Son lannmen, Dimans le 9 Nizan, Zezi i kit Betani avek son bann disip e al ver Zerizalenm. Ler zot pe apros Betfaze ki lo Montanny Pye Zoliv, Zezi i dir de son disip:

“Al dan sa vilaz ki zot vwar laba, enn fwa ki zot in arive zot pou vwar en bourik ek piti en bourik o bor li, delarg zot e anmenn zot kot mwan. Si en dimoun i dir zot keksoz, zot devret dir, ‘Senyer i bezwen zot.’ Ler zot pou dir sa, deswit i pou les zot ale.”​—Matye 21:2, 3.

Bann disip pa konpran ki lenstriksyon Zezi i annan pour fer avek en profesi Labib. Me pli tar, zot pou konpran lakonplisman profesi Zekarya. I ti predir ki sa Lerwa ki Bondye ti’n promet ti pou antre Zerizalenm “konman en dimoun senp, lo en bourik, en pti bourik, piti en femel bourik.”​—Zekarya 9:9.

Ler bann disip i ariv Betfaze e pran sa pti bourik ki en mal ek son manman, bann dimoun ki pe debout lanmenm i demande: “Akoz zot pe delarg sa bourik?” (Mark 11:5) Me ler zot tande ki se Senyer ki bezwen sa de bourik, zot les bann disip pran zot pour anmenn kot Zezi. Bann disip i met zot lenz lo sa bourik ek son piti, me Zezi i asiz lo sa pti bourik.

Plis dimoun i rasanble anmezir ki Zezi i al ver Zerizalenm lo sa bourik. En kantite dimoun i tal zot lenz lo semen. Lezot i koup bann brans oubyen “bann fey dan lakanpanny” e tal zot ater. Zot kriye: “Nou priye, sov li. Beni sa enn ki vin o non Zeova! Beni Rwayonm nou papa David ki pe al ganny etablir!” (Mark 11:8-10) Bann Farizyen ki dan lafoul i ankoler ki bann dimoun pe dir sa. Zot dir Zezi: “Ansenyan, reprimann ou bann disip.” Zezi i reponn: “Mon dir zot, si zot ti reste trankil, bann ros ti pou kriye.”​—Lik 19:39, 40.

Ler Zezi i vwar Zerizalenm, i konmans plere e dir: “Si ou osi ou ti’n konpran ozordi sa ki ou bezwen fer pour ganny lape, me la sa in ganny kasyet avek ou.” Bann dimoun Zerizalenm pou bezwen peye pour zot dezobeisans. Zezi i predir: “Ou bann lennmi pou konstri en gran baraz avek bann poto pwent toultour ou, zot pou anserkle ou e atak ou dan tou kote. Zot pou kraz ou e detri ou bann zanfan, zot pa pou kit en ros lo en lot dan ou.” (Lik 19:42-44) Zis parey Zezi ti dir, Zerizalenm i ganny detrir lannen 70.

Ler Zezi i antre Zerizalenm, i ‘annan en kantite tapaz dan lavil e dimoun i demande: “Lekel sa?”’ Lafoul i dir: “Zezi sa, sa profet ki sorti Nazaret, Galile!” (Matye 21:10, 11) Lezot dan lafoul ki ti’n vwar Zezi resisit Lazar i rankont bann dimoun sa mirak. Ler bann Farizyen i vwar tousala, zot konplent ki zot pa kapab fer nanryen. Zot dir kanmarad: “Lemonn antye pe swiv li.”​—Zan 12:18, 19.

Parey son labitid ler i vizit Zerizalenm, Zezi i al kot tanp pour ansennyen. Laba i geri bann aveg ek bann ki bwete. Bann sef relizye ek bann profeser lalwa i ankoler ler zot vwar sa ki i pe fer e tann bann garson pe kriye dan tanp, “Nou priye, sov Garson David!” Bann sef relizye i demann Zezi: “Eski ou tande ki zot pe dir?” Zezi i reponn: “Zot pa’n deza lir sa, ‘Ou’n fer bann zanfan ek bann pti baba loue ou’?”​—Matye 21:15, 16.

Zezi i get partou dan tanp. Vi ki i deza tar, i kit Zerizalenm avek son bann zapot. Avan Dimans le 10 Nizan i konmanse, i retourn Betani kot i pas lannwit.