Ou kapab aprann konn Zeova an lizan Labib. Byen lontan, Bondye ti swazir serten imen pour ekrir son bann panse. Sa bann lekritir i ganny apele Labib. Konmela, nou aprann konn Bondye atraver Labib. Parski Labib i kontyen parol Zeova, oubyen son mesaz, i osi ganny apele Parol Bondye. Nou kapab krwar sa ki Labib i dir akoz Zeova pa zanmen manti. “Bondye pa kapab manti.” (Ebre 6:18) Parol Bondye i kontyen laverite.—Zan 17:17.

Labib i enn bann kado pli presye ki nou’n ganny ofer. I parey en let ki en papa in anvoy pour son bann zanfan ki i kontan bokou. I fer nou konn promes Bondye pour transform later dan en demer merveye—en paradi. I dir nou sa ki i’n fer dan lepase, sa ki i pe fer konmela, e sa ki i pou fer dan lavenir pour son bann zanfan fidel. I osi ed nou pour rezourd nou bann problenm e pour trouv boner.—2 Timote 3:16, 17.

 Bann Temwen Zeova i zanmi Bondye; zot pou ed ou konpran sa ki Labib i ansennyen. Zis dir zot ki ou anvi etidye Labib. Zot pa demann okenn peyman pour sa. (Matye 10:8) Anplis, ou kapab asiste bann renyon Kretyen. Zot ganny fer dan bann landrwa ladorasyon, apele Lasal Rwayonm. Si ou asiste bann renyon Kretyen ou konnesans lo Bondye pou agrandi vitman.

Ou kapab aprann konn Bondye atraver bann keksoz ki i’n fer. Par egzanp, Labib i dir: “Bondye ti kree bann lesyel ek later.” (Zenez 1:1) Kan Zeova ti kree “bann lesyel,” i ti fer soley. Ki sa i dir nou konsernan Bondye? I dir nou ki Zeova i annan en gran pwisans. Zis li ki kapab fer en keksoz sitan pwisan parey soley. I osi dir nou ki Zeova i saz vi ki pour fer soley, ki donn lasaler ek lalimyer me ki pa zanmen epwize, i demann lasazes.

Kreasyon Zeova i montre ki i kontan nou. Mazin tou sa varyete fri ki annan lo later. Zeova ti kapab fourni nou avek zis en kalite fri—oubyen pa donn nou ditou. Plito, Zeova in donn nou plizyer kalite fri avek en gran varyete laform, groser, kouler, ek gou. Sa i montre ki Zeova i en Bondye ki pa zis kontan nou me i osi tre zenere, i prevwar nou bezwen e i bon.—Psonm 104:24.