Zezi i Sef kongregasyon Kretyen. (Efezyen 5:23) Kantmenm i dan lesyel ozordi, i pe diriz son bann disip lo later atraver en group ki apel “lesklav fidel e pridan.” (Lir Matye 24:45.) Zezi in apwent sa “lesklav” e donn li serten lotorite. Me i en lesklav, alor i bezwen obeir Kris e servi son bann frer. Lekel sa lesklav? Ki mannyer sa lesklav i pran swen avek nou?

1. Lekel “lesklav fidel e pridan”?

Zeova in toultan servi en zonm oubyen en pti group zonm pour gid son pep. (Malaki 2:7; Ebre 1:1) Apre lanmor Zezi, bann zapot ek bann ansyen Zerizalenm ki ti fer sa. (Akt 15:2) Ozordi nou swiv menm model. I annan en group ansyen ki apel Konsey Direkter Temwen Zeova. Zot, zot fourni nouritir spirityel e diriz sa travay predikasyon. Sa group i “lesklav fidel e pridan ki [Zezi] in met . . . ansarz.” (Matye 24:45a) Tou manm Konsey Direkter i bann Kretyen swazir. Zot pe espere pour zwenn ansanm avek Kris dan son Rwayonm ler zot lavi lo later i fini.

2. Ki nouritir spirityel lesklav fidel i fourni?

Zezi ti dir ki sa lesklav fidel ti pou “donn [lezot Kretyen] manze dan sa moman apropriye.” (Matye 24:45b) Zis parey manze ki nou manze toulezour i ed nou pour reste for e an bonn sante, manze spirityel savedir lenstriksyon sorti dan Parol Bondye, i donn nou lafors ki nou bezwen pour reste fidel avek Zeova e pour fer sa travay ki Zezi in donn nou. (1 Timote 4:6) Nou ganny sa nouritir spirityel atraver nou bann renyon ek lasanble. Nou osi ganny li atraver nou bann piblikasyon ki baze lo Labib e osi bann video ki ed nou konpran lavolonte Bondye e fer nou vin pli pros avek li.

 AL PLI O PROFON

3. Pep Zeova i bezwen organize

Anba gidans Zezi, Konsey Direkter i organiz travay Temwen Zeova. Menm laranzman ti egziste parmi bann premye Kretyen. Zwe sa VIDEO.

Lir 1 Korentyen 14:33, 40 e apre reponn sa kestyon:

• Ki mannyer sa bann verse i montre ki Zeova i anvi son bann Temwen i organize?

4. Lesklav fidel i organiz nou travay predikasyon

Travay pli enportan ki bann premye Kretyen ti fer ti prese. Lir Akt 8:14, 25 e apre reponn sa bann kestyon:

• Lekel ki ti diriz sa travay predikasyon parmi bann premye Kretyen?

• Ki mannyer Pyer ek Zan ti reazir anver lenstriksyon bann zapot?

Predikasyon i sa travay pli enportan ki Konsey Direkter i organize. Zwe sa VIDEO.

 Zezi ti dir ki predikasyon i vreman enportan. Lir Mark 13:10 e apre reponn sa bann kestyon:

• Akoz sa travay predikasyon i sitan enportan pour Konsey Direkter?

• Akoz nou bezwen “lesklav fidel e pridan” pour organiz sa travay partou dan lemonn?

5. Lesklav fidel i donn lenstriksyon

Konsey Direkter i donn lenstriksyon bann Kretyen partou dan lemonn. Ki mannyer i deside ki lenstriksyon i pou donnen? Gete ki mannyer konsey direkter dan premye syek ti fer sa. Lir Akt 15:1, 2 e apre reponn sa bann kestyon:

• Ki dezakor ti arive parmi bann premye Kretyen?

• Kote Pol, Barnabas ek lezot ti ale pour esey rezourd sa problenm?

Lir Akt 15:12-18, 23-29 e apre reponn sa kestyon:

• Avan fer en desizyon, ki konsey direkter sa letan ti fer ler zot ti pe rod gidans Bondye lo sa size?​—Vwar verse 12, 15 ek 28.

Lir Akt 15:30, 31 ek 16:4, 5 e apre reponn sa bann kestyon:

• Ki mannyer bann premye Kretyen ti reazir anver lenstriksyon ki konsey direkter ti donnen?

• Ki mannyer Zeova ti beni zot lobeisans?

Lir 2 Timote 3:16 ek Zak 1:5 e apre reponn sa kestyon:

• Kote Konsey Direkter i rod gidans ler zot pe fer bann desizyon ozordi?

 REZIMEN

Konsey Direkter i sa “lesklav fidel e pridan” ki Kris in apwente. I donn lenstriksyon ek nouritir spirityel bann Kretyen partou lo later.

Revizyon

• Lekel ki’n apwent “lesklav fidel e pridan”?

• Ki mannyer Konsey Direkter i pran swen avek nou?

• Eski ou krwar Konsey Direkter i sa “lesklav fidel e pridan”?