LESON 38
Annan en bon pwennvi lo lavi
Dan lavi i annan bokou zoli keksoz pour eksperyanse. Menm ler nou pe fer fas avek serten problenm, sa pa vedir ki tou keksoz dan lavi nepli gou. Ki mannyer nou kapab montre ki nou annan en bon pwennvi lo lavi? Ki rezon pli enportan nou annan pour nou apresye lavi?
1. Akoz nou devret annan en bon pwennvi lo lavi?
Nou devret annan en bon pwennvi lo lavi akoz lavi i en kado sorti kot nou Papa ki kontan nou, Zeova. I “sa Enn ki donn lavi” setadir i’n kree tou sa ki vivan. (Psonm 36:9) “Li menm ki donn tou dimoun lavi, i fer zot tou respire e i donn zot tou keksoz.” (Akt 17:25, 28) Zeova i donn nou sa ki nou bezwen pour nou reste vivan. Me pa zis sa, i’n fer nou dan en fason ki gou pour viv.—Lir Akt 14:17.
2. Ki mannyer nou kapab montre Zeova ki nou apresye lavi?
Dek ki ou ti ganny konsevwar dan vant ou manman, Zeova ti enterese avek ou. David, en adorater Zeova, ti ganny enspire pour dir: “Ou ti menm vwar mwan dan vant mon manman.” (Psonm 139:16) Ou lavi i vreman presye pour Zeova. (Lir Matye 10:29-31.) I ti pou sagrin li bokou si okenn dimoun i volonterman pran lavi son kanmarad ouswa pran son prop lavi. a (Egzod 20:13) I ti pou osi sagrin Zeova si nou met nou lavi an danze e nou pa pran prekosyon pour protez lavi nou kanmarad. Ler nou pran swen avek nou lavi e nou respekte lavi lezot, nou montre ki nou vreman apresye sa zoli kado lavi.
AL PLI O PROFON
Vwar serten fason ki ou kapab montre ki ou apresye lavi.
3. Pran swen avek ou lasante
Bann Kretyen ki’n dedye zot lavi avek Zeova i servi tou laspe zot lavi pour servi li. I konmsi zot donn zot lavi konman en sakrifis pour Bondye. Lir Romen 12:1, 2 e apre reponn sa bann kestyon:
-
Kwa ki devret motiv ou pour pran swen avek ou lasante?
-
Ki serten fason ki ou kapab pran swen avek ou lasante?
4. Pran prekosyon pour evit dimal oubyen lanmor
Labib i ankouraz nou pour pa fer bann keksoz ki danzere. Zwe sa VIDEO pour vwar serten keksoz ki ou kapab fer pour evit danze.
Lir Proverb 22:3 e apre diskite ki mannyer ou ek lezot i kapab evit danze . . .
-
dan ou lakour.
-
kot ou landrwa travay.
-
ler pe fer sport.
-
ler ou pe dray oubyen ou en pasaze dan en transpor.
5. Respekte lavi en zanfan ki pa ankor ne
Dan en fason poetik, David ti dir ki Zeova i enterese avek lavi ek devlopman en zanfan ki pa ankor ne. Lir Psonm 139:13-17 e apre reponn sa kestyon:
-
Pour Zeova, eski lavi en dimoun i konmans ler i ganny konsevwar dan vant son manman oubyen ler i ne?
Lalwa ki Zeova ti donn nasyon Izrael lontan, ti protez bann manman ek zot zanfan ki pa ankor ne. Lir Egzod 21:22, 23 e apre reponn sa bann kestyon:
-
Ki mannyer Zeova ti vwar en dimoun ki ti pran lavi en zanfan ki pa ankor ne, menm si i ti fer li par aksidan?
-
Ki mannyer i ti pou santi si en dimoun ti pou fer sa volonterman? b
-
Ki mannyer ou santi konsernan pwennvi Zeova lo sa size?
Menm en madanm ki rekonnet ki lavi i presye i kapab santi ki i napa okenn lezot swa apard ki lavortman. Lir Izai 41:10 e apre reponn sa bann kestyon:
-
Si en madanm pe ganny presyon pour fer lavortman, avek lekel i devret demann led? Akoz?
SERTEN DIMOUN I DIR: “En madanm i annan drwa deside si i pou fer lavortman, li ki deside ki i pou fer avek son lekor.”
-
Kwa ki konvenk ou ki lavi en manman ek son pti baba dan son vant i annan bokou valer pour Zeova?
REZIMEN
Labib i ansenny nou pour kontan lavi, respekte li e protez li, akoz i en kado sorti kot Zeova. Sa i enkli nou lavi e osi lavi lezot.
Revizyon
-
Akoz lavi en imen i annan bokou valer pour Zeova?
-
Ki mannyer Zeova i santi ler en dimoun i volonterman pran lavi son kanmarad?
-
Akoz ou apresye lavi?
FER PLIS RESERS
Ki mannyer nou kapab remersye Zeova pour lavi ki i’n donn nou?
Trouv larepons pour sa kestyon, Eski Bondye pou pardonn en madanm ki’n fer lavortman?
Vwar ki mannyer pwennvi Bondye lo lavi i devret ed nou pour nou byen swazir nou bann divertisman.
“‘Extreme Sports’—Should You Take the Risk?” (Veye! 8 Oktob 2000 an Angle)
Si en dimoun i anvi pran son lavi? Gete ki mannyer Labib i kapab ede.
“Mon anvi mor—Eski Labib i kapab ed mwan ler mon pe mazin swiside?” (Lartik lo jw.org)
a Zeova i vreman enterese avek tou bann ki annan leker brize. (Psonm 34:18) I konpran sa douler ki zot resanti ki fer zot anvi pran zot lavi e i anvi ed zot. Pour vwar ki mannyer son led i kapab fer en diferans, lir sa lartik “Mon anvi mor—Eski Labib i kapab ed mwan ler mon pe mazin swiside?” ki ganny trouve dan seksyon Fer plis resers dan sa leson.
b I annan dimoun ki dan lepase i’n fer lavortman. I pa neseser pour zot les sa santiman koupab fatig zot, akoz Zeova i kapab pardonn zot. Pour plis lenformasyon, vwar sa lartik “Ki Labib i dir lo lavortman?” ki trouve dan sa seksyon Fer plis resers dan sa leson.
Ou pou kapab kontan sa osi
BANN KESTYON KI DIMOUN I SOUVAN DEMANDE LO TEMWEN ZEOVA
Ki sa letid Labib ki Temwen Zeova i ofer?
Ou kapab servi nenport tradiksyon Labib avek sa progranm Labib enteraktif gratwit ki Temwen Zeova i ofer. Santi ou alez pour envit ou fanmir antye oubyen nenport zanmi pour asiste ou letid.
