I fer trwa zour depi ki Natanael in vin enn parmi bann premye disip Zezi. Zezi ek serten sa bann premye disip i al dan nor, dan distrik Galile kot zot sorti. Zot al dan en lavil ki apel Kana, kot Natanael i sorti. Kana i dan bann pti montanny ki dan nor Nazaret, kot Zezi ti grandi. Zot in ganny envite en maryaz laba.

Manman Zezi osi in ganny envite dan sa maryaz. Mari i zanmi bann ki pe marye, alor i paret ki i pe ede servi bann envite. I pa pran lontan pour Mari realize ki i annan en problenm e i al dir Zezi: “Diven in fini.”​—Zan 2:3.

Anfet, vi ki diven in fini, Mari pe sizere ki Zezi i fer en keksoz. Zezi i servi en lekspresyon ki montre ki i pa dakor. I dir: “Madanm, ki sa i annan pour fer avek mwan ouswa ou?” (Zan 2:4) Zezi in ganny apwente konman fitir Lerwa Bondye, alor i son Papa dan lesyel ki pou dir li ki pour fer pa son fanmir ni son zanmi. Mari i demontre lasazes par les son garson rezourd keksoz e i zis dir avek bann dimoun ki pe servi: “Fer tou sa ki i dir zot fer.”​—Zan 2:5.

I annan sis resipyan an ros e sakenn i kapab pran plis ki karant lit delo. Zezi i demann bann ki pe servi pour “ranpli sa bann resipyan avek delo.” Apre, Zezi i dir: “Aprezan, pran en pe ladan e anmenn kot sa enn ki ansarz resepsyon.”​—Zan 2:7, 8.

Sa enn ki ansarz resepsyon i vwar diven vreman bon me i pa konnen ki sa diven in ganny fer atraver en mirak. I kriy nouvo marye e dir li: “Tou dimoun i normalman donn sa bon diven avan e ler dimoun in sou, i donn sa ki pa tro bon. Ou ou’n anmas sa bon diven pour pli tar.”​—Zan 2:10.

Sa i premye mirak ki Zezi i fer. Ler son bann nouvo disip i vwar sa mirak, zot konmans annan plis lafwa dan li. Apre sa, Zezi, son manman ek son bann frer i al dan lavil Kapernaoum ki lo lakot nor was Lanmer Galile.