Dan en sans, nou kapab konsider Labib antye konman en mesaz sorti kot Bondye. Nou Papa dan lesyel in donn nou Labib pour ansenny nou. Me annou vwar de mesaz spesyal dan Labib ki ti ganny donnen plis ki 2,000 an pase. Lanz Gabriyel ki “toultan devan Bondye,” ti anons sa bann mesaz. (Lik 1:19) Ki ti pe arive ler sa lanz ti anons sa bann mesaz enportan?

Nou apepre lannen 3 avan Kris. Avek lekel Gabriyel i anons son premye mesaz? Avek en pret ki apel Zekarya. I reste dan bann montanny Zide ki tre probab pa tro lwen avek Zerizalenm. Li ek son madanm Elizabet nepli zenn e zot napa zanfan. I tour Zekarya pour servi konman pret dan tanp Bondye, Zerizalenm. Ler Zekarya i dan tanp, en sel kou lanz Gabriyel i aparet debout o bor lotel kot lansan i ganny brile.

Nou kapab konpran ki sa i fer Zekarya per. Me sa lanz i dir: “Pa bezwen per Zekarya, parski Bondye in tann ou siplikasyon, ou madanm Elizabet pou ganny en garson e ou devret apel li Zan.” Gabriyel i osi dir ki Zan “pou en zonm remarkab devan Zeova” e ki i pou “prepar en pep pour Zeova.”​—Lik 1:13-17.

Pour Zekarya, sa i paret enposib. Akoz? Parski laz ki li ek Elizabet in arive. Alor Gabriyel i dir li: “Parski ou pa’n krwar sa ki mon’n dir ou, ou pa pou kapab koze ziska zour ki sa bann keksoz i arive.”​—Lik 1:20.

Antretan, tou dimoun deor pe rode akoz Zekarya pe pran tou sa letan dan tanp. Alafendefen i sorti, me i pa kapab koze. Zekarya i zis kapab fer bann siny avek son lanmen. Aprezan tou dimoun i konpran ki i’n vwar en vizyon.

Ler Zekarya i fini son servis kot tanp, i retourn kot li. Pa bokou letan apre, Elizabet i tonm ansent. Pandan ki Elizabet pe espere pour ganny son pti baba, i reste kot lakaz pour senk mwan.

Apre, lanz Gabriyel i vin en dezyenm fwa. Kot lekel safwasi? Kot Mari, en zenn fiy ki pa ankor marye. Mari i reste dan lavil Nazaret, dan en rezyon ki apel Galile, dan nor. Sa lanz i dir li: “Ou fer plezir Bondye.” Gabriyel i osi dir Mari: “Ekoute! ou pou tonm ansent e ou pou ganny en garson. Ou devret apel li Zezi. Sa zanfan pou remarkab e i pou ganny apele Garson sa Enn Tre O e . . . I pou Lerwa bann desandans Zakob pour touzour e i pou napa en lafen avek son Rwayonm.”​—Lik 1:30-33.

Nou kapab mazinen ki kantite Gabriyel ti apresye sa privilez pour anons sa de mesaz. Anmezir ki nou lir plis lo Zan ek Zezi, nou pou konpran plis akoz sa bann mesaz sorti kot Bondye i sitan enportan.