Zezi fek dir bann dimoun ki pe ekout li dan rezyon Pere ki “bokou ki premye pou vin dernyen e sa ki dernyen pou vin premye.” (Matye 19:30) I servi en legzanp konsernan bann travayer dan en plantasyon rezen pour met lanfaz lo sa pwen:

“Rwayonm lesyel i parey en met lakour ki ti al rod bann travayer granmaten pour travay dan son plantasyon rezen. Apre ki i ti’n tonm dakor avek bann travayer pour pey zot en denye pour en zournen, i ti anvoy zot dan son plantasyon rezen. Dan bann 9 er bomaten, i ti sorti ankor enn fwa e kot bazar i ti vwar bann dimoun ki ti napa travay. I ti dir zot, ‘Zot osi al travay dan mon plantasyon rezen e mon pou donn zot en bon lapey.’ Alor zot ti ale. I ti sorti ankor enn fwa apepre midi e osi apepre 3 er apremidi e i ti fer parey. Finalman, apepre 5 er apremidi, i ti sorti e i ti vwar lezot ki ti pe debout nanryen fer, i ti dir zot, ‘Akoz zot in debout la lazournen antye e zot pa pe travay?’ Zot ti reponn, ‘Parski personn pa’n anploy nou.’ I ti dir zot, ‘Zot osi al dan plantasyon rezen.’”​—Matye 20:1-7.

I tre probab ki ler dimoun i tann li koz lo “rwayonm lesyel” ek “met lakour,” zot mazin Zeova. Labib i koz lo Zeova konman propriyeter en plantasyon rezen ki ti reprezant nasyon Izrael. (Psonm 80:8, 9; Izai 5:3, 4) Bann dimoun ki anba lalyans Lalwa i ganny konpare avek bann travayer dan en plantasyon rezen. Me Zezi pa pe koz lo lepase, me i pe dekrir en sityasyon ki egziste dan son letan.

Bann sef relizye, parey bann Farizyen ki’n teste li lo size divors resaman, i sipoze pe kontinyen travay dir dan servis Bondye. Zot parey bann travayer ki’n travay lazournen antye e ki ekspekte en lapey konplet, setadir en denye pour en zournen.

Bann pret ek lezot sef relizye i mazinen ki bann Zwif ordiner pe servi Bondye mwens, parey bann travayer ki pa’n fer en lazournen dan plantasyon. Dan legzanp Zezi, zot parey sa bann zonm ki’n ganny anploye “9 er bomaten” oubyen pli tar dan lazournen, swa midi, 3 er oubyen 5 er apremidi.

Bann zonm ek fanm ki swiv Zezi i ganny konsidere konman “bann dimoun modi” par bann sef relizye. (Zan 7:49) Zot in travay konman bann peser oubyen labourer tou dilon zot lavi. Alor, lotonn lannen 29, “propriyeter sa plantasyon” ti anvoy Zezi kriy sa bann dimoun ordiner pour vin travay pour Bondye konman bann disip Kris. Zot sa “bann dernyen” ki Zezi i mansyonnen ki vin travay ver 5 er apremidi.

Finalman, Zezi i dekrir sa ki arive a lafen lazournen travay: “Ler fernwanr ti fer, propriyeter sa plantasyon rezen ti dir sa zonm ansarz, ‘Apel bann travayer e pey zot zot saler, konmans avek bann ki’n vin dernyen e fini avek bann ki’n vin premye.’ Bann travayer ki ti konmans travay 5 er apremidi ti vini e sakenn ti ganny en denye. Alor, ler sa bann ki ti konmans travay premye ti vin pran zot lapey, zot ti krwar ki zot ti pou ganny plis, me zot osi zot ti ganny en denye. Ler zot ti pran zot lapey, zot ti konmans konplent kont met lakour e dir, ‘Sa bann zonm ki’n vin travay dernyen in travay enn erdtan, kantmenm sa ou’n tret zot parey nou ki’n rente lazournen antye dan sa gro ker soley!’ Me i ti dir enn parmi zot, ‘Msye, mon pa’n fer ou ditor. Ou ti dakor pour ganny peye en denye, non? Pran sa ki pour ou e ale. Mon anvi donn sa bann ki’n vin travay dernyen parey ou. Eski mon napa drwa fer sa ki mon oule avek mon prop keksoz? Eski ou zalou akoz mon en bon dimoun?’  Koumsanmenm ki bann dernyen pou vin premye e bann premye pou vin dernyen.”​—Matye 20:8-16.

Bann disip i kapab pe mazinen ki dernyen bout sa legzanp i vedir. Ki mannyer bann sef relizye Zwif ki krwar ki zot “premye” pou vin “dernyen”? Ki mannyer bann disip Zezi pou vin “premye”?

Bann disip Zezi ki ganny konsidere konman “dernyen” pou pas “premye” e zot pou ganny en rekonpans konplet. Ler Zezi i mor, nasyon Izrael pou ganny rezete e Bondye pou swazir “Izrael Bondye” konman son nouvo nasyon. (Galat 6:16; Matye 23:38) Zan ki batize ti koz lo bann ki ti pou form parti sa nouvo nasyon ler i ti koz lo batenm avek lespri sen ki ti pou arive pli tar. Bann ki “dernyen” pou parmi bann premye ki ganny sa batenm e ganny sa privilez pour vin bann temwen Zezi “ziska dan bann landrwa pli elwannyen lo later.” (Akt 1:5, 8; Matye 3:11) Si bann disip i arive konpran sa gran sanzman ki Zezi pe koz lo la, zot kapab osi mazinen ki kantite bann sef relizye ki pou vin “dernyen” pou ay zot.