Ser konpanyon Kretyen:

Parey ou konnen, Labib i koz en kantite lo dimoun. Bokou parmi zot ti bann zonm ek fanm fidel ki ti fer fas avek menm defi ki nou ozordi. Zot ti “annan menm natir ki nou,” setadir bann santiman parey nou. (Zak 5:17) Serten ti sarze avek bann problenm ek traka. Lezot ti ganny ofanse par en manm zot fanmir ouswa en serviter Zeova. Tandis ki lezot ti soufer lefet ki zot konsyans ti sarze akoz bann fot ki zot ti’n komet.

Sa bann sityasyon ti fer serten elwannyen avek Zeova, me eski zot ti konpletman kit Zeova? Non. Bokou parmi zot ti parey sa psalmis ki ti priye: “Mon’n egare parey en mouton perdi. Rod ou serviter parski mon pa’n oubliy ou bann komannman.” (Psonm 119:176) Eski ou’n deza santi koumsa?

Zeova pa zanmen oubliy son bann serviter ki’n elwannyen avek kongregasyon. O kontrer, i fer zefor pour ed zot, souvan atraver bann frer ek ser dan kongregasyon. Par egzanp, annou vwar ki mannyer Zeova ti ed son serviter Zob ki ti pas atraver en ta problenm. I ti perdi tou sours son reveni, perdi bann dimoun ki i ti kontan dan lanmor e ganny en maladi grav. Deplis, bann dimoun ki ti sipoze siport li ti dir li bann parol blesan. Malgre sa, Zob pa ti zanmen abandonn Zeova, menm si i ti annan en move fason panse a en serten moman. (Zob 1:22; 2:10) Ki mannyer Zeova ti ed Zob pour revin stab?

Zeova ti ed Zob atraver enn son bann serviter ki apel Eliou. Eliou ti ekoute anmezir ki Zob ti eksprim son santiman e sa ti pous li pour koze. Me ki i ti pou dir? Eski i ti pou kritik Zob ouswa esey motiv li par fer li santi li koupab oubyen onte? Eski Eliou ti krwar ki i pli siperyer ki Zob? Non. O kontrer, Eliou ti ganny motive par lespri sen Bondye pour dir: “Devan sa vre Bondye mon zis parey ou menm, mwan osi mon’n ganny fer avek larzil.” Apre i ti reasir Zob: “Ou pa devret per mwan e ou pa devret les okenn presyon sorti kot mwan anvair ou.” (Zob 33:6, 7) Eliou pa ti oule fer Zob soufer plis ankor, me avek lanmour i ti donn Zob sa konsey ek lankourazman ki i ti bezwen.

Nou anvi ki ou konnen ki nou’n prepar sa brosir avek sa menm leta lespri. Premyerman, nou’n ekout bann ki ti’n elwanny zot avek kongregasyon eksprim zot santiman e nou’n pran an konsiderasyon zot sirkonstans. (Proverb 18:13) Apre, nou’n gete ki Labib i dir e atraver lapriyer nou’n egzamin bann resi ki montre lafason ki Zeova ti ed son bann serviter dan lepase ler zot ti pas dan sa bann tel sirkonstans. Finalman, nou’n servi bann resi dan Labib ansanm avek bann leksperyans dan nou letan pour ekri sa brosir. Nou ti a kontan ankouraz ou pour etidye sa brosir. Ou kapab asire ki nou vreman kontan ou.

Konsey Direkter Temwen Zeova