Si ou anvi vin en zanmi Bondye, ou bezwen pratik larelizyon ki Bondye i aprouve. Zezi ti dir ki “bann vre ladorater” ti pou ador Bondye an armoni avek “laverite.” (Zan 4:23, 24) I annan zis en fason pour ador Bondye korekteman. (Efezyen 4:4-6) Vre relizyon i anmenn ver lavi eternel, e fo relizyon i anmenn ver destriksyon.—Matye 7:13, 14.

Ou kapab rekonnet vre relizyon an obzervan bann dimoun ki pratik li. Vi ki Zeova i bon, son bann vre adorater i devret bann bon dimoun. Zis parey en bon pye zoranz i prodwi bann bon zoranz, vre relizyon i prodwi bann bon dimoun.—Matye 7:15-20.

Bann zanmi Zeova i annan en respe profon pour Labib. Zot konnen ki Labib i sorti kot Bondye. Zot les sa ki i dir gid zot lavi, rezourd zot problenm, e ed zot aprann konn Bondye. (2 Timote 3:16) Zot sey pratik sa ki zot prese.

 Bann zanmi Zeova i montre lanmour pour enn a lot. Zezi ti montre lanmour anver bann dimoun par ansenny zot konsernan Bondye, e geri bann ki ti malad. Bann ki pratik vre relizyon i osi montre lanmour anver lezot. Parey Zezi, zot pa mepriz bann ki pov oubyen bann ki sorti dan en group etnik diferan. Zezi ti dir ki dimoun ti pou konn son bann disip par lanmour ki zot montre anver kanmarad.—Zan 13:35.

Bann zanmi Bondye i onor non Bondye, Zeova. Si en dimoun i refize servi ou non, eski sa dimoun ti a kapab vin ou zanmi pros? Non! Kan nou annan en zanmi, nou servi son non e nou dir bann bon keksoz lo sa zanmi avek lezot. Alor bann ki swete vin bann zanmi Bondye, i devret servi son non e koz lo li avek lezot. Zeova i anvi nou fer sa.—Matye 6:9; Romen 10:13, 14.

Parey Zezi, bann zanmi Bondye i ansenny dimoun konsernan Rwayonm Bondye. Rwayonm Bondye i en gouvernman seles ki pou fer later vin en paradi. Bann zanmi Bondye i partaz sa bon nouvel lo Rwayonm Bondye avek lezot.—Matye 24:14.

Bann Temwen Zeova i esey vin zanmi Bondye. Zot respe Labib e annan lanmour parmi zot. Zot osi servi e onor non Bondye e ansenny lezot lo son Rwayonm. Bann Temwen Zeova i pratik vre relizyon lo later ozordi.