Lennmi prensipal Bondye se Satan Dyab. I en kreatir spirityel ki ti rebel kont Zeova. Satan pe kontinyen lit kont Bondye e koz bokou problenm pour bann imen. Satan i mesan. I en manter e en mertriye.—Zan 8:44.

Lezot kreatir spirityel ti zwenn Satan dan son rebelyon kont Bondye. Labib i apel zot bann demon. Parey Satan, bann demon i lennmi avek imen. Zot kontan fer ditor bann dimoun. (Matye 9:32, 33; 12:22) Zeova pou detrir Satan avek son bann demon pour touzour. I reste zot zis en pti gin letan pour kree problenm pour bann imen.—Revelasyon 12:12.

Si ou anvi vin zanmi Bondye, ou pa devret fer sa ki Satan i oule ou fer. Satan ek bann demon i ay Zeova. Zot bann lennmi Bondye e zot anvi fer ou vin en lennmi Bondye. Ou bezwen swazir lekel ki ou anvi fer plezir—Satan oubyen Zeova. Si ou anvi lavi eternel, ou bezwen swazir pour fer lavolonte Bondye. Satan i annan plizyer trik ek fason pour tronp dimoun. Lamazorite dimoun pe ganny tronpe par li.—Revelasyon 12:9.