Lanmitye i baze lo lanmour. Pli ou aprann konn Zeova, pli ou lanmour pour li pou agrandi. Ofiramezir ki ou lanmour pour Bondye i agrandi, ou dezir pour servi li pou agrandi li osi. Sa pou pous ou pour vin en disip Zezi Kri. (Matye 28:19) Zwenn lafanmiy ere bann Temwen Zeova, pou fer ou eksperyans lanmitye avek Bondye pour touzour. Ki ou devret fer?

Ou devret montre ou lanmour pour Bondye an obeisan son bann lalwa. “Annefe, la lanmour Bondye: ki nou obei son konmannman; e son bann konmannman i pa en fardo.”—1 Zan 5:3.

Aplik sa ki ou aprann. Zezi ti rakont en zistwar ki ilistre sa. En zonm saz ti batir son lakaz lo ros. En zonm bet ti batir son lakaz lo disab. Kan en gro tanpet ti vini, sa lakaz ki ti’n konstri lo ros pa ti tonbe, me sa enn ki ti’n konstri lo disab ti tonbe e kraze. Zezi ti dir sa ki tann son bann lansennyman e pratik li, i parey sa zonm saz ki ti batir lo ros. Me bann ki ekout son bann lansennyman e pa pratik zot, i parey sa zonm bet ki ti batir lo disab. Lekel ant sa de zonm ki ou anvi vin parey?—Matye 7:24-27.

 Dedikasyon. Sa i vedir ki ou apros Zeova dan lapriyer e dir li ki ou anvi fer son lavolonte pour touzour. Fer lavolonte Bondye pou montre ki ou en disip Zezi Kri.—Matye 11:29.

Batenm. “Leve e ou a ganny batize, e ki ou bann pese i ganny lave an envokan non Senyer.”—Akt 22:16.

Vin antyerman enplike dan servis Bondye. “Dan tou sa ki zot fer, fer li avek tou zot leker, konmsi zot pe travay pour [Zeova, NW] non pa pour en zonm.”—Kolosyen 3:23.