Ler Zezi i Zide i aksepte lenvitasyon en Farizyen pour al pran en repa kot li. I tre probab ki sa i pandan lazournen. (Lik 11:37, 38) Avan bann Farizyen i manze, zot swiv sa tradisyon lav lanmen ziska kot koud. Me Zezi pa fer sa. (Matye 15:1, 2) I pa kont Lalwa pour lav lanmen ziska kot koud, me i pa en keksoz ki Bondye i demann zot pour fer.

Sa Farizyen i sirprann ki Zezi pa swiv sa tradisyon. Zezi i remark sa e i dir: “Zot bann Farizyen, zot netway an deor lakoup ek lasyet, me anndan i ranpli avek vorasite ek sa ki mal. Enbesil! Pa sa enn ki’n fer sa ki an deor in osi fer sa ki anndan?”​—Lik 11:39, 40.

I pa en problenm ki zot lav zot lanmen avan manze me i en problenm ki zot ipokrit dan lafason ki zot ador Bondye. Bann Farizyen ek lezot i swiv sa tradisyon pour lav zot lanmen me zot pa pirifye zot move leker. Alor Zezi i konsey zot: “Ed bann pov avek tou zot leker koumsa zot a vin pir dan tou keksoz.” (Lik 11:41) Sa i vre! Nou devret ed lezot akoz nou kontan zot, pa akoz nou fer krwar ki nou fer sa ki byen pour enpresyonn lezot.

I pa konmsi sa bann Zwif pa zanmen donnen. Anfet, Zezi i dir: “Zot donn en dizyenm lanmant, dil ek tou lezot zepis, me zot inyor lazistis ek lanmour Bondye! Zot ti oblize fer sa bann keksoz, me zot pa ti merit inyor lezot keksoz osi.” (Lik 11:42) Dapre Lalwa bann Izraelit ti bezwen pey ladim (en dizyenm) sa ki zot rekolte. (Deterononm 14:22) Lalwa ti demann zot pour donn lanmant ek dil. Sa ti bann zepis oubyen plant ki fer manze goute. Bann Farizyen ti fer sir ki zot pey en dizyenm sa bann zepis, me zot pa ti fer bann keksoz pli enportan dan Lalwa parey demontre lazistis e azir dan en fason modes.​—Mika 6:8.

Zezi i kontinyen par dir: “Maler lo zot, Farizyen, parski zot kontan asiz devan dan sinagog e ler dimoun i salye zot avek respe dan bazar! Maler lo zot akoz zot parey bann latonm ki pa fasil remarke ki dimoun i mars lo la san konnen!” (Lik 11:43, 44) Bann dimoun ti kapab mars lo sa bann latonm san realize e vin enpir dapre Lalwa. Zezi i servi sa legzanp pour montre ki menm si bann Farizyen i donn lenpresyon ki zot pir spirityelman an realite zot enpir.​—Matye 23:27.

En zonm ki konn byen Lalwa i konplent: “Ansenyan, ou pe ensilte nou osi par sa ki ou pe dir.” Me sa bann zonm i bezwen realize ki zot pa pe ed bann dimoun. Zezi i dir: “Maler lo zot osi ki konn byen Lalwa, parski zot met bann pake lour lo zepol dimoun ki difisil pour anmennen, me zot, ni menm avek en ledwa zot pa pare pour tous sa bann pake! Maler lo zot, akoz zot fer latonm bann profet, me zot zanset ki ti touy zot!”​—Lik 11:45-47.

Sa bann pake ki Zezi pe koz lo la i reprezant bann tradisyon e lafason ki bann Farizyen i enterpret Lalwa. Sa bann zonm pe fer lavi difisil pour bann dimoun ki pe esey ador Bondye. Zot ensiste ki tou dimoun i aplik sa bann lareg e sa i vin en fardo lour pour zot. Zot zanset ti touy bann profet Bondye e zot ti konmans par Abel. La aprezan zot fer konmsi zot pe onor bann profet par konstri bann latonm pour zot, me zot annan menm latitid e fer menm keksoz ki zot zanset. Zot pe esey touy pli gran Profet ki Bondye in anvoye. Zezi i dir ki Bondye pou fer sa zenerasyon rann kont e sa ti arive apepre 38 an pli tar lannen 70.

 Zezi i osi dir: “Maler lo zot ki konn byen Lalwa parski zot in pran lakle konnesans. Zot menm zot pa’n antre e zot esey anpes lezot antre!” (Lik 11:52) Sa bann zonm i devret eksplik Parol Bondye avek bann dimoun, me olye fer sa, zot anpes dimoun konn e konpran son Parol.

Ki mannyer bann Farizyen ek profeser lalwa i reazir? Ler Zezi pe kit sa landrwa, zot konmans ankoler, opoz li e demann li kestyon enn deryer lot. Zot pa pe demann li sa bann kestyon akoz zot anvi aprann. Non, zot anvi esey trik Zezi pour fer li dir en keksoz ki zot kapab servi kont li pour aret li.