Apre ki lanz Gabriyel in dir sa zenn fiy Mari ki i pou ganny en garson ki apel Zezi e ki pou Lerwa pour touzour, Mari i demande: “Mon ankor en vyerz, ki mannyer sa pou arive?”​—Lik 1:34.

Gabriyel i reponn li: “Lespri sen pou desann lo ou e sa Enn Tre O pou kouver ou avek son pwisans. Se pour sa rezon ki sa enn ki pou ne pou ganny apele sen e Garson Bondye.”​—Lik 1:35.

Petet pour Gabriyel ed Mari aksepte sa mesaz, i dir li: “Ekoute! I fer sis mwan depi ki ou fanmir Elizabet i ansent menm si i vye e dimoun ti dir i steril. I pou osi ganny en garson. Parski napa nanryen ki enposib pour Bondye.”​—Lik 1:36, 37.

Sa ki Mari i dir apre i montre ki i’n aksepte sa mesaz. I dir: “Gete! Mwan mon lesklav Zeova! Ki sa ki ou’n dir i ariv mwan.”​—Lik 1:38.

Deswit apre ki Gabriyel in ale, Mari i prepar li pour al vizit Elizabet ek son msye Zekarya ki reste o bor Zerizalenm dan bann montanny Zide. Sorti Nazaret pour al kot Elizabet i reste, i kapab pran trwa oubyen kat zour.

Alafendefen Mari i ariv kot lakaz Zekarya. Ler i antre i dir Elizabet bonzour. Deswit Elizabet i ranpli avek lespri sen e i dir Mari: “Ki Bondye i beni ou parmi bann madanm e ki sa zanfan ki dan ou vant i ganny beni. Ki mannyer mon kapab ganny sa loner pour manman mon Senyer vin kot mwan? Parski desito ki ou ti dir mwan bonzour, sa pti baba dan mon vant ti bouze telman i ti kontan.”​—Lik 1:42-44.

Mari i reponn e eksprim son lapresyasyon: “Mon rann glwar Zeova, mon vreman dan en gran lazwa akoz Bondye mon Sover, parski i’n vwar ki son lesklav i en senp dimoun. Depi ozordi tou bann zenerasyon pou dir ki mon en madanm beni, parski sa Bondye pwisan in fer bann keksoz merveye pour mwan.” Nou kapab remarke ki menm si Mari i ganny onore, i donn tou laglwar Bondye. I dir: “Son non i sen. Zenerasyon apre zenerasyon, i pou demontre konpasyon anver sa bann ki annan en gran respe pour li.”​—Lik 1:46-50.

Anba lenfliyans lespri sen, Mari i kontinyen loue Bondye avek sa bann parol profetik: “Avek son lebra, i’n azir avek pwisans. I’n eparpiy bann ki annan move lentansyon akoz larogans dan zot leker. I’n fer bann dirizan desann lo zot tronn e i’n onor bann senp dimoun. I’n donn bann ki lafen tou bann bon keksoz ki zot bezwen e i’n fer bann ki ris al lanmen vid. I’n vin ed Izrael son serviter, pour montre ki i rapel son promes pour demontre konpasyon anver Abraam ek son desandans pour touzour parey i ti’n dir nou zanset.”​—Lik 1:51-55.

Mari i reste avek Elizabet pour apepre trwa mwan. San dout i ed Elizabet en kantite pandan sa bann dernyen detrwa semenn avan ki i ganny son pti baba. Pa i byen pour vwar sa de madanm fidel ki ansent gras a led Bondye, reste ansanm pandan sa moman spesyal dan zot lavi!

Deplis, remarke ki Zezi ti ganny onore menm avan i ti ne. Elizabet ti apel li “mon Senyer” e ler Mari ti fek arive sa zanfan dan vant Elizabet “ti bouze telman i ti kontan.” Parey nou pou vwar apre, sa i vreman diferan avek fason ki lezot dimoun i tret Mari ek son pti baba ki pa ankor ne.