Paradi pa pou parey sa monn ki nou pe viv ladan konmela. Bondye pa ti zanmen oule ki later i ranpli avek troub, lapenn, douler ek soufrans. Dan lavenir, Bondye pou fer later vin en paradi. Ki mannyer Paradi pou ete? Annou vwar sa ki Labib i dir:

Bon dimoun. Paradi pou vin fwaye bann zanmi Bondye. Zot pou fer sa ki byen anver kanmarad. Zot pou viv dapre bann prensip zis Bondye.—Proverb 2:21.

Nouritir an abondans. Dan Paradi, pou napa mankman manze. Labib i dir: “I pou annan legren [oubyen manze] an abondans lo later.”—Psonm 72:16.

Bon lakaz ek travay agreab. Dan Paradi teres, sak fanmiy pou annan son prop lakour. Tou dimoun pou fer travay ki anmenn vre boner.—Izai 65:21-23.

Lape dan lemonn antye. Dimoun pou nepli  lager e mor dan lager. Parol Bondye i dir: “[Bondye] pe fer arete bann lager ziska ekstremite later.”—Psonm 46:8, 9.

Bonn sante. Labib i promet ki: “Okenn zabitan pa pou dir: ‘Mon malad.’” (Izai 33:24) Anplis, personn pa pou bwate, aveg, sourd oubyen pa kapab koze.—Izai 35:5, 6.

En lafen avek douler, lapenn ek lanmor. Parol Bondye i dir: “Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.

Dimoun mesan pou’n disparet. Zeova i promet: “Bann mesan . . . pou ganny retranse lo later; e sa bann ki tret, pou ganny arase lo la.”—Proverb 2:22.

Dimoun pou kontan e respe kanmarad. Pou nepli annan lenzistis, lopresyon, vorasite ek laenn. Dimoun pou ini e pou viv an armoni avek bann prensip zis Bondye.—Izai 26:9.