Zezi i ankor Samari ouswa Galile. Aprezan bann Farizyen i demann li kan Rwayonm pou vini. Zot ekspekte ki i pou annan bann gran seremoni ler sa i arive. Par kont, Zezi i dir: “Rwayonm Bondye pa pe vin dan en fason ki tou dimoun pou vwar, dimoun pa pou dir, ‘Gete, la i la!’ ouswa ‘La i laba!’ Parski Rwayonm Bondye i parmi zot.”​—Lik 17:20, 21.

Serten i krwar ki Zezi pe dir ki Rwayonm pe diriz dan leker bann serviter Bondye. Me sa pa kapab leka akoz Rwayonm pa dan leker bann Farizyen ki Zezi pe koz avek. Par kont, i parmi zot parski Zezi, sa Lerwa ki Bondye in swazir pour diriz son Rwayonm i la avek zot.​—Matye 21:5.

I tre probab ki apre ki bann Farizyen in ale, Zezi i donn son bann disip plis detay konsernan sa Rwayonm ki pe vini. Konsernan ler i pou konmans dirize dan sa Rwayonm, i averti zot: “Letan pou vini ler zot pou swete ki Garson zonm ti pou la avek zot, me zot pa pou vwar li.” (Lik 17:22) Zezi pe montre ki Garson zonm pou vin lerwa dan Rwayonm Bondye a lavenir. Avan sa letan i arive, i posib ki serten disip pou vreman anvi vwar Garson zonm pe dirize dan Rwayonm, me zot pou bezwen kontinyen espere ziska letan fikse Bondye pour Garson zonm vini.

Zezi i kontinyen: “Bann dimoun pou dir zot, ‘Gete, la i la!’ ouswa ‘Gete, la i laba!’ Pa bezwen ale oubyen swiv zot. Parski zis parey zekler ki sorti dan en kote lesyel e i ganny vwar lot kote lesyel, koumsanmenm ki i pou ete ler Garson zonm pou la.” (Lik 17:23, 24) Kwa ki pou ed bann disip Zezi pour pa tay deryer sa bann fo mesi? Zezi i dir ki ler sa vre Mesi pou la i pou parey zekler ki kapab ganny vwar byen lwen. I pou evidan ki Zezi pe dirize dan Rwayonm Bondye pour tou bann ki pe esper Rwayonm.

Apre sa, Zezi i servi sa ki ti arive dan lepase pour montre ki mannyer latitid bann dimoun pou ete dan sa letan a lavenir. I ti dir: “Deplis, zis parey i ti arive dan letan Noe, koumsanmenm i pou ete ler Garson zonm pou la . . . Pareyman, zis parey i ti arive dan letan Lot: dimoun ti pe manze, bwar, aste, vann, plante e konstri. Me zour ki Lot ti kit Sodonm, dife ek souf sorti dan lesyel ti tonbe parey lapli e detri zot tou. Zour ki Garson zonm pou ganny revele pou parey.”​—Lik 17:26-30.

Zezi pa pe dir ki bann dimoun dan letan Noe e letan Lot ti ganny detrir akoz zot ti fer bann keksoz normal parey manze, bwar, aste, vann, plante e konstri. Noe ek Lot osi ti fer serten sa bann keksoz. Me sa bann dimoun pa ti pe fer lavolonte Bondye e zot pa ti pran kont sa  letan ki zot ti pe viv ladan. Alor, Zezi i ankouraz son bann disip pour port latansyon lo lavolonte Bondye e pour fer li. Dan sa fason, i pe montre zot ki mannyer zot kapab ganny proteze e ganny zot lavi sove ler Bondye i anmenn destriksyon a lavenir.

Bann disip pou bezwen evite ganny distrer par bann keksoz lemonn otour zot, ‘bann keksoz ki zot in kit deryer.’ Zezi i dir: “Sa zour, sa dimoun ki lo twa lakaz me ki son bann zafer i dan son lakaz pa devret desann pour al pran zot, pareyman, sa dimoun ki dan plantasyon pa devret retourn dan son lakaz pour pran bann keksoz ki i’n kit deryer. Rapel sa ki ti arive avek madanm Lot.” (Lik 17:31, 32) I ti vin en stati disel.

Zezi i kontinyen dekrir mannyer keksoz pou ete ler Garson zonm pou dirize konman Lerwa. I dir: “Sa zour swar de dimoun pou lo en lili, enn pou ganny pran e lot pou ganny kit deryer.” (Lik 17:34) Alor serten pou ganny sove, tandis ki lezot pou ganny kit deryer, setadir zot pou perdi zot lavi.

Bann disip i demande: “Kote sa pou arive Senyer?” Zezi i reponn: “Kot lekor mor i ete, lanmenm la ki bann leg pou rasanble.” (Lik 17:37) Serten disip pou parey bann leg ki vwar byen lwen. Sa bann disip pou ralye ansanm avek sa vre Kris, Garson zonm. Dan sa letan a lavenir, Zezi pou donn son bann disip laverite ki sov lavi bann ki annan lafwa.