apre ki nou’n fer fas avek en problenm fizik ouswa emosyonnel.​—Psonm 103:13, 14.

Annou vwar ki mannyer Zeova ti pran swen avek profet Eliya. Ki Zeova ti fer ler Eliya ti taye e sov dan dezer akoz i ti per e dekouraze? Eski i ti dispit avek sa profet e donn li lord pour retournen e fer sa travay ki i ti’n donn li? Non. Me, de fwa Zeova ti anvoy en lanz pour lev Eliya zantiman e donn li en keksoz pour manze. Kantmenm sa, 40 zour pli tar Eliya ti ankor enkyet e per. Alor ki Zeova ti fer an plis pour ed li? Premyerman, Zeova ti demontre ki  i ti kapab protez li. Dezyenmman, Zeova ti rekonfort Eliya avek “en lavwa kalm e dous.” Trwazyenmman, Zeova ti revele ki i ti annan plizyer milye lezot dimoun ki ti pe ador li fidelman. Pa bokou letan apre, Eliya ti kontiny son travay konman en profet byen devoue. (1 Lerwa 19:1-19) Ki leson nou kapab aprann? Ler bann traka ti fatig Eliya, Zeova ti demontre pasyans ek konpasyon anver li. Zeova pa’n sanze. I pran swen avek nou dan menm fason.

Ler ou mazin lo servis ki ou kapab donn Zeova, ou bezwen rezonnab. Pa bezwen konpar sa ki ou kapab fer ozordi avek sa ki ou ti kapab fer dan lepase. Annou pran en legzanp: En atlet ki aret son lantrennman pour plizyer mwan oubyen lannen pa kapab rekonmans taye parey avan, deswit. Me i bezwen fikse bann pti lobzektif ki pou ranforsi son lafors ek landirans. Bann Kretyen i parey bann atlet. Zot annan en lobzektif antet ler zot pe form zot lekor. (1 Korentyen 9:24-27) Akoz ou pa fikse en lobzektif ki ou kapab atenn la konmela? Par egzanp, petet ou kapab fikse en lobzektif pour asiste en renyon. Demann Zeova pour ed ou atenn ou lobzektif. Anmezir ki ou reganny lafors spirityel, ou pou “goute e vwar ki Zeova i bon.” (Psonm 34:8) Pa zanmen bliye ki tou sa ki ou fer pour montre Zeova ki ou kontan li, i annan en gran valer pour li, menm si i paret ptigin.​—Lik 21:1-4.

Ki mannyer Zeova ti donn June lafors pour retourn ver li? I dir nou: “Mon ti kontinyen priy Zeova e demann li pour ed mwan. Apre mon bel fiy ti dir mwan ki i ti annan en lasanble ki ti pou ganny fer dan sa landrwa kot mon reste. Mon ti deside pour asiste en zour lasanble. Mon ti santi mwan vreman byen pour parmi pep Zeova ankor enn fwa. Sa lasanble ti sa lankourazman ki mon ti pe espere. Aprezan mon pe servi Zeova avek lazwa ankor. Mon lavi i annan plis sans aprezan. Mon konnen ki mon bezwen mon bann frer ek ser plis ki zanmen oparavan e ki mon bezwen aksepte zot led. Mon rekonesan ki i ti ankor annan letan pour mwan retourn kot Zeova.”