Nou tou nou annan nou gou personnel an sa ki konsern nou resanz ek nou stil seve. Nou kapab swazir sa ki nou anvi mete e an menm tan fer plezir Zeova, si nou swiv enn de prensip Labib. Annou vwar sa bann prensip Labib.

1. Ki prensip ki devret gid nou ler nou pe swazir nou resanz ek stil seve?

Nou devret touzour abiy nou dan en fason “apropriye, ki respektab e avek bon zizman” e toultan gard nou prop, lefet ki nou “ador Bondye.” (1 Timote 2:9, 10) Annou get sa kat prensip: (1) Nou lenz i devret “apropriye.” Parey ou’n remarke dan nou bann renyon, nou konman serviter Zeova nou annan diferan gou. Me nou lenz ek nou stil seve i montre ki nou annan respe pour sa Bondye ki nou adore. (2) Sanz dan en fason “respektab” i vedir ki nou fason sanze pa devret provokan ni atir tro bokou latansyon lo nou lekor. (3) Nou montre ki nou annan “bon zizman” ler nou pa swiv tou lanmod lenz ek seve ki sorti. (4) Ler dimoun i get nou, zot devret fasilman vwar ki nou “ador [sa vre] Bondye.”​—1 Korentyen 10:31.

2. Akoz nou devret mazin lezot ler nou pe deside ki pour mete?

Kantmenm nou lib pour swazir ki nou pou mete, nou devret mazin lefe ki nou fason sanze i annan lo lezot. Nou fer nou mye pour pa ofans personn, o kontrer, nou “fer plezir nou prosen pour son prop byennet e pour batir li.”​—Lir Romen 15:1, 2.

3. Ki mannyer nou fason sanze i kapab fer lezot dimoun anvi aprann lo Zeova?

Nou devret toultan sanz byen. Me nou devret fer plis zefor sirtou ler nou asiste renyon e ler nou pe al prese. Nou pa anvi nou fason sanze anpes dimoun konpran sa mesaz enportan ki nou pe anmenn pour zot. O kontrer, nou anvi fer laverite atiran pour zot e “anmenn loner lo lansennyman . . . nou Sover.”​—Tit 2:10.

 AL PLI O PROFON

4. En bon laparans fizik i montre respe pour Zeova

Ki rezon pli enportan nou annan pour nou sanz byen? Lir Psonm 47:2 e apre reponn sa bann kestyon:

• Vi ki nou reprezant Zeova, ki mannyer sa i devret enfliyans lafason ki nou sanze?

• Eski ou krwar i fer sans pour nou veye ki mannyer nou sanze ler nou asiste renyon e al prese? Akoz?

 5. Ki mannyer nou kapab fer bann bon swa konsernan nou fason sanze ek stil seve?

Zwe sa VIDEO.

I pa enportan si nou lenz i kout ser oubyen bon marse me sa ki pli enportan se ki i devret prop e apropriye pour tou lokazyon. Lir 1 Korentyen 10:24 ek 1 Timote 2:9, 10. Apre, diskite akoz nou devret evite met bann lenz ki . . .

• en pe anpyang, devergonde oubyen tro casual.

• tro sere, kler oubyen provokan.

Bann Kretyen ozordi pa bezwen swiv Lalwa Moiz me i ansenny nou bokou lo fason ki Zeova i panse. Lir Deterononm 22:5 e apre reponn sa kestyon:

• Akoz nou devret evit bann fason sanze ek stil seve ki fer zonm vin parey madanm e madanm vin parey zonm?

Lir 1 Korentyen 10:32, 33 ek 1 Zan 2:15, 16 e apre reponn sa bann kestyon:

• Akoz i devret en konsern pour nou si nou fason sanze i ofans serten dan nou kominote ouswa dan kongregasyon?

• Ki kalite fason sanze ek stil seve ki popiler kot ou reste?

• Ou krwar serten sa bann stil i kapab pa apropriye pour en Kretyen? Akoz?

 REZIMEN

Ler nou byen sanze, nou montre respe pour Zeova e osi pour lezot.

Revizyon

• Akoz nou fason sanze ek stil seve i enportan pour Zeova?

• Ki serten prensip ki devret gid nou ler nou pe deside ki nou pou mete?

• Ki mannyer nou laparans fizik i kapab enfliyans lafason ki lezot i vwar vre ladorasyon?