Zezi i ankor Zerizalenm zour Saba. Anmezir ki li ek son bann disip pe marse dan lavil, zot vwar en mandyan ki pa vwar kler depi son nesans. Bann disip i demann Zezi: “Ansenyan, lekel ki’n fer pese pour sa zonm ne aveg, li menm ouswa son paran?”​—Zan 9:2.

Bann disip i konnen ki sa zonm pa ti’n deza egziste avan ki i ti ne, me i kapab ki zot anvi konnen si petet sa dimoun ti fer en pese ler i ti dan vant son manman. Zezi i reponn: “I pa ni pese sa zonm, ni pese son paran ki’n fer li aveg, me sa in arive pour ki dimoun i vwar pwisans Bondye.” (Zan 9:3) Alor ni sa zonm, ni son paran pa ti’n fer en fot oubyen pese ki’n fer li aveg. Anfet, vi ki Adan in fer pese, nou tou nou enparfe e ler nou ne, nou kapab annan bann dezabilite. Par egzanp, en dimoun i kapab ne aveg. Me lefet ki sa zonm i aveg i donn Zezi en loportinite pour montre pwisans Bondye, parey i’n deza fer ler i ti geri bann dimoun.

Zezi i montre ki i enportan pour fer sa bann mirak san tarde. I dir: “Nou devret fer travay sa Enn ki’n anvoy mwan ler i ankor lizour, aswar pe vini kot personn pa kapab travay. Tan ki mon dan lemonn, mon lalimyer lemonn.” (Zan 9:4, 5) Byento, ler Zezi i mor, i pou konmsi i dan fernwanr e i pa pou kapab fer nanryen. Antretan, i en sours lalimyer pour lemonn.

Me eski Zezi pou geri sa zonm? Ki mannyer i pou fer sa? Zezi i kras ater e avek son lakras i fer labou. I met en pe lo lizye sa zonm ki aveg e dir: “Al lav ou lizye dan basen Siloam.” (Zan 9:7) Sa zonm i obei. Ler i fer sa, i kapab vwar kler! Zis mazin son lazwa ler i kapab vwar kler pour premye fwa!

Son bann vwazen ek lezot dimoun ki ti konnen ki i aveg i sirprann. Zot demande: “Sanmenm sa zonm ki ti abitye asize pe mandyan, non?” Serten i dir: “Li menm li.” Me lezot pa oule krwar e zot dir: “Non, me i parey li.” Sa zonm li menm i reponn: “Mwan menm sa.”​—Zan 9:8, 9.

Alor zot demann li: “Me, ki mannyer ou’n vwar kler?” I reponn: “Sa zonm ki apel Zezi in fer en melanz labou, i’n met lo mon lizye e dir mwan, ‘Al lav ou lizye Siloam.’ Alor mon ti al lav mon lizye e apre mon ti vwar kler.” Apre zot demann li: “Oli sa zonm?” Sa mandyan i reponn: “Mon pa konnen.”​—Zan 9:10-12.

Bann dimoun i anmenn li kot bann Farizyen e zot osi zot anvi konnen ki mannyer sa zonm i vwar kler aprezan. I dir zot: “I ti met labou lo  mon lizye, mon ti lav mon lizye e aprezan mon kapab vwar kler.” Bann Farizyen i sipoze kontan ki sa mandyan in ganny geri. O kontrer, serten parmi zot i kritik Zezi. Zot dir: “Sa pa en zonm sorti kot Bondye parski i pa fer Saba.” Par kont, lezot i dir: “Ki mannyer en dimoun ki annan en move lavi i kapab fer en mirak parey?” (Zan 9:15, 16) Alor zot pa tonm dakor avek kanmarad.

Vi ki zot annan diferan lopinyon, zot demann sa zonm: “Ki ou kapab dir lo li, vi ki i’n fer ou vwar kler?” Sa zonm napa okenn dout lo Zezi e i dir: “I en profet.”​—Zan 9:17.

Bann Zwif i refize krwar sa. Petet zot krwar ki Zezi ek sa zonm in tonm dakor pour anbet dimoun. Alor zot deside ki sel fason pour vreman konn sa ki’n arive se demann paran sa mandyan si i ti vreman aveg.